ىشكى ىستەر مينيسترلىگى «سۇڭقار» ارنايى جاساعىنىڭ جاۋىنگەرلەرى بىرىككەن اراب امىرلىكتەرىنىڭ دۋباي قالاسىندا وتكەن THE UAE SWAT Challenge تۋرنيرىنە قاتىسىپ كەلدى. بۇل تۋرالى Polisia.kz جاريالادى، دەپ حابارلايدى “ادىرنا” ۇلتتىق پورتپيۋالى.
اقپارات بويىنشا، ءىىم ارنايى جاساعى وسى تۋرنيرگە وسىمەن بەسىنشى رەت قاتىسىپ وتىر. جىل سايىن ەل كومانداسى جاقسى ناتيجە كورسەتەدى. بيىل جاۋىنگەرلەر الەمنىڭ 48 ەلىنەن قاتىسقان 87 كوماندانىڭ ىشىنەن 6-ورىندى يەلەندى.
قازاقستان رەسپۋبليكاسىنىڭ مەملەكەتتىك كۇزەت قىزمەتىنىڭ «ساردار» كومانداسى دۋبايدا وتكەن حالىقارالىق جارىستا قولا جۇلدەگە يە بولدى.
جارىستىڭ بارلىق كەزەڭى تارتىستى ءوتتى. ارنايى بولىمشەلەردىڭ قىزمەتكەرلەرى ءارتۇرلى تاكتيكالىق تاپسىرمالاردى ورىندادى.
ءبىر اتاپ وتەتىن نارسە، وسى سىندا قازاقستان جاۋىنگەرلەرىنىڭ ءبىرى اۋىر جاراقات الىپ قالدى. الايدا جاراقات العان جاۋىنگەردىڭ قارۋلاستارى جارىس كەزىندە ونى جولدا قالدىرماي، قولتىقتاپ، دەمەپ، باتىلدىق پەن تاباندىلىقتىڭ، بىرلىك پەن باۋىرمالدىقتىڭ ناعىز ۇلگىسىن كورسەتتى.
«ارنايى جاساق العاشقى ءۇش كەزەڭنەن ءساتتى ءوتىپ، جۇلدەلى ءبىرىنشى جانە ءۇشىنشى ورىنداردى يەلەنگەن بولاتىن. بىراق ءتورتىنشى دەڭگەي ولار ءۇشىن وڭاي بولمادى. جاۋىنگەرلەردىڭ ءبىرى تاپسىرمانى ورىنداپ جاتقاندا اياعىنان جاراقات الدى. الايدا ول بۇعان قاراماستان جارىستى توقتاتپادى. ونى ارىپتەستەرى جارتى جولدا قالدىرماي، مەجەلى جەرگە دەيىن الىپ كەلدى. سونىمەن، كوماندا بارلىق كەزەڭدى بىرگە ءوتىپ، تولىق قۇرامدا مارەگە جەتتى. سوڭعى كەزەڭدە كوماندا مۇشەسى اۋىستىرىلدى»، – دەلىنگەن حابارلامادا.
جاراقات العان جاۋىنگەر اۋرۋحاناعا جەتكىزىلدى. قازىر ونىڭ جاعدايى قالىپشا، جاراقاتتىڭ دەنساۋىلىعىنا زيانى جوق.
«مەن اياعىمدى «مۇنارا وقيعاسى» جاتتىعۋىندا سىندىرىپ الدىم. ءبىز ءۇشىنشى قاباتتان ەكىنشى قاباتقا ءتۇسىپ، قوڭىراۋدى سوعىپ، جەرگە ءتۇسۋىمىز كەرەك ەدى. ول جەرگە سەكىرگەن كەزدە، توق سوققانداي سەزىمدە بولدىم، كوزدەرىم قاراۋىتىپ كەتتى. بىراق مەندە توقتاۋ تۋرالى وي بولعان جوق. نە بولسا دا، مارەگە جەتۋىم كەرەك دەپ شەشتىم. جىگىتتەر مەن جەرلەستەرىم توقتاۋسىز قولداۋ كورسەتتى. ولارعا شەكسىز ريزامىن»، – دەدى جاۋىنگەر.
ايتا كەتەيىك، THE UAE SWAT Challenge – كۇش قۇرىلىمدارىنىڭ ارنايى كۇشتەرى اراسىندا وتكىزىلەتىن بەيرەسمي الەم چەمپيوناتى. ونى «ارنايى جاساقتار وليمپياداسى» دەپ تە اتايدى. بۇل جارىستىڭ باستى مىندەتى – ارنايى ماقساتتاعى وتريادتاردىڭ باسەكەگە قابىلەتتىلىگى مەن تيىمدىلىگىن ارتتىرۋ.
