تۇركىستان: 30-عا جۋىق ينۆەستيتسيالىق جوبانى جۇزەگە اسىرۋ بارىسى تالقىلاندى

تۇركىستاندا وبلىس اكىمدىگى جانىنداعى وڭىرلىك ينۆەستيتسيالىق شتابتىڭ كەزەكتى وتىرىسى ءوتتى. جيىندا وبلىس اۋماعىندا جۇزەگە اسىرىلىپ جاتقان جانە ەندى قولعا الىناتىن جوبالار تالقىلاندى. وبلىس اكىمى دارحان ساتىبالدى ءاربىر ينۆەستوردىڭ پىكىرىن تىڭداپ، جوباعا قاتىستى ماسەلەلەر بار-جوقتىعىن سۇرادى. اكىمدىك تاراپىنان بارىنشا قولداۋ كورسەتىلەتىنىن، بىراق، ينۆەستورلار دا ءوز جوبالارىن سوزبالاڭعا سالماي ۋاقتىلى اياقتاۋى ءتيىس ەكەنىن جەتكىزدى. – وبلىس اكىمدىگى، جەرگىلىكتى اتقارۋشى ورگاندار تاراپىنان قانداي كومەك كەرەك بولسا، ول قولداۋ كورسەتىلەدى. ەڭ باستىسى، جۇمىس جوسپارعا ساي جۇرگىزىلىپ، ءوندىرىس ورىندارى اشىلۋى ءتيىس. ءاربىر جوبا بويىنشا جاۋاپتى ينۆەستورمەن جول كارتاسى جاسالادى. ءبىزدىڭ تاراپتان جانە ولاردىڭ تاراپىنان اتقارىلاتىن جۇمىستاردىڭ ورىندالۋ مەرزىمى كورسەتىلەدى. ەگەر جول كارتاسىنداعى جوسپاردان كەشىكسە جانە جەردى الىپ، پايدالانبايتىن بولسا، باسقا ينۆەستورلارمەن كەلىسسوز جۇرەدى. ءار جوبانىڭ باسشىسىمەن جۇزبە-ءجۇز كەزدەسىپ، تالقىلاپ، قولداۋ كورسەتۋگە دايىنبىز. جەڭىلدەتىلگەن نەسيەلەر بويىنشا دا جاۋاپتى قارجى ۇيىمدارىمەن جۇمىس جۇرگىزىلەدى. جاۋاپتى باسقارما، اۋدان، قالا اكىمدىكتەرى جەر، ينفراقۇرىلىم ماسەلەلەرى بويىنشا ينۆەستورلارمەن تۇراقتى بايلانىستا بولىڭىزدار. وڭىردە جاڭا جۇمىس ورىندارىن كوبەيتۋ – باستى مىندەت، – دەدى دارحان ساتىبالدى.