بۇگىن، 2023 جىلعى 16 جەلتوقساندا «بايقوڭىر» عارىش ايلاعىنىڭ 31-ءشى الاڭىنان رەسەيلىك «اركتيكا-م» №2 جەرسەرىگى ۇشىرىلدى. ۇشىرۋ بەلگىلەنگەن ۋاقىتتا، استانا ۋاقىتى بويىنشا 15:17:48-دە ورىندالدى، دەپ حابارلايدى «ادىرنا» ۇلتتىق پورتالى.
ءداستۇر بويىنشا، بايقوڭىردان ۇشىرۋ روسكوسموستىڭ تەلەستۋدياسى تىكەلەي ەفيرىندە كورسەتىلدى. حابارلاماعا سايكەس، زىمىران تاسىعىشتىڭ بولىكتەرىن ءبولۋ جانە «فرەگات» جوعارعى ساتىسى مەن «اركتيكا» عارىش اپپاراتىن تاسىمالداۋ وربيتاسىنا شىعارۋ شتاتتىق رەجيمدە ءوتتى.
2021 جىلعى اقپاندا بايقوڭىر عارىش ايلاعىنان ۇشىرىلعان ءبىرىنشى وسىنداي اپپارات - «اركتيكا م» №1-مەن بىرلەسىپ، «اركتيكا-م» ەكىنشى سپۋتنيگى سولتۇستىك مۇزدى مۇحيتتىڭ جەر بەتى مەن تەڭىزدەرىنىڭ تاۋلىك بويى اۋا-رايىنىڭ مونيتورينگىن، سونداي-اق تۇراقتى جانە سەنىمدى بايلانىسىن قامتاماسىز ەتەدى.
وسى ۇشىرۋ ارقىلى روسكوسموس بايقوڭىر عارىش ايلاعىنان اعىمداعى جىلدىڭ ۇشىرۋ باعدارلاماسىن اياقتادى. 2023 جىلى حالىقارالىق عارىش ستانتسياسى مەن كوممەرتسيالىق ۇشىرۋ باعدارلاماسى بويىنشا بايقوڭىردان بارلىعى 9 ۇشىرۋ جۇزەگە اسىرىلدى.
«ادىرنا» ۇلتتىق پورتالى
