Qazaqstanǵa tanymal sport jýrnalısi Nesip Júnisbaı Facebook paraqshasynda Gennadıı Golovkınnniń Ulttyq Olımpıadalyq komıtettiń basshysy retinde taǵaıyndaýǵa qarsy ekenin bildirdi, dep habarlaıdy «Adyrna» ulttyq portalynyń tilshisi.
Jýrnalıstiń aıtýynsha, komıtet basshysyna laıyqty odan da basqa kóptegen sportshylar bar. Biraq eshqandaı saılaý nátıjelerinsiz boksshy Gennadıı Golokındi komıtet tóraǵasy etip taǵaıyndaý durys emes.
«Qazaq sport tarıhynda nebir myqty sportshylar boldy. Qajymuqan atamyzdan bastap, keıingi Káken Ahmetov, Serik Qonaqbaev, Dáýlet Turlyhanov bar, Serik Sápıev, Islam Baıramýkov sııaqty sport maıtalmandaryn aıta alamyz. Osy aty atalǵandardyń árbiri elimizde, ártúrli salada eńbek etip júr. Sonda biz osy adamdardy ashyq saılaýǵa shaqyrmaı, «Gennadıı Golokın Ulttyq Olımpıadalyq komıtettiń basshysy bola salsyn» degen bir adamnyń sózimen «Jańa Qazaqtan – Ádiletti Qazaqstan» bolamyz degen zańymyzdy buzbaımyz ba?! Mundaı mańyzdy sharýany aldyn ala jarııalap, sport uıymdarynyń mamandary men óz kandıdatýrasyn usynatyn jandardy jınap, saılaý kezinde eshqandaı qysym jasamaı, úmitkerlerdi baqylap, basshy taǵaıyndasaq – biz esh ýaqytta ókinbes edik. Olımpıadalyq sport oıyndary – qazaq halqynyń bet-beınesi, ulttyq qundylyqtarymyzdyń bir paraǵy, óıtkeni olımpıadalyq oıyndarda bizdiń chempıondar tuǵyrda jalaýymyzdy jelbiretip, ánuranymyzdy áýeletedi. Al komıtet tóraǵasy osyǵan jaýapty tulǵa. Sondyqtan bul jobany keń kólemde, jaýapkershilikpen talqylaǵan durys dep esepteımin.
Men Golovkınniń myqtylyǵyna aıtar daýym joq. Degenmen onyń kásipqoı sporttaǵy jasaǵan eńbekteri úshin ol eshqandaı talapsyz Ulttyq olımpıadalyq komıtetti basqara alady dep kesip aıtýǵa kelmeıdi», - dep óz oıyn ashyq aıtty Nesip Júnisbaı.
Sondaı-aq «Dáýlet Turlyhanovtyń kandıdatýrasynyn qoldaýyńyzǵa ne sebep?» degen suraqqa jýrnalıst bylaı dep jaýap berdi:
- Dáýlet Turlyhanovtyń sporttaǵy jeńisteri men jetken jetistikteri kóp. Atap aıtsaq, Keńes odaǵynyń 7 dúrkin chempıony bolý – birde-bir palýannyń qolynan kelmegen jetistik. Sondaı-aq ol búgingi tańdaǵy Álemdik kúres óneriniń atqarý komıteti qatarynda júrgen jalǵyz qazaq. Odan bólek Azııa kúres odaǵynyń prezıdenti, Qazaqstan kúres federaııasynyń prezıdenti. Al onyń jeke ómirine men pikir aıta almaımyn, biraq onyń sport salasyna qosqan úlesin aıtpasqa bolmaıdy. Ulttyq olımpıadalyq komıtet – sportshylardy tárbıelep, olardy jattyqtyratyn uıym emes, ol daıyn sportshylardy álem chempıonattaryna bastaıtyn uıym. 1994 jyly Azııa oıyndaryna Japonııanyń Hırosıma qalasyna barǵanymyzda (Osaka áýejaıynda), japon jýrnalısteri nelikten Qazaqstan ulttyq quramasyndaǵy sportshylardyń 97 paıyzy eýropalyqtar ekenin suraǵan. Eger oılanatyn bolsaq, bul suraqtyń astarynda úlken mán jatyr», - dep jýrnalıst oıyn qorytyndylady.
Esterińizge sala keteıik, 26 aqpanda elimizdiń Ulttyq Olımpıada Komıtetiniń prezıdenti aýysady. Aldyn ala boljam boıynsha, komıtet tóraǵasy retinde Gennadıı Golovkın taǵaıyndalady dep aıtylǵan bolatyn.
