اۋرۋحاناعا ون شاقتى ادام جەتكىزىلگەن، ولاردىڭ ۇشەۋى اۋىر حالدە جاتىر
شىمكەنتتەگى ءبىرىنشى قالالىق اۋرۋحاناعا ارىستاعى جارىلىستان زارداپ شەككەندەر جەتكىزىلە باستادى.
اۋرۋحانانىڭ باس دارىگەرى ابىلاي بونباي ءۇش ادامنىڭ قازىر اۋىر حالدە جاتقانىن حابارلادى. بارلىعى ون شاقتى ادام اۋرۋحاناعا تۇسكەن، دەپ حابارلايدى otyrar.kz.
"زارداپ شەككەندەر جەتكىزىلە باستادى، ولاردى قابىلداپ، قاجەتتى كومەكتىڭ ءبارىن كورسەتىپ جاتىرمىز", - دەدى بونباي.
ايتا كەتسەك، ارىستاعى توتەنشە جاعدايلارعا بايلانىستى ورداباسى اۋدانىندا دارىگەرلىك شتاب قۇرىلعان. ونى تۇركىستان وبلىسىنىڭ دەنساۋلىق ساقتاۋ باسقارماسىنىڭ باستىعى مۇقان ەگىزباەۆ باسقارادى.
جەدەل جۇمىستار جۇرگىزىلۋدە. ارىسقا 30 جەدەل جاردەم جىبەرىلدى. قاجەت بولعان جاعدايدا بىرنەشە اۋداننان قوسىمشا جەدەل جاردەم كولىكتەرى دايىندالادى، دەپ حابارلادى وڭىرلىك سايت.
ارىستاعى جارىلىس
دۇيسەنبى تۇركىستان وبلىسى ارىس قالاسىنداعى اسكەري ءبولىمنىڭ اۋماعىنداعى قويمادا جويقىن جارىلىس بولدى. قورعانىس مينيسترلىگى وقيعانىڭ ءمان-جايى مەن سەبەپتەرى انىقتالىپ جاتقانىن حابارلادى.
ارىس تۇرعىندارى شۇعىل تۇردە شىمكەنت قالاسىنا كوشىرىلە باستادى. قالادا 43 مىڭعا جۋىق حالىق تۇرادى.
اسكەري بولىمدەگى جارىلىستان كەيىن تۇركىستان وبلىسىندا توتەنشە جاعداي جاريالاندى. وقيعا ورنىنا وبلىس اكىمى ومىرزاق شوكەەۆ جەتتى.
وبلىس اكىمى ءباسپاسوز قىزمەتىنىڭ حابارلاۋىنشا، قازىرگى تاڭدا ارنايى شتاب قۇرىلىپ، اسكەريلەر مەن قۇقىق قورعاۋ ورگاندارى توتەنشە جاعداي ورنىندا جۇمىس ىستەپ جاتىر.
وبلىس اكىمىنىڭ تاپسىرماسى بويىنشا تۇرعىندار ءۇش باعىتتاعى لاگەرلەرگە ورنالاستىرىلادى:
- اقدالا بۇرىلىسى
- 41 رازەزد
- ۆودوزوبور
وسى ءۇش باعىت بويىنشا اسكەري كولىكتەر، كامازدار مەن ارنايى جاساق جۇمىلدىرىلۋدا. لاگەر باسىندا تۇرعىنداردى اۋدان اكىمدەرى قارسى الىپ جايعاستىرادى.
الەۋمەتتىك نىسانداردى پوليتسيا قىزمەتكەرلەرى كوشىرىپ جاتىر.
اكىمدىك "بوگەن" سۋ قويماسىنان تونگەن قاۋىپ تۋرالى اقپاراتتىڭ جالعان ەكەنىن حابارلادى. سونداي-اق، وتىرار مەن ورداباسى اۋداندارىندا 100 ورىندىق ەكى گوسپيتال اشىلدى.
Sputnik.
