عىلىم جانە جوعارى ءبىلىم ءمينيسترى ساياسات نۇربەك «Almaty Hostel»-دەگى ورتكە قاتىستى پىكىر ءبىلدىردى، دەپ حابارلايدى “ادىرنا” ۇلتتىق پورتالى.
ءمينيستردىڭ ايتۋىنشا، ۋنيۆەرسيتەتتەر جالعا العان حوستەلدەردە ءورت قاۋىپسىزدىگى ساقتالعان.
«وسى اپاتتا 2 ستۋدەنتىمىزدەن ايىرىلىپ قالدىق. ولاردىڭ ءبىرى كاسپي قوعامدىق ۋنيۆەرسيتەتىندە ءبىلىم السا، ەكىنشىسى ەۋرازيا تەحنولوگيالىق ۋنيۆەرسيتەتىنىڭ ستۋدەنتى. اپاتتىڭ سەبەبى مەن سالدارى مۇقيات تەكسەرىلۋ ۇستىندە جانە وسىعان بايلانىستى ءتيىستى شارالار قابىلداناتىن بولادى. تامىز ايىندا مەنىڭ بۇيرىعىممەن جوو رەكتورلارىنا ستۋدەنتتەردى حوستەلدەرگە ورنالاستىرۋ تۋرالى تاپسىرما بەرىلگەن بولاتىن. حوستەلدەردە ستۋدەنتتەردەن وزگە ەشكىمنىڭ تۇرماۋىن ءبىز ەرەكشە نازارعا الدىق جانە دە حوستەلدەردە قۇزىرلى ورىندامەن بىرلەسىپ، سانيتارلىق-تازالىق جۇمىستارى مەن ورتكە قارسى تەحنيكالىق قاۋىپسىزدىكتى كۇشەيتتىك. بۇگىنگى كۇنگە دەيىن ۋنيۆەرسيتەتتەرمەن كەلىسىمشارت ورناتقان حوستەلدەردە ەشقانداي كەلەڭسىز جاعدايلار بولماعانىن جەتكىزگىم كەلەدى»، - دەدى مينيستر.
الماتى قالاسىنىڭ جوعارى وقۋ ورىندارى اتالعان حوستەلمەن ستۋدەنتتەردى ورنالاستىرۋعا كەلىسىمشارت جاساسپاعان. بۇگىنگى تاڭدا جوو-لار 87 نىساندى (قوناقۇيلەر مەن حوستەلدەر) جالعا العان.
