«جەلتوقسان» ساياباعىندا تۇركسىب اۋدانى اكىمدىگى، «الماتىباسجوسپار» جانە «Almaty Invest» جشس وكىلدەرى جەرگىلىكتى تۇرعىندارمەن كەزدەستى. جيىن بارىسىندا قاتىسۋشىلارعا شىعىس شىعاناعى دەپ تە اتالاتىن اۋەجاي كولىنىڭ اينالاسىنداعى اۋماقتى كوركەيتۋ جوسپارى تانىستىرىلدى.
«الماتىباسجوسپار» كومپانياسىنىڭ باس وپەراتسيالىق ديرەكتورى امانگەلدى ساتتاروۆ قالا تۇرعىندارىنا جوبانىڭ كورنەكى ماتەريالدارىن كورسەتىپ، جوسپارلانعان وزگەرىستەر تۋرالى ايتىپ بەردى. اتاپ ايتقاندا، كول جاعالاۋىن كوركەيتۋ، جۇرگىنشىلەر جولدارىن سالۋ، جارىقتاندىرۋ جۇيەسىن ورناتۋ جانە دەمالىس ايماقتارىن ۇيىمداستىرۋ كوزدەلىپ وتىر.
ونىڭ ايتۋىنشا، اۋماقتىڭ قاۋىپسىزدىگىنە ەرەكشە كوڭىل بولىنگەن. قازىر مۇندا جۇرگىنشىلەرگە ارنالعان ىڭعايلى وتكەلدەر مەن جارىقتاندىرۋ جۇيەسى جوق. ال كەيبىر تۇستارداعى جاردىڭ بيىكتىگى جەتى مەترگە دەيىن جەتەدى.
«شىعىس شىعاناعىنىڭ باس جوسپارىن قاراستىرعاندا، كوركەيتۋدى قاجەت ەتەتىن تابيعي جەر بەدەرىن كورۋگە بولادى. مۇندا جۇرگىنشىلەرگە ارنالعان ىڭعايلى وتكەلدەر جوق، جارىقتاندىرۋ قاراستىرىلماعان. سونىمەن قاتار كەي جەرلەردەگى جاردىڭ بيىكتىگى جەتى مەترگە دەيىن جەتەدى. بۇل ماڭايدا ويناپ جۇرگەن بالالار مەن جاسى ۇلكەن جۇرگىنشىلەر ءۇشىن قاۋىپتى»، – دەدى امانگەلدى ساتتاروۆ.
بۇقتىرما كوشەسى جاعىنان اۆتوتۇراق سالۋ جانە ءورت ءسوندىرۋ دەپوسىن ورنالاستىرۋ مۇمكىندىگى قاراستىرىلىپ جاتىر. سونداي-اق ىرگەلەس اۋماقتى دامىتۋ ءۇشىن ينۆەستورلاردى تارتۋ جوسپارلانعان.
الداعى ۋاقىتتا بۇل جەردە سەرۋەندەۋگە، وتباسىمەن دەمالۋعا جانە ءتۇرلى ءىس-شارالار وتكىزۋگە ارنالعان قوعامدىق كەڭىستىك قۇرۋ كوزدەلىپ وتىر.
كەزدەسۋ بارىسىندا تۇرعىندار الماتى اۋەجايى ماڭىنداعى اۋماقتى دامىتۋعا قاتىستى جوسپارمەن تانىستى.
