2023 جىلدىڭ سوڭىنا دەيىن الماتى قالاسىنىڭ يندۋستريالىق ايماعىندا جالپى سوماسى 8 ملرد تەڭگەگە 6 جوبانى جۇزەگە اسىرىپ، 400-گە جۋىق جۇمىس ورنىن اشۋ جوسپارلانىپ وتىر، دەپ حابارلايدى «ادىرنا» ءتىلشىسى.
الماتى قالاسى كاسىپكەرلىك جانە ينۆەستيتسيالار باسقارماسىنىڭ دەرەگىنشە، بۇگىندە 29 ينۆەستيتسيالىق جوبا بويىنشا قۇرىلىس قىزۋ ءجۇرىپ جاتىر.
الماتىنىڭ يندۋستريالىق ايماعى – ءىرى ونەركاسىپتىك جانە وندىرىستىك بيزنەس جوبالارعا ارنالعان اۋماق. مۇندا 88 كومپانيا ورنالاسقان، 11 مىڭ جۇمىس ورنى اشىلعان.
ايتا كەتەيىك، «الماتى يندۋستريالىق ايماعى» جشس قاتىسۋشىلارىنا بيزنەستى مەملەكەتتىك قولداۋ اياسىندا ينۆەستيتسيالىق جوبانى ساتىپ الۋ جانە اۋكتسيوننان ءوتۋ قاجەتتىلىگىنسىز ونى ىسكە اسىرۋعا جەر ۋچاسكەسىن الۋعا مۇمكىندىك قاراستىرىلعان. سونىمەن قاتار، 2068 جىلعا دەيىن جەر ۋچاسكەسىنىڭ ۇزاق مەرزىمدى قوسالقى جالداۋىن نەمەسە ونى كاداسترلىق قۇنى بويىنشا ساتىپ الۋدى رەسىمدەۋگە بولادى.
بۇل رەتتە، ينۆەستور ينفراقۇرىلىمدى سالۋ شىعىندارىن ازايتۋ سىندى باسىمدىققا يە بولادى. 2068 جىلعا دەيىن الماتى يندۋستريالىق ايماعىنىڭ جۇمىس ىستەۋ مەرزىمىنە بايلانىستى جەر ۋچاسكەسىن جالعا الا الادى. جانە دە يندۋستريالىق ايماق اۋماعىندا دايىن ينفراقۇرىلىمعا قولجەتكىزە الادى. ياعني، كاسىپكەردىڭ جۇمىسىنىڭ العا باسۋى ءۇشىن گازبەن جابدىقتاۋ، سۋمەن جابدىقتاۋ جانە سۋمەن قامتۋ، ەلەكترمەن جابدىقتاۋ، نوسەر كارىزى، تج ستانتسياسى جانە تج ءجۇرىس جولدارى، تالشىقتى-وپتيكالىق بايلانىس جەلىلەرى سىندىق قاجەتتىينفراقۇرىلىم دايىن كۇيىندە تۇرادى. ەڭ باستىسى، حالقى تىعىز ورنالاسقان مەگاپوليستە ءوز ونىمدەرىن نارىققا قينالماي وتكىزۋگە جول تابادى.
سونىمەن قاتار، «Almaty Business 2025» بىرىڭعاي وڭىرلىك باعدارلاماسى اياسىندا الماتى يندۋستريالىق ايماعىنىڭ ينۆەستورى ينۆەستيتسيالىق جوبالاردى جۇزەگە اسىرۋعا دەيىن سۇيەمەلدەۋ، رۇقسات قۇجاتتارىن الۋ جانە بانكتەردە قارىزدار بويىنشا كەڭەس الۋ تۇرىندەگى مەملەكەتتىك جاردەم الادى.
بيىل قازان ايىندا الماتى يندۋستريالىق ايماعىنىڭ وندىرىستىك كەشەندەرى ءۇشىن ماماندار دايارلايتىن يننوۆاتسيالىق تەحنيكالىق كوللەدجدىڭ قۇرىلىسىنا بولىنگەن اۋماقتا جۇمىستار باستالدى.
بۇل الماتى يندۋستريالىق ايماعىنداعى جالپى قۇنى 9 ملرد تەڭگە بولاتىن باسىم جوبالاردىڭ ءبىرى.
