ماسكەۋدە وتكەن كەلىسسوزدەردە رەسەي پرەزيدەنتى ۆلاديمير پۋتين تاجىك ارىپتەسى ەمومالي راحمونعا تاجىكستاندا ورىس ءتىلىنىڭ دامىپ جاتقانى ءۇشىن العىس ايتتى، دەپ حابارلايدى "ادىرنا" پورتالى.
21 قاراشادا راحمون رەسەيگە رەسمي ساپارمەن باردى. شەكتەۋلى قۇرامداعى كەلىسسوزدە پۋتين 2022 جىلى تاجىكستاندا رەسەيدىڭ قولداۋىمەن سالىنعان ورىس تىلىندە وقىتاتىن بەس مەكتەپ اشىلعانىن ەسكە سالدى.
«بيىل جانە ودان كەيىنگى جىلدارى رەسەي ۇكىمەتى بۇل مەكتەپتەرگە وقۋلىقتار ءۇشىن 200 ميلليون [رۋبل] بولەدى، مەن ولاردىڭ جەتكىلىكسىز ەكەنىن بىلەمىن، بىراق شەشىم قابىلداندى. بىزدە تاجىكستاننان كەلگەن ستۋدەنتتەر مەن اسپيرانتتار وقيدى. تمد ەلدەرى اراسىنداعى ەڭ ۇلكەن كۆوتا تاجىكستاندا – 900 ادام. ءبىز بۇل كۆوتانى 2024-2025 جىلدارعا 1000 ادامعا دەيىن ارتتىرىپ جاتىرمىز»، - دەدى پۋتين.
راحمون: «راحمەت»، - دەپ جاۋاپ بەردى.
«مەن سىزگە العىس ايتۋىم كەرەك، ويتكەنى مەن ءسىزدىڭ ورىس ءتىلىن دامىتۋعا جانە مادەنيەت سالاسىنداعى، جالپى گۋمانيتارلىق سالاداعى قارىم-قاتىناستارىمىزعا قانشالىقتى كوڭىل بولەتىنىڭىزدى بىلەمىن. ءبىر كەزدەرى ءسىز رەسپۋبليكادا تاجىكستاننىڭ دارىندى بالالارىن وقىتۋ جانە تاربيەلەۋ ورتالىعىن جانە ماياكوۆسكي اتىنداعى ورىس دراما تەاترىن قۇرۋ تۋرالى باستاما كوتەردىڭىز - بۇل ماقساتتارعا رەسەي فەدەراتسياسىنىڭ ۇكىمەتى ءتورت جانە 3,5 ملرد. رۋبل بولدى. سوندىقتان بۇل جوسپارلار جۇزەگە اسادى»، - دەپ كەلتىرەدى كرەمل.رۋ رەسەي پرەزيدەنتىنىڭ ءسوزىن.
ماسكەۋدەگى كەلىسسوزدەردە ەكى ەل اراسىنداعى ساۋدا-ەكونوميكالىق جانە گۋمانيتارلىق سالاداعى ىنتىماقتاستىقتىڭ جاي-كۇيى مەن دامۋ كەلەشەگى، رەسەي-تاجىكستان ستراتەگيالىق ارىپتەستىگىنىڭ باسقا دا نەگىزگى اسپەكتىلەرى تالقىلانادى دەپ جوسپارلانۋدا. پرەزيدەنتتەر وزەكتى ايماقتىق جانە حالىقارالىق ماسەلەلەر بويىنشا پىكىر الماسادى. كەلىسسوزدەر ناتيجەسىندە بىرقاتار ەكىجاقتى قۇجاتتارعا قول قويىلىپ، پرەزيدەنتتەر باق وكىلدەرىنە مالىمدەمە جاسايدى.
