الماتىداعى كومىرمەن جۇمىس ىستەيتىن جىلۋ ەلەكتر ورتالىقتارىن گازعا كوشىرۋ جۇمىستارى جالعاسىپ جاتىر، دەپ حابارلايدى "ادىرنا" ۇلتتىق پورتالى Tengrinews.kz-كە سىلتەپ.
جوبالار بىرنەشە جىلدان بەرى ىسكە اسىرىلىپ كەلەدى، الايدا ناقتى ناتيجەلەر تەك 2026 جىلى كۇتىلەدى.
الماتى قالاسىنىڭ ەنەرگەتيكا جانە سۋمەن جابدىقتاۋ باسقارماسىنىڭ مالىمەتىنشە، جەو-3-ءتى (تەتس) قايتا جاڭعىرتۋ جۇمىستارى 2023 جىلدىڭ قىركۇيەگىندە باستالعان. باس مەردىگەر – بىرنەشە كومپانيادان قۇرالعان EPC-كونسورتسيۋم. قازىرگى تاڭدا ينجەنەرلىك-ىزدەستىرۋ، بۇرعىلاۋ، قولدانىستاعى عيماراتتاردى ءىشىنارا بۇزۋ، قۇرىلىس الاڭىن دايىنداۋ جانە ۋاقىتشا ەلەكترمەن جابدىقتاۋ جۇمىستارى اتقارىلعان.
جوسپارعا سايكەس، جەو-3 2026 جىلدىڭ جەلتوقسانىندا پايدالانۋعا بەرىلۋى ءتيىس.
جەو-2-ءنى گازعا كوشىرۋ جوباسىن قىتاي كومپانيالارىنىڭ كونسورتسيۋمى جۇزەگە اسىرىپ جاتىر. قوسالقى ينفراقۇرىلىم بويىنشا دايىندىق جۇمىستارى اياقتالعان. قازىر قۇرىلىس-مونتاج جۇمىستارى ءجۇرىپ جاتىر. گاز تۋربينالارى مەن گەنەراتورلارىنىڭ ەكى جيىنتىعى جەتكىزىلگەن، ءۇشىنشىسى جەتكىزۋ ساتىسىندا. سونىمەن قاتار، ءتورت سۋ جىلىتۋ قازاندىعىن مونتاجداۋ جۇرگىزىلۋدە.
جوبا 2022–2026 جىلدارعا جوسپارلانعان. 2025 جىلدىڭ قازان ايىندا جوبالىق قۇجاتتاما مەملەكەتتىك ساراپتامادان وڭ قورىتىندى العان. الدىن الا اقپارات بويىنشا، العاشقى گاز تۋربيناسىن ىسكە قوسۋ 2026 جىلدىڭ ءتورتىنشى توقسانىنا جوسپارلانىپ وتىر.
«قازگيدرومەت» دەرەگىنشە، 2025 جىلدىڭ جەلتوقسانىندا الماتىدا اتموسفەرالىق اۋانىڭ لاستانۋ دەڭگەيى جوعارى دەپ باعالانعان. قالادا اۋا ساپاسى 16 ستاتسيونارلىق باقىلاۋ بەكەتىندە باقىلانادى.
جەو-لاردى گازعا كوشىرۋ الماتىداعى اۋا ساپاسىن جاقسارتۋعا باعىتتالعان نەگىزگى جوبالاردىڭ ءبىرى بولىپ وتىر.
