جەزقازعان قالاسىندا 30 قازان - 4 قاراشا ارالىعىندا قازاقستان جازۋشىلار وداعىنىڭ، قازاقستان تەاتر قايراتكەرلەرى وداعىنىڭ مۇشەسى، قازاقستان پەداگوگيكالىق عىلىمدار اكادەمياسىنىڭ كوررەسپوندەنت-مۇشەسى، فيلولوگيا عىلىمدارىنىڭ كانديداتى، اقىن، جازۋشى، دراماتۋرگ، اۋدارماشى، ادەبيەت زەرتتەۋشى، كينوستسەناريست، كينورەجيسسەر، «ەرەن ەڭبەگى ءۇشىن» مەدالىنىڭ يەگەرى، جەزقازعان قالاسىنىڭ قۇرمەتتى ازاماتى، حالىقارالىق، رەسپۋبليكالىق بىرنەشە ادەبي سىيلىقتاردىڭ يەگەرى، ءتۇرلى ادەبي كونكۋرستاردىڭ جەڭىمپازى احمەتوۆ كەنجەباي كارىبوزۇلىنىڭ 60 جاسقا تولۋىنا وراي اپتالىق ءوتتى.
جەزقازعان قالاسى اكىمدىگىنىڭ قولداۋىمەن، قالالىق مادەنيەت جانە تىلدەردى دامىتۋ ءبولىمىنىڭ ۇيىمداستىرۋىمەن وتكەن اپتالىق ك.احمەتوۆتىڭ «نەگە سولاي؟» ءفيلمىنىڭ كورسەتىلىمىمەن اشىلدى. تانىمال ءانشى، كومپوزيتور جاقسىكەلدى سەيىلوۆتىڭ بالالىق شاعى جايلى تۇسىرىلگەن فيلم كوپتىڭ كوزايىمى بولدى. 31 قازان كۇنى اپتالىق باعدالاماسىنا ەنگەن شارا م.اۋەزوۆ اتىنداعى قالالىق كىتاپحانادا جالعاستى. «كۇزگى ولەڭ، سىرلاسايىق سىزبەنەن...» اتتى جىر كەشى جوعارى دەڭگەيدە ءوتتى. ەسىمدەرى كوپكە تانىمال بولعان جەرگىلىكتى اقىندار مەن ولاردىڭ وكشەسىن باسىپ ولەڭ الەمىنە ەنگەن جاس اقىندار سىرلى، ويلى جىرلارىن وقىدى. ولەڭسۇيەر قاۋىم دارىندى جاستاردىڭ اياق الىسىنا ءتانتى بولدى. اپتالىقتىڭ ءۇشىنشى كۇنى كورەرمەندەر ك.احمەتوۆتىڭ «نازا» دەپ اتالاتىن تاعى ءبىر ءفيلمىن تاماشالادى. ءومىر اعىسى، جالعىزدىق تاۋقىمەتى، تىرشىلىك سىناعى جايلى ءوز پايىمداۋىن جاساعان اۆتوردىڭ ءتۇيىندى ويى كورەرمەندەرتى تولقىتتى. ايتا كەتەلىك، «نەگە سولاي؟»، «نازا» ءفيلمنىڭ ستسەناريىن جازعان دا كەنجەباي احمەتوۆ. اكتەرلاردىڭ دەنى - قاراپايىم ەڭبەك ادامدارى، مۇعالىمدەر، مەكتەپ وقۋشىلارى، ءانشى-ارتىستەر ت.ب. ءبىرلى-جارىمى عانا - تەاتر ارتىستەرى. اپتالىق اياسىندا قالا اكىمدىگىنىڭ قارجىلاي دەمەۋىمەن استاناداعى «كاۋسار» باسپاسىنان قالامگەر ك.احمەتوۆتىڭ «كۇپى» جىر جيناعى جانە «ايبوز» ەستەلىكتەر جيناعى (ك.احمەتوۆتىڭ ءومىرى مەن شىعارماشىلىعى جايلى)جارىق كوردى. قوس كىتاپتىڭ تۇساۋكەسەرى جەزقازعان تاريحي-ارحەولوگيالىق مۋزەيىندە ءوتتى. 3 قاراشا كۇنى س.قوجامقۇلوۆ اتىنداعى جەزقازعان مۋزىكالى-دراما تەاترىندا مەرەيتوي يەسى ك.احمەتوۆتىڭ «شىراق» تاريحي دراماسىنىڭ قويىلىمى بولدى (رەج. م.جانبوتاەۆ). كورەرمەندەر بۇل تۋىندىنى دا زور ريزاشىلىقپەن قابىلدادى. 4 قاراشا كۇنى حالىقتار دوستىعى مەن مادەنيەتى ۇيىندە وتكەن «قوڭىر كۇز. قوڭىر ولەڭ. قوڭىر الەم....» اتتى شىعارماشىلىق كەش – قالامگەر ك.احمەتوۆتىڭ 60 جاسقا تولۋىنا وراي ۇيىمداستىرىلعان اپتالىقتىڭ قورىتىندى شاراسى. شىعارماشىلىق كەشكە ايتىسكەر اقىن، قوعام قايرەتكەرى، عالىم، قر پارلامەنتى ءماجىلىسىنىڭ دەپۋتاتى ا.د.التاەۆ قاتىسىپ، مەرەيتوي يەسىنە ءماجىلىس توراعاسى ە.ج.قوشانوۆتىڭ قۇتتىقتاۋ حاتىن تاپسىردى. جەزقازعان، ساتباەۆ، قاراجال قالالارى، ۇلىتاۋ، جاڭاارقا اۋداندارى اكىمدىگىنىڭ، جەزقازعان ۋنيۆەرسيتەتى ۇجىمىنىڭ قۇتتىقتاۋلارى مەن اعايىن-تۋىس، دوس-جارانداردىڭ جىلى لەبىزدەرى ايتىلدى. شاكىرتتەرى اقىن كەنجەبايدىڭ ولەڭدەرىن وقىدى. قالامگەردىڭ ولەڭدەرىنە جازىلعان «ءومىر-اعىن»، «بەبەۋ جالعان»، «دوستارىم» اندەرى مەن ابايدىڭ «توتى قۇس ءتۇستى كوبەلەك» ولەڭىنە جازىلعان ك.احمەتوۆتىڭ ءانى ورىندالدى. كەشتى اقىن عازيز ەشتاناەۆ جۇرگىزدى. اپتالىق بارىسىندا كىتاپحانادا، مۋزەيدە، حالىقتار دوستىعى مەن مادەنيەتى ءۇيى فويەسىندە ۇيىمداستىرىلعان كورمەلەر دە مەرەيتوي يەسىنىڭ ءومىر مەن شىعارماشىلىعى، ونەر ءورىسى جايلى تارقاتىپ سىر شەرتتى. قىسقاسى، قالامگەر تويى دۇركىرەپ ءوتتى.
