دانيار ەلەۋسىنوۆتىڭ پروموۋتەرى گەننادي گولوۆكينمەن بىرگە جۇمىس ىستەيتىن توم لەففلەردى «مەندجمەنتى كاسىپقوي ەمەس» دەپ ايىپتادى، دەپ حابارلايدى Stan.kz اقپارات اگەنتتىگى Sport.kz سايتىنا سىلتەمە جاساپ.
دانيار ەلەۋسىنوۆتىڭ كاسىپقوي رينگتەگى ىستەرىمەن اينالىساتىن امەريكالىق مەنەدجەرلىك كومپانيانىڭ باسشىسى زيا اليەۆ ارادا بولىپ جاتقان داۋعا قاتىستى پىكىر ءبىلدىردى.
«بىرىنشىدەن، توم ءبىزدىڭ گەنناديمەن حابارلاسىپ وتىرعانىمىزدى جاقسى بىلەدى. گەننادي دە جاعدايدان حاباردار. بىراق مەن ءوزىم سويلەسكەن جوقپىن. ازىرگە ولارمەن سويلەسكەن ادامنىڭ اتىن اتاماي-اق قويايىن. بىراق ونىڭ گولوۆكينگە حابارلاسقانىن انىق بىلەمىن. لەففلەردىڭ وعان نە دەپ جاۋاپ بەرگەنىن ايتا الامىن. بىراق ولاي ىستەگىم كەلىپ تۇرعان جوق. قاجەت دەپ ساناساڭىزدار، توم لەففلەردەن كەلگەن ەلەكتروندىق حاتتاردى دا كورسەتە الامىن. ول ءوز حاتىندا دانياردىڭ ورنىنا باسقا بوكسشىنى ۇسىنعىسى كەلەتىنىن جازدى»، - دەدى زيا اليەۆ.
ءارى قاراي ول بار ايىپ دانيار ەلەۋسىنوۆتىڭ كومانداسىندا ەمەس، توم لەففلەردىڭ دۇرىس جۇمىس ىستەي المايتىندىعىندا ەكەنىن ايتتى.
«اركىم ءوزىنىڭ بوكسشىسىن قورعايدى. ال گەننادي ونىڭ بوكسشىسى. ال ءبىزدى كاسىبي مامان ەمەس دەپ ايىپتاعاندارى كۇلكىلى. قولىمدا Matchroom جەلىسى ارقىلى كەلگەن حات بار. سىزدەر سونى كورىڭىزدەر. رەداكتسياعا ۇسىندىم، بىراق جاريالانعانىن قالامايمىن»، - دەدى ول.
بۇدان وزگە كومپانيا باسشىسى گولوۆكين مەن ەلەۋسىنوۆتىڭ مۇلدەم ەكى بولەك جولى بار بوكسشىلار ەكەنىنە توقتالدى.
«توم گولوۆكيننىڭ ءوز كەشىندە دانيار ەلەۋسىنوۆتى كورگىسى كەلمەيتىنىن ايتتى. سمس حابارلامالاردى كورسەتەيىن. ارينە، ەگەر توم بۇعان دايىن بولسا. مەن ولاردى كورسەتەتىن بولسام، كىمنىڭ شىن سويلەپ وتىرعانى بەلگىلى بولادى»، - دەدى زيا اليەۆ.
ەستەرىڭىزگە سالا كەتسەك، گەننادي گولوۆكين وسى ۋاقىتقا دەيىن وسى كەلەڭسىز جاعدايعا قاتىستى پىكىر ءبىلدىرىپ، ءاردايىم ازيادان شىققان بوكسشىلاردى قولداۋعا دايىن ەكەنىن ايتقان بولاتىن.
