Prezıdent Qasym-Jomart Toqaev kópbalaly analar men múmkindigi shekteýli jandardardyń nesıesin jabýǵa tapsyrma berdi. Bir emes, júz emes, mıllıon adamnyń qıyndyǵyn sheshýge. Árıne bul Arystaǵy aıaq asty apattyń júrekke salǵan aýyr júrgin jeńildetip, júdeý janymyzǵa medet bolǵany jasyryn emes. Sebebi sońǵy kezde elde bolyp jatqan oqıǵalar jaǵa ustatarlyq. Memleketimizge qarap turyp "Qazaqstan, saǵan ne boldy?" dep ańtarylyp qaraǵyń-aq keledi. Qaısybirin túgendeıik?... Degenmen osy sumdyqtardyń basy 4 aqpanda oryn alǵan ot qursaýynda qalǵan beıkúná bes sábıden bastalyp edi. Beskúndik jalǵanda bes balasy úshin eńbekten kóz ashpaǵan ata-ana nan taýyp kúrkesine kelgende tek kúlin sıpap qalǵany kimge de bolsa ońaı tımeıtini anyq. Myń jerden bala quqyǵyn qorǵaıtyn keńes qurylsa da, 21 myńdy kópbalaly ata-analarǵa qos-qostap taratsa da jaraly janǵa jamaý da, alań kóńilge demeý de bola almaıdy. 21 myń demekshi basy taýdaı bastalǵan álgi 21 myń qoradaǵy qoı eshki men, soqyr taýyqqa deıin sanaýǵa májúrledi. Halyqty qaq jaryp, 22 myń teńge tasań járdemsiz qalatyn kúnge jetkizdi. Amal neshik, zań solaı?... Qalaı bolmasyn sol 21 myń dál sol 5 balany qyrshynnan qımaı turyp berilýi kerek edi. Bir otbasyn otqa orap, adam shyǵyny bolǵasyn qolǵa alatyn bıliktiń bir kemshil tusy. Qalaı bolmasyn ómirge qushtar órimdeı bes búldirshinniń bes mınýtta otta oranǵany máńgi jadymyzda qalatyny anyq. Bul ulttyń, eldiń, qala berdi búkil ananyń qaıǵysy!
Ókinishke oraı, qara halyqtyń basyndaǵy túrli saıası, rýhanı hám turmystyq aýyr jaǵdaılar bes sábıdiń qasiretin topyraqpen birge kómip ketken sııaqty. Al oqıǵalar tizbegi adam jadynan shyqpaı, máńgilik este qalý úshin esketkishtiń ornatylatyny belgili. Mysaly, Qyzylaǵash qyrǵyny eskertkishpen tarıhty eske salyp turady. Tarıhty eske salý, dúrbeleń týǵyzý, eski jaranyń aýyzyn tyrnaý úshin emes, ótken qatelikten sabaq alý, bolashaqqa qaltysyz qadam basý úshin kerek. Osy oraıda tilsiz jaýdyń qurbanyna aınalǵan búldirshinderdi eske alyp júrý maqsatynda Memleketimiz Nur-Sultannan bir eskertkish ornatýy tıis. Bul másele oqıǵa oryn alǵan ýaqytta biraz qozǵalyp, keıinnen múldem jabylyp qaldy. Tipten esten shyǵyp ketti desek te bolar. Onsyz da Ata zańdy aıaq asty etip, kózi tirisinde Elbasyna eskertkish qoıǵan bizdiń beıbaq qoǵamnan, beıkúná bes sábıge oryn buıyrmaýy múmkin emes. Osylardyń qasynda beıkúná bes perishte eskertkishkege ábden laıyq sekildi.
Siz qalaı oılaısyz, oqyrman?!
Aqgúl AIDARBEKOVA
"Adyrna" ulttyq portaly
