قاراعاندى وبلىسىنىڭ اكىمى شاحتا جارىلىسىنان زارداپ شەككەن شاحتەرلەردىڭ جاعدايى تۋرالى ايتتى. ول مەديتسينالىق مەكەمەلەردە دارىگەر باقىلاۋىندا 27 كەنشى قالعانىن مالىمدەدى، دەپ حابارلايدى «ادىرنا» ۇلتتىق پورتالى.
اكىمنىڭ سوزىنشە، شارداپ شەككەن كەنشىلەر بارلىق قاجەتتى مەديتسينالىق كومەكتى الىپ جاتىر. بىرەۋىنىڭ جاعدايى اۋىر، 24-ءى ورتاشا اۋىر، ەكەۋى قاناعاتتانارلىق جاعدايدا.
– قازا تاپقان شاحتەردىڭ ءار وتباسىنا باسقارما باسشىلارى مەن دەپۋتاتتار تاعايىندالدى. ولار جەرلەۋ راسىمىندە وتباسىلارمەن بىرگە جۇرەدى، ءتيىستى تولەمدەردى باقىلايدى جانە اعىمداعى تۇرمىستىق ماسەلەلەردى شەشەدى. جەرلەۋ جانە كولىك بەرۋ بويىنشا قاجەتتى كومەك كورسەتىلەدى. سونداي-اق قازاقستاننىڭ باسقا وڭىرلەرىنەن، جاقىن جانە الىس شەتەلدەردەن تۋىستارى مەن جاقىندارىنىڭ كەلۋى جانە جەتكىزىلۋى بويىنشا جاردەم كورسەتىلەدى، – دەدى ەرماعانبەت بولەكپاەۆ.
ول ءار وتباسىنا دەگەن كوزقاراس جەكە ەكەنىن، ول ءۇشىن الەۋمەتتىك پورترەت جاسالعانىن اتاپ ءوتتى. كوپ بالالى وتباسىلار، سونداي-اق جالعىز اسىراۋشىلارى مەن كامەلەتكە تولماعان بالالارى بار وتباسىلار انىقتالدى. قازا تاپقانداردىڭ يپوتەكالىق جانە وزگە دە كرەديتتەرى جانە ولاردىڭ تۇرعىن ءۇي جاعدايلارى بويىنشا اقپارات جينالدى.
«ادىرنا» ۇلتتىق پورتالى
