نيدەرلاندتاعى حالىقارالىق مەكتەپتەر كەڭەسى (CIS) «نازارباەۆ زياتكەرلىك مەكتەپتەرى» دەربەس ءبىلىم بەرۋ ۇيىمىنا ەلدەگى مەكتەپتەردى اككرەديتتەۋگە مۇمكىندىك بەرىپ وتىر. بۇل ورتا ءبىلىم بەرەتىن ۇيىمداردىڭ وقىتۋ ساپاسىن ارتتىرۋعا ىقپالىن تيگىزەدى. بۇل جونىندە NIS-ءتىڭ اۋىل مەكتەپتەرىن قولداۋ باعىتىندا ۇيىمداستىرىلعان حالىقارالىق عىلىمي-تاجىريبەلىك كونفەرەنتسيانىڭ جابىلۋ سالتاناتىندا بەلگىلى بولدى. كەلەر جىلعا دەيىن CIS پەن زياتكەرلىك مەكتەپتەر ەكىجاقتى مەموراندۋم اياسىندا اككرەديتتەۋدىڭ ۇلتتىق ستاندارتتارىن ازىرلەپ، ەرەجەلەردى بەكىتەدى. سونداي-اق سالتاناتتى كەشتە اۋىل مەكتەپتەرىنە NIS اتىنان وقۋلىقتار تابىستالدى.
مۇنان بولەك، شالعايداعى مەكتەپتەردى قولداۋعا باعىتتالعان جوبا اياسىندا وتاندىق جانە شەتەلدىك ەكسپەرتتەر اۋىل مۇعالىمدەرىنە ءوز باياندامالارىن ۇسىندى.
ولاردىڭ قاتارىندا ۇلىبريتانياداعى كەمبريدج ۋنيۆەرسيتەتىنىڭ قۇرمەتتى پروفەسسورى كولين ماكلافلين، قازاقستاننىڭ ەڭبەك سىڭىرگەن ۇستازى كۇلاش ءشامشيدينوۆا، نيدەرلاندتاعى حالىقارالىق مەكتەپتەر كەڭەسىنىڭ (CIS) اتقارۋشى ديرەكتورى دجەين لارسسون، ۇلىبريتانياداعى Anglian Learning Multi Academy Trust كومپانياسىنىڭ نەگىزىن قالاۋشى كەيت ەۆانس، ليتۆالىق پسيحياتر داريۋس رادكياۆيچيۋس، نورۆەگيالىق سۋرەتشى-كاريكاتۋراشى ويستەين كريستيانسەن بار. جالپى، حالىقارالىق كونفەرەنتسياعا الەمنىڭ 7 ەلىنەن ەڭ تاڭداۋلى 19 شەتەلدىك ەكسپەرت شاقىرتىلعان.
«اۋىل مەكتەبىنىڭ وركەندەۋى – قوعام يگىلىگىنىڭ كەپىلى» اتاۋىمەن وتكەن پەداگوگيكالىق باسقوسۋ اۋىلدىق مەكتەپتەردەگى ءبىلىم بەرۋ ساپاسىن ارتتىرىپ، ءاربىر وقۋشىنىڭ ءال-اۋقاتىن قامتاماسىز ەتۋگە باعىتتالعان. يگى شارا «اۋىلدىق جەرلەردە تىرەك مەكتەپتەردىڭ الەۋەتىن دامىتۋ» جوباسى اياسىندا وقۋ-اعارتۋ مينيسترلىگى، «قازاقستان حالقىنا» قوعامدىق قورى جانە ءبىلىم بەرۋ سالاسىن تۇراقتى دامىتۋ قورىمەن سەرىكتەستىكتە ۇيىمداستىرىلدى.
كونفەرەنتسياعا ەلىمىزدىڭ اۋىلدىق ەلدى مەكەندەرىنەن 330-دان اسا پەداگوگ قاتىستى. Cونداي-اق مۇعالىمدەر ەكى كۇن بويى سەكتسيالىق وتىرىستار مەن ماستەر-كلاستاردا بىلىكتىلىكتىلىگىن ارتتىرىپ، پىكىر الماستى. كونفەرەنتسيا اياسىندا كولين ماكلافلين، ءدۇيشون شاماتوۆ، عابيت بەكاحمەتوۆ سىندى اۆتورلاردىڭ كىتاپتارىنىڭ تانىستىرىلىمى ءوتتى.
ايتا كەتسەك، «اۋىلدىق جەرلەردە تىرەك مەكتەپتەردىڭ الەۋەتىن دامىتۋ» جوباسى بويىنشا قازىر 80 اۋىلدىق تىرەك مەكتەپ زاماناۋي جابدىقتارمەن قامتىلىپ، ادىستەمەلىك كومەك الۋدا. الداعى ۋاقىتتا
200-گە تارتا ءبىلىم وشاعى قامتىلادى. قازىر 2400-گە جۋىق پەداگوگ بىلىكتىلىگىن ارتتىردى. سونىڭ ناتيجەسىندە پەداگوگتەردىڭ كاسىبي سەنىم دەڭگەيى 15 پروتسەنتكە ارتىپ وتىر. ال تىرەك مەكتەپتەردەگى وقۋشىلاردىڭ ساباقتى مەڭگەرۋ كورسەتكىشى 38%-عا ارتقان.
