ۇستىمىزدەگى جىلدىڭ ءساۋىر ايىنان باستاپ ءبىلىم سالاسىندا جەمقورلىق دەڭگەيىن انىقتاۋ ماقساتىندا اقتاۋداعى 14 كاسىپتىك-تەحنيكالىق ءبىلىم بەرۋ ۇيىمدارىنىڭ ستۋدەنتتەرى اراسىندا ساۋالنامالار جۇرگىزىلدى.
ال بەلسەندى قاتىسقان پوليتەحنيكالىق، ەنەرگەتيكالىق، گۋمانيتارلىق، مەديتسينالىق، تۋريزم، ونەر، شەتەل تىلدەرى، «بولاشاق»، «مەيىربيكە»، «قاينار»، ەسەپ-تەحنولوگيالىق، تەحنولوگيالىق قىزمەت كورسەتۋ، ش.ەسەنوۆ اتىنداعى كاسپي مەملەكەتتىك تەحنولوگيالار جانە ينجينيرينگ ۋنيۆەرسيتەتىنىڭ كوپسالالى كوللەدجى جانە م.تىنىشپاەۆ اتىنداعى اقتاۋ كولىك كوللەدجدەرىن ايتۋعا بولادى. جەكە كەزدەسۋ ارقىلى ءانونيمدى تۇردە وتكەن ساۋالناماعا بارلىعى 2641 ستۋدەنت قاتىستى.
ءار ءتۇرلى سۇراقتارعا سان ءتۇرلى جاۋاپتار بەرىلدى. ماسەلەن،«سانالى ۇرپاق – جارقىن بولاشاق» جوباسىنىڭ بار ەكەندىگىن مۇلدە بىلمەيتىن ستۋدەنتتەر بار بولىپ شىقتى. بىرەۋلەر كوللەدجدە دايىندىق ءۇشىن ەمتيحان سۇراقتارى تەگىن تاراتىلمايتىنىن راستاسا، سىبايلاس جەمقورلىق فاكتىلەرى تۋرالى حابارلاۋعا دايىن ەمەستەرى دە بار.
كوللەدجگە ءتۇسۋ كەزىندە پارا ارقىلى گرانتقا قابىلداۋ بويىنشا قىزمەت ۇسىنىلعاندىعى، سىياقى بەرۋگە ادەيى جاعداي جاسايتىن وقىتۋشىلاردىڭ ارام پيعىلدى مىنەز-قۇلقىنىڭ كۋاسى بولعاندىعى، ەمتيحان كەزىندە وقىتۋشىلارعا تۇسكى اس ۇيىمداستىرۋ فاكتىلەرىنىڭ ورىن العاندىعى، وقىتۋشىلار وزدەرىنىڭ اۆتورلىق كىتاپتارىن ساتىپ الۋعا ماجبۇرلەۋ دەرەكتەرى ءالى دە بولسا بار ەكەندىگى كورسەتىلدى.
سونداي-اق، وقىتۋشىلار 2000 مەن 5000 تەڭگە كولەمىندە پارا الاتىندىعىن، ءتىپتى كەيبىر مۇعالىمدەردىڭ اتى-ءجونىن اشىق جازىپ كورسەتكەن ستۋدەنتتەر دە بولدى. جالپى وڭىردەگى وقۋ ورىندارىندا سىبايلاس جەمقورلىق تاۋەكەلدەرىنىڭ بار ەكەندىگى ساۋالناما ناتيجەسىندە كورىندى.
ساۋالناما ناتيجەسى بويىنشا كاسىپتىك-تەحنيكالىق ءبىلىم بەرۋ ۇيىمدارىنىڭ باسشىلارىنا ورىن العان كەشىلىكتەردى جويۋ بويىنشا ءتيىستى شارالار الىنىپ، ستۋدەنتتەر اراسىندا سىبايلاس جەمقورلىققا دەگەن «نولدىك» توزىمدىلىك سانا سەزىمىن قالىپتاستىرۋ ماقساتىندا «سانالى ۇرپاق – جارقىن بولاشاق» جوباسى اياسىندا سىبايلاس جەمقورلىققا قارسى شارالاردى ءجيى ۇيىمداستىرىپ تۇرۋ قاجەت ەكەندىگى تۋرالى ۇسىنىس ەنگىزىلدى.
