الماتى اكىمى ەربولات دوساەۆ جۇمىس ساپارى اياسىندا سەۋلگە باردى. الماتى دەلەگاتسياسىن سەۋل مەرىو سە حۋن قابىلدادى. الماتى اكىمى مەن سەۋل مەرىمەن ەكونوميكالىق ءوسۋدى قامتاماسىز ەتۋ ماسەلەسىن تالقىلادى، دەپ جازدى «ادىرنا» ءتىلشىسى.
كەزدەسۋ بارىسىندا ەكىجاقتى ساۋدا-ەكونوميكالىق ارىپتەستىكتى ارتتىرۋ پەرسپەكتيۆالارى تالقىلاندى. 2023 جىلدىڭ باسىنان بەرى الماتى مەن كورەيا رەسپۋبليكاسى اراسىنداعى تاۋار اينالىمى 23,6%-عا ۇلعايىپ، 720 ملن دوللارعا جەتتى.
الماتى دەلەگاتسياسىنىڭ ساپارى اياسىندا قالا اكىمى ەربولات دوساەۆتىڭ توراعالىعىمەن سەۋل قالاسىندا تسيفرلاندىرۋ، مەديتسينا جانە فارماتسەۆتيكا، ماشينا جاساۋ، سونداي-اق ەكولوگيا جانە ەكولوگيالىق كولىك ماسەلەلەرى بويىنشا Samsung Medison, Samsung C&T, Hyundai Rotem, GL Rapha, SK Ecoplant Co جانە ت.ب. كومپانيالارىنىڭ باسشىلارىمەن بىرقاتار كەزدەسۋ ءوتتى.
جۇمىس ساپارى اياسىندا دەلەگاتسيا سەۋل قالاسىن باسقارۋدىڭ كولىكتىك اقپاراتتىق سەرۆيسىنىڭ TOPIS (Seoul Transport operation & Information Service) data-حابىنا باردى، ول مەگاپوليستىڭ كولىك جۇيەسىن، سەۋلدەگى تابيعي اپاتپەن بايلانىستى كورسەتكىشتەردى تاۋلىك بويى قاداعالايدى، سونىڭ ناتيجەسىندە قالالىق قىزمەتتەرگە ولارعا جەدەل دەن قويۋعا مۇمكىندىك بەرەدى.
ءوز كەزەگىندە سەۋل مەرى و سە حۋن سەۋل تاجىريبەسى جانە قوعامدىق كولىك جۇيەسىن جاڭعىرتۋ ماسەلەلەرىندە ءىرى تەحنولوگيالىق كومپانيالارمەن ىنتىماقتاستىق جوبالارى تۋرالى ايتتى. مەردىڭ ۇسىنىستارىنىڭ ءبىرى سەۋلدىڭ الماتىمەن ەكىجاقتى قارىم-قاتىناستى نىعايتۋىنا جانە ءوزارا ورتاق باستامالاردى قولداۋعا دايىن ەكەنىنە قاتىستى بولدى.
«سەۋل – الەمدەگى ەڭ قارقىندى دامىپ كەلە جاتقان قالانىڭ ءبىرى، قىسقا جانە ۇزاق مەرزىمدى پەرسپەكتيۆادا دۇرىس دامۋ مەن وركەندەۋدىڭ مىسالى. سەۋلدىڭ تەحنولوگيالىق دامۋ، جەدەل قوعامدىق كولىكتى جاڭعىرتۋ، جەكە ينۆەستيتسيا تارتۋ، قالدىقتاردى كادەگە جاراتۋ جانە ەكولوگيالىق ماسەلەنى شەشۋ، تۋريستەردى تارتۋ تاجىريبەسى الماتى ءۇشىن قىزىقتى ءارى پايدالى»، - دەپ اتاپ ءوتتى الماتى قالاسىنىڭ اكىمى .