ەكىنشى سىنىپقا ارنالعان «ادەبيەتتىك وقۋ» وقۋلىعىنداعى جۇمىستاردىڭ ءبىرى اتا-انالاردىڭ نازارىن اۋدارتىپ، تالقىعا ءتۇستى، - دەپ حابارلايدى “ادىرنا” ءتىلشىسى Stan.kz-كە سىلتەپ.
جەلىدە ەكىنشى سىنىپ وقۋلىعىنداعى وقيعانىڭ سۋرەتى تاراپ كەتتى. «ءبىرتۇرلى ماتىنگە» قازاقستاندىقتار نارازى بولدى.
وقۋلىقتاعى اڭگىمەدە بالا اكەسىنەن اۋىر ءسوز ەستىگەن سوڭ قانداي كۇيدە بولعانىن ءتۇسىندىرىپ جازۋ سۇرالعان:
«مەن ۇلىم بولعانىن ارماندادىم. سەنى وتباسىمىزدىڭ قورعانى بولادى دەپ ويلادىم، بىراق سەن مەنى ماسقارالادىڭ. كوزىمە كورىنبەي كەت!» – دەپ جازىلعان.
ءبىراز ۋاقىتتان كەيىن بالا «تاياق جەگەن كۇشىككە» ۇقساپ بولمەسىنە ورالادى.
وقۋلىقتا ارى قاراي جازىلعان ءماتىن بۇدان دا ىڭعايسىز.
«توسەكتىڭ جانىنداعى ەدەنگە جاتىپ ۇيىقتاپ قالىپپىن. بىرەۋدىڭ مەنى شەشىندىرىپ جاتقانىن سەزىپ، ويانىپ كەتتىم. اپكەم مەنى شەشىندىرىپ، ءسۇيىپ، جىلى سوزدەر ايتتى. كوزىمە ەرىكسىز جاس كەلىپ، اپكەمدى قۇشاقتاپ الدىم. اپكەم مەنىمەن بىرگە جىلادى. كەيىن ءوزىمدى باقىتتى سەزىندىم»، — دەپ جازىلعان.
جوعارىدا كەلتىرىلگەن ءماتىندى وقىپ بولعاننان كەيىن وقۋشىلارعا بالانىڭ كوڭىل كۇيىنىڭ وزگەرۋىن سيپاتتاۋ ۇسىنىلعان. الايدا جەلى قولدانۋشىلارى وقۋلىقتاعى تاپسىرماعا نارازىلىقتارىن ءبىلدىردى.
«بالا كەزدەگى پسيحيكالىق زاقىمنىڭ قايدان كەلەتىنى انىق بولدى»، «مەن تاڭعالمايمىن. وقۋلىق جازۋدىڭ ستاندارتى مەن بالالاردىڭ جاس تالاپتارى بويىنشا ارنايى ماماندارى بار عىلىمي-زەرتتەۋ ينستيتۋتتارى قايتارىلمايىنشا، كىتاپتاردا ءتارتىپ بولمايدى»، «وقۋلىقتاردى پسيحولوگتار ساراپتامايدى، تەكسەرمەيدى. ءبىزدىڭ ەلدە پسيحولوگياعا ءالى دە بولسا نەمقۇرايلىلىقپەن قارايدى. ءوزىمىزدىڭ جانە بالالارىمىزدىڭ پسيحيكاسىنا مۇقيات بولۋىمىز كەرەك»، «تۇپنۇسقا ماتىننەن دۇرىس اۋدارماعان سياقتى»، – دەدى جەلى قولدانۋشىلارى.
ال وقۋ-اعارتۋ مينيسترلىگىنىڭ حابارلاۋىنشا، وقۋلىقتاعى ءماتىن 2017 جىلى وقۋ باعدارلاماسىنا ەنىپ، ساراپتاۋ ورتالىعىنىڭ سايتىندا جانە ەلىمىزدىڭ بارلىق وبلىستارىنداعى پەداگوگتەر اراسىندا قوعامدىق تالقىلاۋعا وتكەن.
«بۇل اڭگىمە «مەنىڭ وتباسىم جانە دوستارىم» بولىمىندە، «وتباسىلىق داستۇرلەر» تاقىرىبىندا وقۋعا بەرىلگەن جانە مەكتەپ جاسىنداعى بالالارعا ارنالعان. اڭگىمەدە باستى كەيىپكەر ەركەنىڭ ارەكەتتەرى مەن ويلارى سيپاتتالادى. اۆتور كەيىپكەردى ءارتۇرلى ومىرلىك جاعدايلارمەن سىناپ، سىرتىنان باقىلايدى. دجۋماگەلدينوۆا داريا تۋكەنوۆنا – بالالارعا ارنالعان ولەڭدەردىڭ، ەرتەگىلەردىڭ، پەسالار مەن پروزالاردىڭ تانىمال اۆتورى.
«اكەمەن جانجال» ءۇزىندىسى وقۋلىقتىڭ مازمۇنىنا 2017 جىلى ۇلگىلىك وقۋ باعدارلاماسىنا سايكەس ەنگىزىلدى (قر بعم 21.07.2016 ج. №463 بۇيرىعى). بۇل وقۋلىق باسقا باسپالاردىڭ بالامالى وقۋلىقتارى سياقتى، عىلىمي-پەداگوگيكالىق ساراپتامانىڭ 2 كەزەڭىنەن جانە 30 پيلوتتىق مەكتەپتە سىناقتان ءوتتى. سونداي-اق ءبىلىم مازمۇنىن ساراپتاۋ ورتالىعىنىڭ سايتىندا جانە ەلىمىزدىڭ بارلىق وبلىستارىنداعى پەداگوگتەر اراسىندا قوعامدىق تالقىلاۋعا تۇسكەن»، – دەلىنگەن جازبادا.
