بۇگىنگى اشىنعان ارىس تۇرعىندارىنىڭ تالابى بارلىق جاعىنان ورىندى جانە دۇرىس دەپ ويلايمىن. ۇيىنەن تەك قانا ءىش كيىمىمەن جەڭىل جەلپى قاشىپ شىققان حالىق نەشە كۇن بىرەۋدىڭ ۇيىندە ۇندەمەي وتىرادى دەپ ويلايسىز، بۇلار ەندى وسىلاي كوشەگە شىقپاعاندا نە ىستەيدى...
جالپى، بۇگىن وسى شىمداعى بولىپ جاتقان وقيعالارعا قاراپ، ناقتىراق ايتسام، ونداعى جەرگىلىكتى اكىمشىلىكتىڭ ارەكەتىنە قاراپ وتىرعاندا، سەنەسىزدەر مە، كوزىمە ازيالىق بانگلادەش، پاكىستان ەلدەرى ەلەستەدى.
بانگلادەش، ءپاكىستان سىندى ازيانىڭ كەدەي، مەشەۋ ەلدەرىندە ءزىلزالا، سۋ تاسقىنى سياقتى اپاتتار ءجيى بولادى ەكەن. سوسىن بۇل ەلدەردە جەرگىلىكتى اكىمشىلىكتەر بەبەلدى ءدىنباسىلارىن ەرتىپ، بۇنداي اپاتتاردان سوڭ ءدىنشىل قاراڭعى حالىققا "بۇل اپاتتاردىڭ ءبارى قۇدايدان كەلەتىنىن، قايتا ءتىرىنىڭ امان قالعانىنا شۇكىرشىلىك قىلىپ، ارى قاراي تىرشىلىك ەتۋدىڭ ابزالدىعىن" حالىق كوپ جينالاتىن جەرلەردە تاپتىشتەپ ءتۇسىندىرىپ، جۇرتقا سابىر ايتىپ تارقاتىپ جىبەرەدى ەكەن. ال بۇلاردا حالىقتىڭ كوپ جينالاتىن جەرلەرى - سانسىز مەشىتتەر مەن مەدرەسەلەر، ادەتتە بۇل ەلدەردە مەشىت سانى مەكتەپ سانىنان دا كوپ بولادى.
اپاتتىڭ سالدارىمەن كۇرەسۋگە بۇنداي كەدەي ەلدەردىڭ قازىناسىندا ءومىرى قاراجات بولمايدى جانە بۇلاردىڭ باقىتسىز حالقىندا جەرگىلىكتى وكىمەتكە اۋىز اشۋ دەگەن تۇسىنىك اتىمەن جوق. بۇل حالىقتار بۇزىلعان، قيراعان ۇيلەرىن، كۇركەلەرىن شاماسىنشا جاماپ، جاسقاپ يتشىلەپ ارى قاراي كۇنىن كورىپ جۇرە بەرەدى ەكەن.
ەندى بۇگىن شىمداعى مەشىتكە جينالعان قاۋىمدى ميكروفون ۇستاپ سابىرعا شاقىرىپ ۋاعىز ايتىپ وتىرعان كىسىنى كورىپ "ويپىراي، مىناۋ قانداي جاپ - جاس يمام" دەپ تاڭعالىپ وتىرسام، سەنەسىزدەر مە، بۇل يمام ەمەس، شىمكەنت اكىمى بوپ شىقتى!. ەكى - ءۇش كۇننەن بەرى ارىستان اعىلىپ كەلىپ جاتقان حالىقتى قارسى الاتىن ورتالىقتار اشىپ تاستاپ، ولاردى ورنالاستىرىپ، سول ورتالىقتاردىڭ بوساعاسىندا جىميىپ تۇراتىن اكىم مەشىتتىڭ تورىندە شىرەنىپ وتىر. ودان سوڭ بۇلار نامازعا تۇردى.
ودان جينالعان حالىق اراسىنا سابىر ايتىپ سمانىپ، شمانىپ ءدىنباسىلارى شىقتى...
ناعىز بانگلادەش بولدى!
ال ەندى وسىلاردىڭ "ەلباسىنىڭ تاپسىرماسىمەن" دەپ جوڭكىلىپ قاتارىنا ۇمىتىلىپ جۇرگەن دەنى دۇرىس وركەنيەتتى ەلدەردەگى بۇنداي جاعدايلاردا ولاردىڭ ادىستەرى، تاسىلدەرى ءتىپتى باسقاشا بولادى ەكەن.
ولار بۇنداي جاعدايدا قۇتقارۋشى، اسكەر، پوليتسيا ءبارىن جۇمىلدىرىپ، ەڭ الدىمەن ءولىپ - تالىپ حالقىن قۇتقارۋعا كىرىسەدى. سەبەبى، بۇل ەلدەردە ادامنىڭ قۇنى قاشاندا تىم قىمبات بولادى. ودان تەگىن مەديتسينالىق كومەك، ودان سوڭ ادام باسىن تۇگەندەپ ەسەپكە الادى، وسى اپاتقا بايلانىستى كوپتەگەن ادام قابىلداۋ ورتالىقتارى اشىلادى، حالقى ۆولونتەرى جۇمىلدىرادى، اپاتتى زالالسىزداندىرۋ، ونىڭ كەلتىرگەن شىعىنىن ەسەپتەۋ، حالىققا ونىڭ وتەماقىسىن تولەۋ.....
قىسقاسى، دەنى دۇرىس قالىپتى مەملەكەت، بۇنداي جاعدايدا وسىنداي شارالار ۇيىمداستىرادى ەكەن.
مەنىڭشە، وسى شاعىن عانا ارىس وقيعاسىندا ءبىزدىڭ مەملەكەت رەتىندە شىنايى كەلبەتىمىز كورىنىپ قالدى. نازارباەۆتىڭ وتىز جىل اۋا تەۋىپ "وتىز ەلدىڭ قاتارى، ەلۋ ەلدىڭ قاتارى" دەپ جۇرگەنى ناعىز دالباسا ەكەن - ءبىزدىڭ بۇگىندە سول بانگلادەشتەردەن ەش ايىرمامىز جوق، ءبىز بانگلادەشپىز.
ولجاس ءابىل
"ادىرنا" ۇلتتىق پورتالى
