ەكى رەت مادەنيەت جانە سپورت ۆيتسە-ءمينيسترى بولعان شەنەۋنىكتىڭ ۇستالعانى حابارلاندى

1963
Adyrna.kz Telegram

بۇرىنعى مادەنيەت جانە سپورت ۆيتسە-ءمينيسترى ەرلان قوجاعاپانوۆ ۇستالدى. بۇل تۋرالى انتيكوردىڭ ءباسپاسوز قىزمەتى ايتتى، دەپ حابارلايدى «ادىرنا» ءتىلشىسى.

«سىبايلاس جەمقورلىققا قارسى قىزمەت سوتقا دەيىنگى تەرگەپ-تەكسەرۋ شەڭبەرىندە قازاقستان رەسپۋبليكاسىنىڭ بۇرىنعى مادەنيەت جانە سپورت ۆيتسە-ءمينيسترى اۋىر سىبايلاس جەمقورلىق قىلمىس جاسادى دەگەن كۇدىكپەن ۇستالعانىن راستايدى.

قازىرگى ۋاقىتتا كۇدىكتى الماتى قالاسى پوليتسيا دەپارتامەنتىنىڭ ۋاقىتشا قاماۋ يزولياتورىنا قاماۋعا الىندى. تەرگەۋ جالعاسۋدا»،—دەلىنگەن حابارلامادا.

قر قپك-ءنىڭ 201-بابىنا سايكەس وزگە دە اقپاراتتىڭ جاريا ەتۋگە جاتپايتىنى ايتىلادى.

ەرلان قوجاعاپانوۆ مادەنيەت جانە سپورت ۆيتسە-ءمينيسترى قىزمەتىن ەكى رەت اتقاردى. 2017-2019 جىلدارى ول مينيستر ارىستانبەك مۇحامەديۇلىنا، كەيىن 2021 جىلى بىرنەشە اي مينيستر داۋرەن اباەۆقا ورىنباسار بولدى.

ال 2021 جىلدىڭ قىركۇيەگىنەن 2022 جىلدىڭ ءساۋىر ايىنا دەيىن پرەمەر-ءمينيستردىڭ كەڭەسشىسى قىزمەتىن اتقاردى.

ارىستانبەك مۇحامەديۇلىنا "بوتەننىڭ مۇلكىن ۇرلاۋدى ۇيىمداستىرعانى جانە وعان كومەكتەسكەنى ءۇشىن" دەگەن ايىپپەن اقپان ايىنىڭ سوڭىندا 11 جىلعا باس بوستاندىعىنان ايىرۋ تۋرالى ۇكىم شىقتى. وعان سوت ء“وز ورىنباسارلارىمەن الدىن الا ءسوز بايلاسۋ ارقىلى 2017-2019 جىلدار ارالىعىندا "الەم مۇراجايلارى بويىنشا التىن ادامنىڭ شەرۋى" حالىقارالىق كورمە جوباسىن ىسكە اسىرۋ شەڭبەرىندە "ە." جشس ديرەكتورىنىڭ ورىنباسارى مەن بۋحگالتەرىنىڭ كومەگىمەن 1,5 ملرد. تەڭگە سوماسىنا باعانى كوتەرۋ جولىمەن، قىزمەتتەر كورسەتۋدى جانە تاۋاردى تيەپ-جونەلتۋدى ءىس جۇزىندە ورىنداماي، اسا ءىرى مولشەردە جۇمساۋ جولىمەن قاراجاتتى جىمقىرعان” دەگەن ايىپ تاققان.

ال ءبىر كەزدە مادەنيەت جانە سپورت ءمينيسترى بولعان داۋرەن اباەۆ - قازىر قازاقستاننىڭ رەسەيدەگى ەلشىسى.

انتيكور ۇستالعان ەرلان قوجاعاپانوۆقا قاتىستى ونىڭ كەيىنگى قىزمەتىن كورسەتپەي، ۆيتسە-مينيسترلىك كەزەڭىن اتاعان.

 

 

پىكىرلەر