«Jeltoqsan» saiabaǧynda Türksıb audany äkımdıgı, «Almatybasjospar» jäne «Almaty Invest» JŞS ökılderı jergılıktı tūrǧyndarmen kezdestı. Jiyn barysynda qatysuşylarǧa Şyǧys şyǧanaǧy dep te atalatyn Äuejai kölınıŋ ainalasyndaǧy aumaqty körkeitu jospary tanystyryldy.
«Almatybasjospar» kompaniiasynyŋ bas operasiialyq direktory Amangeldı Sattarov qala tūrǧyndaryna jobanyŋ körnekı materialdaryn körsetıp, josparlanǧan özgerıster turaly aityp berdı. Atap aitqanda, köl jaǧalauyn körkeitu, jürgınşıler joldaryn salu, jaryqtandyru jüiesın ornatu jäne demalys aimaqtaryn ūiymdastyru közdelıp otyr.
Onyŋ aituynşa, aumaqtyŋ qauıpsızdıgıne erekşe köŋıl bölıngen. Qazır mūnda jürgınşılerge arnalǧan yŋǧaily ötkelder men jaryqtandyru jüiesı joq. Al keibır tūstardaǧy jardyŋ biıktıgı jetı metrge deiın jetedı.
«Şyǧys şyǧanaǧynyŋ bas josparyn qarastyrǧanda, körkeitudı qajet etetın tabiǧi jer bederın köruge bolady. Mūnda jürgınşılerge arnalǧan yŋǧaily ötkelder joq, jaryqtandyru qarastyrylmaǧan. Sonymen qatar kei jerlerdegı jardyŋ biıktıgı jetı metrge deiın jetedı. Būl maŋaida oinap jürgen balalar men jasy ülken jürgınşıler üşın qauıptı», – dedı Amangeldı Sattarov.
Būqtyrma köşesı jaǧynan avtotūraq salu jäne ört söndıru deposyn ornalastyru mümkındıgı qarastyrylyp jatyr. Sondai-aq ırgeles aumaqty damytu üşın investorlardy tartu josparlanǧan.
Aldaǧy uaqytta būl jerde seruendeuge, otbasymen demaluǧa jäne türlı ıs-şaralar ötkızuge arnalǧan qoǧamdyq keŋıstık qūru közdelıp otyr.
Kezdesu barysynda tūrǧyndar Almaty äuejaiy maŋyndaǧy aumaqty damytuǧa qatysty josparmen tanysty.
