تۋريزم جانە سپورت ءمينيسترى ەرمەك مارجىقپاەۆ الماتى قالاسىنىڭ تۇرعىندارىمەن ەسەپ بەرۋ كەزدەسۋىن وتكىزدى. جيىنعا قالا تۇرعىندارى، قوعام بەلسەندىلەرى، باق، جەرگىلىكتى سپورت فەدەراتسيالارى مەن تۋربيزنەس وكىلدەرى، قالانىڭ اتاقتى سپورتشىلارى جانە باسقا دا سالا ماماندارى قاتىستى.
كەزدەسۋدى ەرمەك مارجىقپاەۆ مينيسترلىكتىڭ قازىرگى قىزمەتى، تۋريزم جانە سپورت سالاسىنداعى رەفورمالار، لۋدومانياعا قارسى كۇرەس شارالارى جانە ۆەدومستۆونىڭ الداعى جوسپارلارى تۋرالى باياندامادان باستادى.
بيىل الماتىداعى الاتاۋ، زەردەلى جانە جاس قانات ىقشام اۋداندارىندا 3 دەنە شىنىقتىرۋ-ساۋىقتىرۋ كەشەنىنىڭ قۇرىلىسى اياقتالدى. سونداي-اق اقجار، شۇعىلا، سايالى ىقشام اۋداندارىندا جانە اۆياتور ستاديونىندا تاعى 4 دەنە شىنىقتىرۋ-ساۋىقتىرۋ كەشەنىنىڭ، نۇركەنت ىقشام اۋدانىندا 5000 ورىندىق جەڭىل اتلەتيكا مانەجىنىڭ جوبالاۋ-سمەتالىق قۇجاتتاماسىن ازىرلەۋ باستالدى. سونىمەن قاتار ورتالىق ستاديون جانە بيىك تاۋلى «مەدەۋ» سپورت كەشەنى جاڭعىرتىلادى. جالپى بولاشاقتا 2025 جىلعا دەيىن 9 دەنە شىنىقتىرۋ-ساۋىقتىرۋ كەشەنىن، 3 مۇز ايدىنىن، جەڭىل اتلەتيكا مانەجىن جانە گيمناستيكاعا ارنالعان مانەج سالۋ جوسپارلانعان. وسى شارالاردىڭ بارلىعى سپورت الاڭدارىن 100 مىڭ شارشى مەترگە دەيىن ۇلعايتۋعا جانە تاۋلىگىنە 10 مىڭ ادامعا دەيىن قامتۋعا مۇمكىندىك بەرەدى.
مەملەكەت باسشىسىنىڭ تاپسىرماسىنا سايكەس وسكەلەڭ ۇرپاقتىڭ سپورتتىق الەۋەتىن دامىتۋعا باسىمدىق بەرىلەدى. وسىعان بايلانىستى مينيسترلىك مەملەكەتتىڭ سپورتتىق تاپسىرىسىن ىسكە اسىرۋ بويىنشا جۇمىستى جالعاستىرىپ جاتىر. الماتى قالاسىندا 31 مىڭعا جۋىق بالا مەن ءجاسوسپىرىم تەگىن سپورت سەكتسيالارىمەن قامتاماسىز ەتىلگەن.
«الماتى – دۇنيەجۇزىلىك دودالاردا ەل مەرەيىن اسىرعان داڭقتى سپورتشىلار مەكەنى. باقىت سارسەكباەۆ، الەكساندر پارىگين، باقتيار يبراەۆ، ولگا شيشيگينا، دەنيس تەن، دميتري بالاندين، جانسايا ابدىمالىك جانە «قايرات» فۋتزال كلۋبىنىڭ سپورتشىلارىن اتاپ وتۋگە بولادى. جالپى العاندا، الماتى قالاسى سپورتشىلارىنىڭ الەۋەتى زور. قازىرگى تاڭدا ۇلتتىق قۇرامادا 1 200-گە جۋىق الماتىلىق سپورتشى بار. بۇل – نەگىزگى قۇرامنىڭ باسىم بولىگىن قۇرايدى. سايكەسىنشە ەلىمىزدىڭ تاۋەلسىزدىك جىلدارىندا الماتى وليمپياداعا قاتىسقان 56 سپورتشىنى دايىنداپ شىعارعان. سونىمەن قاتار بيىلعى رەسپۋبليكالىق جازعى سپارتاكيادادا الماتى قالاسى جالپىكوماندالىق ەسەپتە 1-ورىنعا يە بولدى. كوماندا قورجىنىندا 84 التىن، 71 كۇمىس، 74 قولا بار. قىتايداعى ازيا ويىندارىندا الماتى قالاسىنىڭ سپورتشىلارى 1 التىن، 3 كۇمىس جانە 9 قولا جۇلدە جەڭىپ الدى»، - دەدى ەرمەك مارجىقپاەۆ.