جالپى اگەنتتىكتىڭ اۋماقتىق دەپارتامەنتىمەن ءبىلىم سالاسىنداعى سىبايلاس جەمقورلىقتىڭ الدىن الۋ ماسەلەلەرى جونىندە ءتۇرلى جيىندار ۇدايى وتكىزىلىپ وتىرادى. بۇعان دەيىن زاڭ بۇزۋشىلىققا جول بەرگەنى ءۇشىن تارتىپتىك جازاعا تارتىلىپ، ءتىپتى قىزمەتىنەن كەتكەندەرى دە بار. بىراق، كەز-كەلگەن ءىس-شارا ماقساتى كىنالىلەردى تاۋىپ جازالاۋ ەمەس، كەرىسىنشە ءتۇسىندىرۋ جۇمىستارىن جۇرگىزۋ ارقىلى سىبايلاس جەمقورلىقتىڭ الدىن-الۋ بولىپ تابىلادى. ياعني، ەلىمىزدىڭ گۇلدەنۋى جولىندا ەڭبەك ەتۋگە ءازىر پاتريوت جاستاردى تاربيەلەپ شىعارۋعا ءبىلىم بەرۋ ۇيىمدارى جاۋاپتى بولسا، بىزدە قاراپ قالمايمىز جانە بارلىق مۇددەلى تاراپتارمەن قويان-قولتىق جۇمىس جاساۋعا دايىنبىز.
نەگىزىنەن ءبىلىم سالاسىنداعى سىبايلاس جەمقورلىقتى الدىن-الۋعا باعىتتالعان شارالاردى وتكىزۋدىڭ كەمى جوق. كونفەرەنتسيالار، دوڭگەلەك ۇستەلدەر، فورۋمدار، دەبات-سايىستاردى ايتپاعاندا وڭىردەگى بىرقاتار وقۋ ورىندارىندا «ادالدىق دۇكەندەرى» بىرىنەن سوڭ ءبىرى اشىلۋدا. العاشقى ناتيجەسى جەمىستى دەپ ايتۋعا بولادى، سەبەبى وسى كۇنگە دەيىن شاعىم ايتقان كاسىپكەرلەر بولعان ەمەس. دەمەك، ادالدىعىن ارتتىرۋعا بەل بۋعان جاستار قاتارى قالىپتاسىپ كەلەدى دەگەن وي تۇيدىك.
ستۋدەنتتەردىڭ سىبايلاس جەمقورلىققا قارسى كوزقاراسىن قالىپتاستىرۋ جانە ستۋدەنتتىك ورتادا اكادەميالىق ادالدىق قاعيداتىن ەنگىزۋ ماقساتىندا وڭىرىمىزدەگى جوعارى جانە ارناۋلى ورتا وقۋ ورىندارىندا «سانالى ۇرپاق – جارقىن بولاشاق» كلۋبتارى قۇرىلعانى بەلگىلى.
سونىمەن قاتار، «ادال جول – چەستنىي پۋت» اكتسياسى، «STOP, جەمقورلىق!» اتتى دەبات سايىسى، «ادال ۇرپاق» تەاترلاندىرىلعان كورىنىس كونكۋرسى، «پاراسىز بولاشاققا بىرگە» ءازىل-سىقاق كەشى، «سىبايلاس جەمقورلىقپەن كۇرەستىڭ جاڭا باعىتى» اتتى مودۋلدىك ترەنينگى ۇيىمداستىرىلعان بولاتىن. اتالعان شارالاردىڭ بارلىعىندا دا جاستار بەلسەندىلىك تانىتقاندىعىن ايتپاي كەتۋگە بولمايدى.
تۇپتەپ كەلگەندە، الدا ءبىلىم سالاسىنداعى سىبايلاس جەمقورلىق كورىنىستەرىنىڭ الدىن الۋ ارقىلى مۇعالىمدەردىڭ مارتەبەسىن ءتۇسىرىپ الماۋعا جۇمىستانۋ مىندەتى تۇر. سونداي-اق، اگەنتتىكتىڭ 1424 Call ورتالىعىنا حابارلاسۋعا بولاتىنىن جانە اۋماقتىق دەپارتامەنتكە حابارلاسۋعا بولاتىنىن ۇمىتپاڭىز.
جالپى ماڭعىستاۋ ءوڭىرىنىڭ جاستارى جىگەرلى ءارى بەلسەندى ەكەندىگىن تىلگە تيەك ەتكەندى ءجون سانايمىن. ونىڭ ۇستىنە بيىل «جاستار جىلى». دەمەك، جالىندى جاستارعا سەنىم ارتىپ، ولاردىڭ تەرىس جولعا تۇسپەۋىن قاداعالاۋعا بۋىننىڭ مىندەتى. ۇيدە اتا-انا، وقۋدا ۇستاز، ال قوعامدا ءسىز جانە ءبىز بولىپ ناتيجە شىعارۋعا اسىق بولۋىمىز قاجەت.
اقىن، قازاق ادەبيەتىنىڭ جارقىن جۇلدىزى ماعجان جۇماباەۆ «مەن جاستارعا سەنەمىن» دەگەن قاناتتى ءسوزىن بىلمەيتىن قازاق جوق. ەندەشە، قوعام بولىپ جاستارعا سەنەيىك ءارى ءۇمىت ارتايىق، قولدايىق!
قايرات بايگەباەۆ،
قر مەملەكەتتىك قىزمەت ىستەرى جانە سىبايلاس جەمقورلىققا قارسى ءىس-قيمىل اگەنتتىگىنىڭ ماڭعىستاۋ وبلىسى بويىنشا دەپارتامەنتى باسشىسىنىڭ ورىنباسارى
