فوتو: gabdimanap_t
الماتىدا شوقان ۋاليحانوۆقا ارنالعان باننەر ءىلىنىپ، وندا قازاق تىلىندەگى بىرقاتار قاتەلەر انىقتالدى. بۇل الەۋمەتتىك جەلىلەردە قىزۋ تالقىلانىپ، قوعام نازارىن اۋدارتتى. اتالعان باننەردى مەدەۋ اۋدانىندا نازارباەۆ كوشەسىمەن ءوتىپ بارا جاتقان Threads قولدانۋشىسى gabdimanap_t بايقاعان، دەپ حابارلايدى "ادىرنا".
قولدانۋشىنىڭ ايتۋىنشا، قالا ورتالىعىندا مۇنداي قاتەلىكتەردىڭ كەتۋى جاۋاپتى ورگانداردىڭ جۇمىس ساپاسىنا قاتىستى سۇراق تۋدىرادى.
«قالا ورتالىعىندا وسىنداي قاتە جىبەرىلگەنى ءۇشىن اكىمدىككە سۇراق بار. دەمەك، ونى ىلگەن دە، رۇقسات بەرگەن دە قازاق ەمەس پە؟ الدە ورتالىقتا كەز كەلگەن ءماتىندى تەكسەرە بەرمەي ىلە بەرەمىز بە؟» – دەپ جازدى ول.
جەلى قولدانۋشىلارى باننەردەگى ءماتىن قاتەلەرىنە عانا ەمەس، ۆيزۋالدى بولىگىنە دە نازار اۋداردى. كەي پىكىرلەردە شوقان ءۋاليحانوۆ بەينەسىندەگى باس كيىم تاريحي شىندىققا سايكەس كەلمەيتىنى ايتىلدى.
«وعان كيگىزىلگەن باس كيىم قاي ۇلتتىكى؟ قازاقتار ونداي كيمەگەن. بۇل ۇلكەن داۋ، بۇعان ايىپپۇل سالۋ كەرەك»، – دەپ جازدى قولدانۋشىلاردىڭ ءبىرى.
تاعى ءبىر توپ پىكىر قالدىرۋشىلار مۇنداي ماتەريالدار جاساندى ينتەللەكت كومەگىمەن دايىندالىپ، كەيىن مۇقيات تەكسەرىلمەي جاريالانعان بولۋى مۇمكىن دەگەن بولجام ايتتى.
«ەگەر جي ارقىلى جاسالسا، قازاق تىلىندە قاتە كەتۋى قالىپتى جاعداي، بىراق ونى باسىپ شىعارار الدىندا تەكسەرۋ كەرەك ەدى»، – دەدى تاعى ءبىر قولدانۋشى.
كەيبىر جەلى قولدانۋشىلارى جاۋاپتىلاردى جازالاپ، ءتىپتى قىزمەتىنەن بوساتۋدى تالاپ ەتتى.
ايتا كەتەيىك، بۇعان دەيىن الماتىدا Bi Group جارنامالىق باننەرى دە نومىرلىك بەلگىگە بايلانىستى قوعامدا تالقىلانعان بولاتىن. ول كەزدە كومپانيا ديزاين جانە باسىپ شىعارۋ كەزەڭىندە تەحنيكالىق قاتە كەتكەنىن مالىمدەگەن.