الماتى – جەرگىلىكتى تۋريستەر ءۇشىن عانا ەمەس، شەتەلدىك قوناقتار ءۇشىن دە ەلىمىزدەگى ەڭ تانىمال تۋريستىك قالالاردىڭ ءبىرى. وسىعان بايلانىستى تۋريزم جانە سپورت مينيسترلىگى اۋە قاتىناسىنىڭ گەوگرافياسىن كەڭەيتىپ جاتىر. جاڭا رەيستەردى ىسكە قوسۋ بويىنشا جۇمىستار جۇرگىزىلۋدە. مىسالى، 2024 جىلدىڭ ناۋرىز ايىنان باستاپ «Air Asia» اۋە كومپانياسى كۋالا-لۋمپۋر مەن الماتى اراسىندا اپتاسىنا 4 رەيس جيىلىگىمەن، سونداي-اق الماتى-دجيددا باعىتىندا 2 رەت جيىلىكپەن تىكەلەي تۇراقتى جولاۋشىلار رەيسىن ىسكە قوسۋعا نيەتتى.
«ءبىز ەلىمىزدىڭ قولدا بار وراسان زور تۋريستىك مۇمكىندىگىن تولىق پايدالانۋىمىز كەرەك. بۇگىندە قازاق ءتۋريزمىنىڭ كۇرەتامىرىنا اينالعان الماتى شاھارى تۋريستەر ءۇشىن ەڭ تارتىمدى ايماقتاردىڭ ءبىرى. ءبىز ينفراقۇرىلىمدى دامىتۋدى جانە وسى سالاداعى كاسىپكەرلەرگە مەملەكەتتىك قولداۋدىڭ بارلىق مۇمكىن شارالارىن كورسەتۋدى جالعاستىرامىز. جىل قورىتىندىسى بويىنشا وسى شارالاردى ىسكە اسىرۋدا وڭ وزگەرىس بايقالادى. ەلىمىز بويىنشا كاسىپكەرلەردىڭ 800 ملن تەڭگەدەن استام سوماعا (تۋريستىك نىساندار، جول بويىنداعى قىزمەت كورسەتۋ نىساندارىن سالۋعا، تاۋ شاڭعىسى كۋرورتتارىنا ارنالعان تەحنيكا، تۋراۆتوبۋستار ساتىپ الۋعا) وتىنىمدەرى ماقۇلداندى. بۇل – وتكەن جىلمەن سالىستىرعاندا 7 ەسە كوپ»، - دەپ اتاپ ءوتتى ەرمەك مارجىقپاەۆ.
الماتىدا 2023 جىلى «Qazaq Auyl» (قازاق اۋىلى) مەيرامحانا كەشەنى (16 ءۇي), «Grand Mildom» قوناق ءۇيى (72 بولمە) جانە «Medeu camp» بالالار لاگەرى بار ەكو-قوناق ءۇي قۇرىلىسى اياقتالدى. 6 نىساننىڭ قۇرىلىسى جۇرگىزىلىپ جاتىر: «Parkside Living» اپارت-قوناق ءۇيى، «Medeu Park Hotel» قوناق ءۇي كەشەنى، «كيماسار» قوناق ءۇيى. تۇركسىب اۋدانىنىڭ قالداياقوۆ كوشەسىندەگى 3 قوناق ءۇيدىڭ جانە «Park Dedeman Almaty» قوناق ءۇيىنىڭ قۇرىلىسى 2024 جىلى اياقتالادى دەپ جوسپارلانعان.
ەسەپ بەرۋ كەزدەسۋىنەن كەيىن مينيستر جەكە قابىلداۋ وتكىزدى. وندا ازاماتتاردىڭ سۇراقتارىنا جاۋاپ بەرىپ، ماسەلەلەرى مەن ۇسىنىستارىن تىڭدادى.
قر تسم ءباسپاسوز قىزمەتى
