قازاقستانعا تانىمال سپورت ءجۋرناليسى نەسىپ ءجۇنىسباي Facebook پاراقشاسىندا گەننادي گولوۆكينننىڭ ۇلتتىق وليمپيادالىق كوميتەتتىڭ باسشىسى رەتىندە تاعايىنداۋعا قارسى ەكەنىن ءبىلدىردى، دەپ حابارلايدى «ادىرنا» ۇلتتىق پورتالىنىڭ ءتىلشىسى.
ءجۋرناليستىڭ ايتۋىنشا، كوميتەت باسشىسىنا لايىقتى ودان دا باسقا كوپتەگەن سپورتشىلار بار. بىراق ەشقانداي سايلاۋ ناتيجەلەرىنسىز بوكسشى گەننادي گولوكيندى كوميتەت توراعاسى ەتىپ تاعايىنداۋ دۇرىس ەمەس.
«قازاق سپورت تاريحىندا نەبىر مىقتى سپورتشىلار بولدى. قاجىمۇقان اتامىزدان باستاپ، كەيىنگى كاكەن احمەتوۆ، سەرىك قوناقباەۆ، داۋلەت تۇرلىحانوۆ بار، سەرىك ساپيەۆ، يسلام بايرامۋكوۆ سياقتى سپورت مايتالماندارىن ايتا الامىز. وسى اتى اتالعانداردىڭ ءاربىرى ەلىمىزدە، ءارتۇرلى سالادا ەڭبەك ەتىپ ءجۇر. سوندا ءبىز وسى ادامداردى اشىق سايلاۋعا شاقىرماي، «گەننادي گولوكين ۇلتتىق وليمپيادالىق كوميتەتتىڭ باسشىسى بولا سالسىن» دەگەن ءبىر ادامنىڭ سوزىمەن «جاڭا قازاقتان – ادىلەتتى قازاقستان» بولامىز دەگەن زاڭىمىزدى بۇزبايمىز با؟! مۇنداي ماڭىزدى شارۋانى الدىن الا جاريالاپ، سپورت ۇيىمدارىنىڭ ماماندارى مەن ءوز كانديداتۋراسىن ۇسىناتىن جانداردى جيناپ، سايلاۋ كەزىندە ەشقانداي قىسىم جاساماي، ۇمىتكەرلەردى باقىلاپ، باسشى تاعايىنداساق – ءبىز ەش ۋاقىتتا وكىنبەس ەدىك. وليمپيادالىق سپورت ويىندارى – قازاق حالقىنىڭ بەت-بەينەسى، ۇلتتىق قۇندىلىقتارىمىزدىڭ ءبىر پاراعى، ويتكەنى وليمپيادالىق ويىنداردا ءبىزدىڭ چەمپيوندار تۇعىردا جالاۋىمىزدى جەلبىرەتىپ، ءانۇرانىمىزدى اۋەلەتەدى. ال كوميتەت توراعاسى وسىعان جاۋاپتى تۇلعا. سوندىقتان بۇل جوبانى كەڭ كولەمدە، جاۋاپكەرشىلىكپەن تالقىلاعان دۇرىس دەپ ەسەپتەيمىن.
مەن گولوۆكيننىڭ مىقتىلىعىنا ايتار داۋىم جوق. دەگەنمەن ونىڭ كاسىپقوي سپورتتاعى جاساعان ەڭبەكتەرى ءۇشىن ول ەشقانداي تالاپسىز ۇلتتىق وليمپيادالىق كوميتەتتى باسقارا الادى دەپ كەسىپ ايتۋعا كەلمەيدى»، - دەپ ءوز ويىن اشىق ايتتى نەسىپ ءجۇنىسباي.
سونداي-اق «داۋلەت تۇرلىحانوۆتىڭ كانديداتۋراسىنىن قولداۋىڭىزعا نە سەبەپ؟» دەگەن سۇراققا جۋرناليست بىلاي دەپ جاۋاپ بەردى:
- داۋلەت تۇرلىحانوۆتىڭ سپورتتاعى جەڭىستەرى مەن جەتكەن جەتىستىكتەرى كوپ. اتاپ ايتساق، كەڭەس وداعىنىڭ 7 دۇركىن چەمپيونى بولۋ – بىردە-ءبىر پالۋاننىڭ قولىنان كەلمەگەن جەتىستىك. سونداي-اق ول بۇگىنگى تاڭداعى الەمدىك كۇرەس ونەرىنىڭ اتقارۋ كوميتەتى قاتارىندا جۇرگەن جالعىز قازاق. ودان بولەك ازيا كۇرەس وداعىنىڭ پرەزيدەنتى، قازاقستان كۇرەس فەدەراتسياسىنىڭ پرەزيدەنتى. ال ونىڭ جەكە ومىرىنە مەن پىكىر ايتا المايمىن، بىراق ونىڭ سپورت سالاسىنا قوسقان ۇلەسىن ايتپاسقا بولمايدى. ۇلتتىق وليمپيادالىق كوميتەت – سپورتشىلاردى تاربيەلەپ، ولاردى جاتتىقتىراتىن ۇيىم ەمەس، ول دايىن سپورتشىلاردى الەم چەمپيوناتتارىنا باستايتىن ۇيىم. 1994 جىلى ازيا ويىندارىنا جاپونيانىڭ حيروسيما قالاسىنا بارعانىمىزدا (وساكا اۋەجايىندا), جاپون جۋرناليستەرى نەلىكتەن قازاقستان ۇلتتىق قۇراماسىنداعى سپورتشىلاردىڭ 97 پايىزى ەۋروپالىقتار ەكەنىن سۇراعان. ەگەر ويلاناتىن بولساق، بۇل سۇراقتىڭ استارىندا ۇلكەن ءمان جاتىر»، - دەپ جۋرناليست ويىن قورىتىندىلادى.
ەستەرىڭىزگە سالا كەتەيىك، 26 اقپاندا ەلىمىزدىڭ ۇلتتىق وليمپيادا كوميتەتىنىڭ پرەزيدەنتى اۋىسادى. الدىن الا بولجام بويىنشا، كوميتەت توراعاسى رەتىندە گەننادي گولوۆكين تاعايىندالادى دەپ ايتىلعان بولاتىن.
