پرەزيدەنت قاسىم-جومارت توقاەۆ كوپبالالى انالار مەن مۇمكىندىگى شەكتەۋلى جاندارداردىڭ نەسيەسىن جابۋعا تاپسىرما بەردى. ءبىر ەمەس، ءجۇز ەمەس، ميلليون ادامنىڭ قيىندىعىن شەشۋگە. ارينە بۇل ارىستاعى اياق استى اپاتتىڭ جۇرەككە سالعان اۋىر جۇرگىن جەڭىلدەتىپ، جۇدەۋ جانىمىزعا مەدەت بولعانى جاسىرىن ەمەس. سەبەبى سوڭعى كەزدە ەلدە بولىپ جاتقان وقيعالار جاعا ۇستاتارلىق. مەملەكەتىمىزگە قاراپ تۇرىپ "قازاقستان، ساعان نە بولدى؟" دەپ اڭتارىلىپ قاراعىڭ-اق كەلەدى. قايسىبىرىن تۇگەندەيىك؟... دەگەنمەن وسى سۇمدىقتاردىڭ باسى 4 اقپاندا ورىن العان وت قۇرساۋىندا قالعان بەيكۇنا بەس سابيدەن باستالىپ ەدى. بەسكۇندىك جالعاندا بەس بالاسى ءۇشىن ەڭبەكتەن كوز اشپاعان اتا-انا نان تاۋىپ كۇركەسىنە كەلگەندە تەك كۇلىن سيپاپ قالعانى كىمگە دە بولسا وڭاي تيمەيتىنى انىق. مىڭ جەردەن بالا قۇقىعىن قورعايتىن كەڭەس قۇرىلسا دا، 21 مىڭدى كوپبالالى اتا-انالارعا قوس-قوستاپ تاراتسا دا جارالى جانعا جاماۋ دا، الاڭ كوڭىلگە دەمەۋ دە بولا المايدى. 21 مىڭ دەمەكشى باسى تاۋداي باستالعان الگى 21 مىڭ قوراداعى قوي ەشكى مەن، سوقىر تاۋىققا دەيىن ساناۋعا ماجۇرلەدى. حالىقتى قاق جارىپ، 22 مىڭ تەڭگە تاساڭ جاردەمسىز قالاتىن كۇنگە جەتكىزدى. امال نەشىك، زاڭ سولاي؟... قالاي بولماسىن سول 21 مىڭ ءدال سول 5 بالانى قىرشىننان قيماي تۇرىپ بەرىلۋى كەرەك ەدى. ءبىر وتباسىن وتقا وراپ، ادام شىعىنى بولعاسىن قولعا الاتىن بيلىكتىڭ ءبىر كەمشىل تۇسى. قالاي بولماسىن ومىرگە قۇشتار ورىمدەي بەس ءبۇلدىرشىننىڭ بەس مينۋتتا وتتا ورانعانى ماڭگى جادىمىزدا قالاتىنى انىق. بۇل ۇلتتىڭ، ەلدىڭ، قالا بەردى بۇكىل انانىڭ قايعىسى!
وكىنىشكە وراي، قارا حالىقتىڭ باسىنداعى ءتۇرلى ساياسي، رۋحاني ءھام تۇرمىستىق اۋىر جاعدايلار بەس ءسابيدىڭ قاسىرەتىن توپىراقپەن بىرگە كومىپ كەتكەن سياقتى. ال وقيعالار تىزبەگى ادام جادىنان شىقپاي، ماڭگىلىك ەستە قالۋ ءۇشىن ەسكەتكىشتىڭ ورناتىلاتىنى بەلگىلى. مىسالى، قىزىلاعاش قىرعىنى ەسكەرتكىشپەن تاريحتى ەسكە سالىپ تۇرادى. تاريحتى ەسكە سالۋ، دۇربەلەڭ تۋعىزۋ، ەسكى جارانىڭ اۋىزىن تىرناۋ ءۇشىن ەمەس، وتكەن قاتەلىكتەن ساباق الۋ، بولاشاققا قالتىسىز قادام باسۋ ءۇشىن كەرەك. وسى ورايدا ءتىلسىز جاۋدىڭ قۇربانىنا اينالعان بۇلدىرشىندەردى ەسكە الىپ ءجۇرۋ ماقساتىندا مەملەكەتىمىز نۇر-سۇلتاننان ءبىر ەسكەرتكىش ورناتۋى ءتيىس. بۇل ماسەلە وقيعا ورىن العان ۋاقىتتا ءبىراز قوزعالىپ، كەيىننەن مۇلدەم جابىلىپ قالدى. تىپتەن ەستەن شىعىپ كەتتى دەسەك تە بولار. ونسىز دا اتا زاڭدى اياق استى ەتىپ، كوزى تىرىسىندە ەلباسىنا ەسكەرتكىش قويعان ءبىزدىڭ بەيباق قوعامنان، بەيكۇنا بەس سابيگە ورىن بۇيىرماۋى مۇمكىن ەمەس. وسىلاردىڭ قاسىندا بەيكۇنا بەس پەرىشتە ەسكەرتكىشكەگە ابدەن لايىق سەكىلدى.
ءسىز قالاي ويلايسىز، وقىرمان؟!
اقگۇل ايداربەكوۆا
"ادىرنا" ۇلتتىق پورتالى
