جەكسەنبى كۇنى ەكۆادوردا كەزەكتەن تىس وتكەن سايلاۋدا جاڭا پرەزيدەنت بولىپ دانيەل نوبوا سايلاندى، دەپ حابارلايدى «ادىرنا» ۇلتتىق پورتالى.
ازاتتىق راديوسىنىڭ مالىمەتىنشە, باسەكەلەسىنەن ءتورت پايىز كوپ داۋىس العان 35 جاستاعى نوبوا ەكۆادور تاريحىنداعى ەڭ جاس پرەزيدەنت بولادى. ايتا كەتەيىك، نوبوادان بۇرىن، تاريحتا 21 جاستاعى رافاەل ماريا دە لا كرۋس حيمەنا 19 عاسىردا ءۇش كۇن پرەزيدەنت بولعان.
دانيەل نوبوا – ەكۆادور ساياسي ساحناسىنا شىققان جاڭا تۇلعا سانالادى. اكەسى، ءىرى بيزنەسمەن الۆارو نوبوا پرەزيدەنت سايلاۋىنا بەس رەت قاتىسىپ، بەسەۋىندە دە جەڭىلگەن.
جاڭا پرەزيدەنتتىڭ باستى مىندەتى – كوروناۆيرۋس ىندەتىنەن كەيىنگى ەكونوميكانى قالپىنا كەلتىرۋ جانە ەكۆادوردا ءورشىپ تۇرعان قىلمىسپەن كۇرەسۋ. نوبوا سايلاۋ الدىنداعى باعدارلاماسىندا جاستاردى ساياساتقا كوبىرەك تارتاتىنىن، جاستارعا جاڭا جۇمىس ورىندارىن اشاتىنىن ايتقان.
بيىل مامىردا پرەزيدەنت گيلەرمو لاسسو ۇلتتىق اسسمامبلەيانى تاراتىپ، ءوزى دە قىزمەتىنەن كەتكەن سوڭ ەكۆادوردا مەرزىمىنەن بۇرىن سايلاۋ بەلگىلەنگەن.
لاسسوعا قاراتا «مۇناي تاسىمالىنا بايلانىستى جەمقورلىققا قاتىسى بار» دەگەن ايىپتاۋلار كوبەيگەن سوڭ ۇلتتىق اسسامبلەيا وعان يمپيچمەنت جاريالاۋ ماسەلەسىن كوتەرگەن. وسىلايشا نوبوانىڭ پرەزيدەنتتىك مەرزىمى نەبارى 17 اي عانا بولادى، ياعني بۇرىنعى پرەزيدەنتتىڭ قالعان مەرزىمىن اتقارادى. نوبوا 2025 جىلى مامىردا وتەتىن كەلەسى سايلاۋعا قاتىسا الادى.
«ادىرنا» ۇلتتىق پورتالى
