الماتىدا «اتاكەنت» كورمە ورتالىعىندا «قازاق فوتوشەجىرەشىلەرى ءىىى: تاريح، دەرەك، ونەر» فوتوەنتسيكلوپەدياسىنىڭ تۇساۋكەسەرى ءوتتى، دەپ حابارلايدى «ادىرنا» ۇلتتىق پورتالى.
بۇل جيناق – بۇرىن جارىققا شىققان «قازاق فوتوشەجىرەشىلەرى» تىزبەكتى ەنتسيكلوپەدياسىنىڭ جالعاسى، ءۇشىنشى توم. بىراق بۇل جولعى ايىرماشىلىق كىتاپ قازاق، اعىلشىن جانە ورىس تىلدەرىندە شىققان. كىتاپ «دارىن» باسپاسىنان جارىق كورىپ وتىر. 407 بەتتىك كىتاپتىڭ تارالىمى – 500 دانا.
كىتاپتىڭ تۇساۋكەسەرى «ۇلى جىبەك جولىمەن» ءحى حالىقارالىق كىتاپ جانە پوليگرافيا جارمەڭكەسى اياسىندا وتكىزىلدى.
تۇساۋكەسەرگە قاتىسقاندار وسى ەنتسيكلوپەديادا جاريالانعان سۋرەتتەردىڭ كورمەسىن دە تاماشالادى.
ايتۋلى شاراعا كىتاپتىڭ قۇراستىرۋشىلارى «فوتوونەر» قوعامدىق بىرلەستىگىنىڭ توراعاسى اسىلحان ءابدىرايىمۇلى، ءال-فارابي اتىنداعى قازۇۋ-دىڭ اعا وقىتۋشىسى داۋرەن ماقسۇتحانۇلى باستاعان قازاقستاندىق فوتوگرافيا سالاسىنىڭ ماماندارى، فوتوگرافتار، فوتوونەر دۇنيەسىنىڭ جاناشىرلارى جانە كورمەگە كەلگەن كوپشىلىك قاتىستى.
فوتوەنتسيكلوپەديا قازاقتىڭ تۇڭعىش فوتوگرافى قازاقتىڭ ءبىرتۋار اقىنى، جاڭگىر حاننىڭ نەمەرەسى شاڭگەرەي بوكەەۆتىڭ تۇسىرگەن سۋرەتتەرىمەن باستالادى. شاڭگەرەي تۇسىرگەن فوتوسۋرەتتەردەن قازىر ون شاقتىسى بەلگىلى. شاڭگەرەي 1901 جىلى پەتەربورعا ساپارىنان كەيىن فوتوونەرمەن اينالىسقان.
فوتوەنتسيكلوپەديانىڭ وسى تومىندا شاڭگەرەيدەن باسقا بۇگىنگى فوتوگرافتار: قاليعۇمار قابدەشۇلى، سابىرجان قۇسايىنوۆ، ەسىمحان ورىنباەۆ، اسىلحان جۇسىپتەگى، فارحاد قابدىقايىروۆ، سەرىك مۇقىشۇلى، مارات جۇنىسبەكوۆ، وڭعاربەك الحاروۆ، جەڭىس ىسقاباي، تىلەۋبەك شاياحمەت، ەرلان وماروۆ، دۋمان قۇرمانعاليەۆ، باۋىرجان جۋاسباەۆ، ماقسات شاعىرباي، ايگەرىم بەگىمبەت، دوسجان بالابەكۇلى جانە مەيىربەك تاجكۋرانوۆتىڭ ۇزدىك تۋىندىلارى جاريالانعان.
كىتاپتىڭ ەكىنشى تاراۋى «فوتوونەر جانە عىلىم» دەپ اتالسا، ءۇشىنشى تاراۋى «فوتوونەر» قوعامدىق بىرلەستىگىنىڭ جوبالارىنا ارنالعان.
كىتاپ تۇساۋكەسەرىندە ارداگەر ءفوتوتىلشى قاليعۇمار قابدەشۇلى، شاڭگەرەي بوكەەۆتىڭ ۇرپاعى شولپاناي امانجولوۆا، ءال-فارابي اتىنداعى قازۇۋ-دەگى جۋرناليستيكا فاكۋلتەتىنىڭ كافەدرا مەڭگەرۋشىسى ايگۇل رامازانوۆا جانە كىتاپ پالاتاسىنىڭ ديرەكتورى ءادىل قويتانوۆ سويلەپ، قازاقستان قوعامىندا باعالانباي كەلە جاتقان وسى سالانىڭ شەبەرلەرىنە ساتتىلىك تىلەدى.
شارا بارىسىندا «فوتوونەر» بىرلەستىگى فوتوەنتسيكلوپەديانىڭ دەمەۋشىلەرى مەن ونىڭ جارىققا شىعۋىنا ەلەۋلى ۇلەس قوسقان مامانداردى ارنايى گراموتا، العىس-حاتتارمەن ماراپاتتادى.
