توتەنشە جاعداي ءمينيسترى سىرىم ءشارىپحانوۆ سىبايلاس جەمقورلىقتىڭ الدىن الۋعا قاتىستى قازاقستاندىقتارعا ۇندەۋ جاسادى، دەپ حابارلايدى «ادىرنا» ۇلتتىق پورتالى.
ونىڭ ايتۋىنشا، توتەنشە جاعداي مينيسترلىگى اشىق جۇمىس فورماتىنا كوشكەن. مينيسترلىكتە جۇرگىزىلىپ جاتقان ترانسفورماتسيانىڭ باستى باعىتتارىنىڭ ءبىرى – جەكە قۇرامنىڭ يدەولوگيالىق جانە تاربيە جۇمىسىن ۇيىمداستىرۋ. كاسىبي الەۋەتتى ءتيىمدى پايدالانۋ ماقساتىندا باسشىلاردى روتاتسيالاۋ جانە مينيسترلىكتىڭ شتاتتىق قۇرىلىمىن جەتىلدىرۋ جۇمىستارى جۇرگىزىلىپ جاتىر.مينيسترلىك باسشىلىعىنا ازاماتتىق قورعاۋ ورگاندارى قىزمەتكەرلەرىنىڭ سەنىم دەڭگەيىن ارتتىرۋ ءۇشىن ءبىز باسقارۋدىڭ بارلىق دەڭگەيىندە اشىق جانە ايقىن كوممۋنيكاتسيا جۇرگىزۋدەمىز. ءبىز ءۇشىن ءار جاعدايدى وبەكتيۆتى باعالاۋ جانە قاجەت بولعان جاعدايدا ءتيىستى شارالار قابىلداۋ ماڭىزدى. تجم بولىمشەلەرىندە سىبايلاس جەمقورلىققا قارسى ءىس-قيمىلدىڭ تيىمدىلىگىن ارتتىرۋ ءۇشىن بيىل قازاندا «Integrity check» قىزمەتكەرلەردى ادالدىققا تەكسەرۋ پيلوتتىق جوباسى ەنگىزىلدى. جوبا تەرىس پيعىلدى قىزمەتكەرلەردى دەر كەزىندە انىقتاۋعا جانە سىبايلاس جەمقورلىق قۇقىق بۇزۋشىلىقتاردىڭ جولىن كەسۋگە مۇمكىندىك بەرەدى، – دەدى مينيستر.مينيسترلىك باسشىسى «Integrity check» ىسكە قوسىلعاننان بەرى تجم قىزمەتكەرلەرىنىڭ شوتتارىنا بەلگىسىز تۇلعالاردان قاراجاتتىڭ اۋدارىلعانى تۋرالى 17 حابارلاما كەلىپ تۇسكەنىن جەتكىزدى.
ءبىزدىڭ قىزمەتكەرلەرىمىزدىڭ 99,9%–ى ءوز ءومىرى مەن دەنساۋلىعىن قاۋىپ-قاتەرگە تىگىپ، ءوز قىزمەتىن ادال جانە ابىرويمەن اتقاراتىن ادامدار ەكەنىن ماقتان تۇتامىن. الايدا، قاتارىمىزدا تەرىس پيعىلدى قىزمەتكەرلەر دە بولۋى مۇمكىن ەكەنىن مويىندايمىن. تجم ازاماتتىق قورعاۋ ورگاندارىنداعى سىبايلاس جەمقورلىقتىڭ الدىن الاتىن بولادى. سىزدەردى ءبىزدىڭ قاتارىمىزداعى سىبايلاس جەمقورلىققا قارسى پروفيلاكتيكاعا قاتىسۋعا شاقىرامىن. ەگەر ءسىز توتەنشە جاعدايلار مينيسترلىگىنىڭ قاتارىندا قانداي دا ءبىر سىبايلاس جەمقورلىق ساتتەرىن بايقاساڭىز، بىزگە مىندەتتى تۇردە حابارلاڭىز. ءار وڭىردەگى توتەنشە جاعدايلار دەپارتامەنتتەرىندە تاربيە بولىمشەلەرى قۇرىلدى. سەنىم تەلەفوندارى دا بار. ولار ارقىلى دا جۇگىنۋگە بولادى، – دەدى سىرىم ءشارىپحانوۆ.سونداي-اق مينيستر ءوزىنىڭ 7 747 651 75 88 ءنومىرى Whats App جەلىسى ارقىلى، Instagram جانە Facebook-تەگى جەكە پاراقشالارىنا جازۋعا بولاتىنىن اتاپ ءوتتى. سونىمەن قاتار ە-ءوتىنىش سەرۆيسى ارقىلى رەسمي ءوتىنىش جولداۋعا بولادى.
ءبىز ادامدارعا كومەككە كەلەتىن قىزمەتپىز. سوندىقتان قوعامنىڭ بىزگە دەگەن سەنىمى باسىمدىققا يە. ادامداردى قۇتقارۋدىڭ يگى ىسىندە سىبايلاس جەمقورلىققا جول بەرىلمەيدى، – دەپ تۇيىندەدى ول.
«ادىرنا» ۇلتتىق پورتالى
