الماتىدا قالا اكىمى دارحان ساتىبالدىنىڭ قاتىسۋىمەن قازاقستان رەسپۋبليكاسىنىڭ جاڭا كونستيتۋتسياسىنىڭ كۇشىنە ەنۋىنە ارنالعان «جاڭا كونستيتۋتسيا – جاڭا سەرپىن» اتتى دوڭگەلەك ۇستەل ءوتتى. ءىس-شاراعا عىلىمي جانە ساراپشىلىق قاۋىمداستىق وكىلدەرى، شىعارماشىلىق زيالى قاۋىم، ءماسليحات دەپۋتاتتارى، قوعامدىق كەڭەس مۇشەلەرى، ارداگەرلەر ۇيىمدارىنىڭ جانە مەملەكەتتىك ورگانداردىڭ وكىلدەرى قاتىستى.
جيىندى اشقان دارحان ساتىبالدى جاڭارتىلعان اتا زاڭنىڭ كۇشىنە ەنۋى قازاقستاننىڭ زاڭ ۇستەمدىگىنە، ادىلەتتىلىككە، اشىق مەملەكەتتىك باسقارۋعا جانە جوعارى ازاماتتىق جاۋاپكەرشىلىككە نەگىزدەلگەن جاڭا دامۋ كەزەڭىنە قادام باسقانىن بىلدىرەتىنىن ايتتى.
قالا اكىمىنىڭ ايتۋىنشا، جاڭا كونستيتۋتسيا قۇقىقتىق نورمالاردى بەكىتىپ قانا قويماي، ادام قۇقىعى مەن بوستاندىعىن قورعاۋ، ءتيىمدى مەملەكەتتىك باسقارۋ قالىپتاستىرۋ جانە قوعامدىق جاۋاپكەرشىلىكتى باستى قۇندىلىق رەتىندە ايقىندايتىن مەملەكەتتىڭ جاڭا دامۋ تۇجىرىمداماسىن قالىپتاستىرادى.
«مەملەكەت باسشىسى قاسىم-جومارت كەمەلۇلى توقاەۆ اتاپ وتكەندەي، جاڭا كونستيتۋتسيا ەلىمىزدىڭ ۇزاق مەرزىمدى دامۋىنىڭ بەرىك قۇقىقتىق نەگىزىن قالىپتاستىرىپ، جاڭا قوعامدىق كەلىسىمنىڭ وزەگىنە اينالادى. سوندىقتان ونىڭ بۇگىن زاڭدى كۇشىنە ەنۋى – ادىلەتتى جانە پروگرەسسيۆتى قازاقستاندى قۇرۋ جولىنداعى رەفورمالاردىڭ جاڭا كەزەڭگە وتكەنىنىڭ ايقىن كورىنىسى»، – دەدى دارحان ساتىبالدى.
اكىم قازاقستاننىڭ ەڭ ءىرى قالاسى، عىلىم، ءبىلىم، يننوۆاتسيا، مادەنيەت جانە ەكونوميكا ورتالىعى سانالاتىن الماتىعا كونستيتۋتسيالىق قاعيداتتاردى ءىس جۇزىندە جۇزەگە اسىرۋدا ەرەكشە جاۋاپكەرشىلىك جۇكتەلەتىنىن جەتكىزدى. ونىڭ ايتۋىنشا، الماتىنى 2030 جىلعا دەيىن دامىتۋ ستراتەگياسى جاڭا كونستيتۋتسيانىڭ نەگىزگى قاعيدالارىمەن ۇندەسىپ، جايلى، قاۋىپسىز، ەكولوگيالىق تازا ءارى باسەكەگە قابىلەتتى مەگاپوليس قالىپتاستىرۋعا باعىتتالعان.
دارحان ساتىبالدى زاماناۋي كولىك ينفراقۇرىلىمىن دامىتۋ، قالانى پوليتسەنترلىك مودەل بويىنشا وركەندەتۋ، تسيفرلاندىرۋ، Almaty AI Park جوباسىن قۇرۋ، Smart City تەحنولوگياسىن ەنگىزۋ، ەكولوگيالىق جاڭعىرتۋ، قوعامدىق كەڭىستىكتەردى دامىتۋ جانە «تازا قازاقستان» باستاماسىن ىسكە اسىرۋ تۇرعىنداردىڭ ءومىر ساپاسىن ارتتىرۋعا باعىتتالعان كونستيتۋتسيالىق قاعيداتتاردىڭ ناقتى كورىنىسى ەكەنىن اتاپ ءوتتى.
دوڭگەلەك ۇستەل بارىسىندا قاتىسۋشىلار جاڭا كونستيتۋتسيا قاعيداتتارىن مەملەكەتتىك باسقارۋ جۇيەسىندە ءتيىمدى ىسكە اسىرۋ، قۇقىقتىق مادەنيەتتى نىعايتۋ، ازاماتتىق جاۋاپكەرشىلىكتى ارتتىرۋ، سونداي-اق ەلدىڭ ودان ءارى دامۋىنا عىلىمي جانە ساراپشىلىق قاۋىمداستىقتىڭ قوسار ۇلەسى جونىندە پىكىر الماستى.
كەزدەسۋ سوڭىندا قاتىسۋشىلار جاڭا كونستيتۋتسيا قازاقستاننىڭ ورنىقتى دامۋىنا، قوعامدىق كەلىسىم مەن زاڭ ۇستەمدىگىن نىعايتۋعا، سونىمەن بىرگە ادىلەتتى، اشىق ءارى ءتيىمدى مەملەكەت قالىپتاستىرۋعا بەرىك قۇقىقتىق نەگىز بولاتىنىن ەرەكشە اتاپ ءوتتى.
