زايىرلى قوعامداعى ءدىن نورمالارىنىڭ ماسەلەلەرى

10737
Adyrna.kz Telegram
https://adyrna.kz/content/uploads/2023/10/203830.jpg
زايىرلى قوعامداعى ءدىن ماسەلەسىن پۋبليكالىق تەزگە سالا تالداۋ جانە مەملەكەت ساياساتىنىڭ ءبىر بولشەگى ەسەبىندە تانۋ، ساناۋ سوڭعى جىلدارى بەلەڭ الىپ وتىر. بارشامىزعا بەلگىلى، قازاقستان رەسپۋبليكاسى كونستيتۋتسياسىنىڭ 1-بابى، 1-تارماعىندا «قازاقستان رەسپۋبليكاسى ءوزiن دەموكراتيالىق، زايىرلى، قۇقىقتىق جانە الەۋمەتتiك مەملەكەت رەتiندە ورنىقتىرادى، ونىڭ ەڭ قىمبات قازىناسى – ادام جانە ادامنىڭ ءومiرi, قۇقىقتارى مەن بوستاندىقتارى» دەگەن جولدار بار. دەمەك، ازاماتتاردىڭ ءوزى قالاعان دىنگە سەنۋى كونستيتۋتسيالىق قۇقىقتارىنا قايشى كەلمەيدى. الايدا زايىرلى قوعام نورمالارىن العا تارتا وتىرىپ، ءدىني دوگمانى قوعامدىق ساناعا تاڭۋ قانشالىقتى دۇرىس؟ زايىرلى مەملەكەتتەگى ءدىن نورمالارى قالاي بولۋى قاجەت؟ زايىرلى مەملەكەت ۇعىمىنىڭ ءتۇپ-تامىرى ءدىني قۇقىق تۇرعىسىنان ادامسۇيگىشتىك قۇقىعىن باسشىلىققا الۋدا جاتىر. ادام جانە ادامنىڭ ءومىرىنىڭ قۇندىلىعى عاسىرلار تەرەڭىنەن زايىرلى جانە قۇقىقتىق مەملەكەت قۇرۋعا دەگەن تالپىنىستى تۋىنداتتى. زايىرلى مەملەكەت – ءدىني نانىم-سەنىمدى ادام بولمىسىنا ءتان قاجەتتىلىكتەردىڭ ءبىرى رەتىندە قاراستىرىپ، قۇقىقتىق نورمالاردى باسشىلىققا الادى. زايىرلى مەملەكەتتە ءدىني قۇقىق ەمەس، ادامنىڭ دىنگە دەگەن قۇقىعى الەۋمەتتىك زاڭدىلىقتار شەڭبەرىندە قاراستىرىلادى. قازىر ءبىز وسى ەرەكشەلىكتەردى مەملەكەتتىك ساياساتتىڭ ءبىر بولىگى رەتىندە زەردەلەپ، زايىرلى مەملەكەتتىڭ دامۋ جولىن ۇلتتىق يدەيا نەگىزىندە قۇرۋىمىز قاجەت. زايىرلى مەملەكەتتە ازاماتتىق قۇقىق پەن زاڭ الدىنداعى تەڭدىك ماڭىزعا يە. ويتكەنى، بۇگىنگى تاڭدا ەلىمىزدە تەرىس پيعىلدى ءدىني توپتاردىڭ (اسىرەسە يسلامي تەرىس پيعىلدى توپتار) تەوكراتيالىق نەمەسە كلەريكالدى مەملەكەت قۇرۋعا دەگەن تالپىنىسى زايىرلىلىقپەن تىعىز بايلانىستاعى قۇقىقتىق ماسەلەلەرىنە، ادامسۇيگىشتىككە نۇقسان كەلتىرۋى مۇمكىن. اشىعىن ايتۋ قاجەت، بۇگىنگى تاڭدا ەلىمىزدىڭ ىشىندە ءدىني ۇگىت-ناسيحات جۇمىستارىن ەكپىندەتە جۇرگىزىپ جاتقان ءارتۇرلى ءدىني باعىتتاعى ۇيىمدار مەن كوپتەگەن تەرىس پيعىلدى زاڭسىز ميسسيونەرلەردىڭ ىستەرى – حالقىمىزدىڭ، ۇلتىمىزدىڭ كەلەشەك بولمىسىنا، اتا ءدىنىمىزدىڭ بەكىپ وركەندەۋىنە دەگەن الاڭداتۋشىلىعىن تۋعىزىپ وتىر. زايىرلى مەملەكەتتەگى ءدىن نورمالارى وزىق، تولەرانتتى، اشىق قوعامنىڭ جاندانۋىنا قاراما-قايشى كەلمەۋى ءتيىس. شىنداپ كەلگەندە، زايىرلىلىق نورمالارى – قۇلشىلىق پەن سەنىم بوستاندىعى نەمەسە مەملەكەت پەن ءدىننىڭ ءوزارا اجىراتىلۋى عانا ەمەس. زايىرلىلىقتىڭ نەگىزگى ماقساتى جەكە تۇلعانى دىندەردىڭ جانە يدەلوگيالاردىڭ قىسىمىنان قۇتقارۋ. اشىق ازاماتتىق قوعام وكىلدەرىن اداسۋدان ساقتاۋ جانە قوعامدىق سانانىڭ سالاۋاتى ءۇشىن تەرىس پيعىلدى ءدىني اعىمداردىڭ ناسيحاتىنا شەكتەۋ قويۋ. زايىرلى قوعام – قۇقىقتىق قاتىناستاردى، ادام مەن ادام ءومىرىن، وي-ساناسىنىڭ ەركىندىگىن باسشىلىققا الاتىن قۇرىلىس. مۇنداي ساياسي قۇرىلىمدا ءدىن ماسەلەسى ءاربىر ازاماتتىڭ جەكە باسىنا قاتىستى قۇندىلىق ەسەبىندە تانىلادى. ال ءدىني دوگمانى مەملەكەتتىك، قوعامدىق ينستيتۋتتار ەسەبىنەن تالاپ ەتۋ، مەكەمەلەردە مىندەتتەۋ تەك بىرجاقتى قوعامدىق احۋالدى باعالاۋدى العا تارتقانمەن تەڭ. زايىرلى قوعامدا ءدىني سەنىم مەملەكەت ساياساتىنىڭ نەگىزگى بۋىنى بولا المايدى، تولەرانتتىلىق پەن ادام قۇقىقتارى مەملەكەتتىڭ قوعامدىق-cاياسي ساناتتا دامۋىن جەتىلدىرىپ وتىرادى.

داستان قاستاي

پىكىرلەر