Foto: gabdimanap_t
Almatyda Şoqan Uälihanovqa arnalǧan banner ılınıp, onda qazaq tılındegı bırqatar qateler anyqtaldy. Būl äleumettık jelılerde qyzu talqylanyp, qoǧam nazaryn audartty. Atalǧan bannerdı Medeu audanynda Nazarbaev köşesımen ötıp bara jatqan Threads qoldanuşysy gabdimanap_t baiqaǧan, dep habarlaidy "Adyrna".
Qoldanuşynyŋ aituynşa, qala ortalyǧynda mūndai qatelıkterdıŋ ketuı jauapty organdardyŋ jūmys sapasyna qatysty sūraq tudyrady.
«Qala ortalyǧynda osyndai qate jıberılgenı üşın äkımdıkke sūraq bar. Demek, ony ılgen de, rūqsat bergen de qazaq emes pe? Älde ortalyqta kez kelgen mätındı teksere bermei ıle beremız be?» – dep jazdy ol.
Jelı qoldanuşylary bannerdegı mätın qatelerıne ǧana emes, vizualdy bölıgıne de nazar audardy. Kei pıkırlerde Şoqan Uälihanov beinesındegı bas kiım tarihi şyndyqqa säikes kelmeitını aityldy.
«Oǧan kigızılgen bas kiım qai ūlttıkı? Qazaqtar ondai kimegen. Būl ülken dau, būǧan aiyppūl salu kerek», – dep jazdy qoldanuşylardyŋ bırı.
Taǧy bır top pıkır qaldyruşylar mūndai materialdar jasandy intellekt kömegımen daiyndalyp, keiın mūqiiat tekserılmei jariialanǧan boluy mümkın degen boljam aitty.
«Eger Jİ arqyly jasalsa, qazaq tılınde qate ketuı qalypty jaǧdai, bıraq ony basyp şyǧarar aldynda tekseru kerek edı», – dedı taǧy bır qoldanuşy.
Keibır jelı qoldanuşylary jauaptylardy jazalap, tıptı qyzmetınen bosatudy talap ettı.
Aita keteiık, būǧan deiın Almatyda Bi Group jarnamalyq bannerı de nömırlık belgıge bailanysty qoǧamda talqylanǧan bolatyn. Ol kezde kompaniia dizain jäne basyp şyǧaru kezeŋınde tehnikalyq qate ketkenın mälımdegen.
