جاردەماقى وسەدى

1 شىلدەدەن باستاپ ەرەكشە قاجەتتىلىگى بار بالالاردىڭ قامقورشىلارىنا، سونداي-اق، بالا كەزدەن ءبىرىنشى توپتاعى مۇگەدەكتەرگە كۇتىم كورسەتەتىندەرگە تولەنەتىن جاردەماقى كوتەرىلەدى.

قازىر مۇمكىندىگى شەكتەۋلى بالالارى بار وتباسىلار ەڭ تومەنگى كۇنكورىس دەڭگەيىنىڭ 1,05 مولشەرىندە، ياعني 31 183 تەڭگە جاردەماقى الىپ وتىر. ايتا كەتسەك، قازاقستاندا ەڭ تومەنگى كۇنكورىس دەڭگەيى - 29 698 تەڭگە.

ەندى زاڭعا ەنگىزىلگەن وزگەرىستەرگە سايكەس، جاردەماقى مولشەرى 41 578 تەڭگەنى قۇرايدى. جاڭا جاردەماقىنى 95 مىڭنان استام ادام الادى.

جاردەماقىنى راسىمدەۋ ءۇشىن حالىققا قىزمەت كورسەتۋ ورتالىقتارىنا بارۋدىڭ قاجەتى جوق. جاردەماقى ەسەپتەۋ پروتسەسى قانداي دا ءبىر قوسىمشا قۇجاتسىز اۆتوماتتى تۇردە جۇرگىزىلەدى. جاردەماقى ءار ايدىڭ بىرىنەن ون بەسىنە دەيىنگى ارالىقتا تولەنەدى.

كەدەيلىك شەگى كوتەرىلەدى

شىلدە ايىنان باستاپ ەلىمىزدە كەدەيلىك شەگىن ءوسىرۋ جوسپارلانىپ وتىر. "كەدەيلىك شەگىنىڭ مولشەرىن انىقتاۋ تۋرالى" بۇيرىققا ەنگىزىلەتىن وزگەرىستەرگە سايكەس، ول 20 پروتسەنتكە ۇلعايادى.

ياعني، كەدەيلىك شەگى ەڭ تومەنگى كۇنكورىس دەڭگەيىنىڭ 50 پروتسەنتىنەن 70 پروتسەتىنە دەيىن كوتەرىلىپ، 20,8 مىڭ تەڭگەنى قۇرايدى.

پوليتسەيلەردىڭ جالاقىسى ارتادى

1 شىلدەدەن باستاپ قۇقىق قورعاۋ ورگاندارى قىزمەتكەرلەرىنىڭ ايلىعى وسەدى.

پاترۋلدىك پوليتسيادا 65%-كە، ال جەدەل-تەرگەۋ بولىمشەلەرىندە 55%-كە كوتەرىلەدى. ال قالعان كاتەگورياداعىلاردىڭ ەڭبەكاقىسى 25%-كە ۇلعايادى.

ۇلتتىق بانك شەتەلدىك كومپانيالاردى باقىلاۋعا الادى

1 شىلدەدەن باستاپ شەتەلدىك قارجىلىق ەمەس ۇيىمدار قازاقستاننىڭ ۇلتتىق بانكىنە ۆاليۋتا وپەراتسيالارى تۋرالى حابار بەرىپ تۇرادى. جاڭاشىلدىق "ۆاليۋتالىق رەتتەۋ جانە ۆاليۋتالىق باقىلاۋ تۋرالى" زاڭعا سايكەس ەنگىزىلىپ وتىر.

ۆاليۋتا ايىرباستاۋ پۋنكتەرىنىڭ جۇمىسى وزگەرەدى

جازدىڭ ەكىنشى ايىنان باستاپ قازاقستاندا ۆاليۋتا وپەراتسيالارىن ىسكە اسىرۋ ءتارتىبى وزگەرەدى. جاڭاشىلدىق، ەڭ الدىمەن، ايىرباستاۋ پۋنكتەرىنە قاتىستى بولماق.

بۇل وزگەرىستەر رەزيدەنت زاڭدى تۇلعالاردىڭ قولما-قول اقشاسىز شەتەلدىك ۆاليۋتانى ساتىپ العاندا، ۆاليۋتا نارىعىنداعى الىپساتارلىققا جول بەرمەۋگە باعىتتالعان.

كاسىپورىندار باقىلاۋ-كاسسالىق ماشينالارعا كوشەدى

2019 جىلدىڭ 1 شىلدەسىنەن 86 قىزمەت ءتۇرى ونلاين باقىلاۋ-كاسسالىق ماشينالارىن قولدانا باستايدى.

جىل سوڭىنا دەيىن توقسان سايىنعى نەگىزدە 633 قىزمەت ءتۇرى بكم-عا اۋىسادى.

ونلاين باقىلاۋ-كاسسالىق ماشينالارىن قولدانۋ تالابى ورتاق پايدالانۋ تەلەكوممۋنيكاتسيا جەلىلەرى جوق اۋماقتا قىزمەتىن جۇزەگە اسىراتىن سالىق تولەۋشىلەرگە قاتىستى ەمەس.

"ازاماتتارعا ارنالعان ۇكىمەت" كوممەرتسيالىق زاڭدى تۇلعالاردى تىركەيدى

بۇگىننەن باستاپ كوممەرتسيالىق ۇيىم بولىپ تابىلاتىن زاڭدى تۇلعالاردى تىركەۋ، سونداي-اق، ولاردىڭ فيليالدارى مەن وكىلدىكتەرىن ەسەپتىك تىركەۋدى "ازاماتتارعا ارنالعان ۇكىمەت" مەملەكەتتىك كورپوراتسياسى جۇزەگە اسىرادى.

شاعىن كاسىپكەرلىك سۋبەكتىلەرىنە جاتاتىن زاڭدى تۇلعالاردى باستاپقى تىركەۋ تىركەلەتىن ورگاننىڭ قاتىسۋىنسىز egov.kz ەلەكروندى ۇكىمەتىنىڭ پورتالىندا ەلەكتروندى فورماتتا جۇرگىزىلەدى.

فۋنكتسيالاردى بەرۋ رەسپۋبليكالىق بيۋدجەتتەن قارجى ءبولۋدى تالاپ ەتپەيدى.

جۇرگىزۋشى كۋالىگىن ەندى "ازاماتتارعا ارنالعان ۇكىمەت" بەرەدى

قازاقستاننىڭ ىشكى ىستەر مينيسترلىگى 2019 جىلدىڭ 1 شىلدەسىنەن باستاپ تىركەۋ-ەمتيحان بولىمشەلەرىن تاراتادى. بۇل بولىمشەنىڭ فۋنكتسياسى "ازاماتتارعا ارنالعان ۇكىمەت" مەملەكەتتىك كورپوراتسياسىنا (حقكو مەن مامانداندىرىلعان حقكو) بەرىلەدى.

1 شىلدەدەن باستاپ جۇرگىزۋشى كۋالىگىن العىسى كەلەتىندەردەن تەورەتيكالىق جانە پراكتيكالىق ەمتيحاندى حقكو قىزمەتكەرەرى قابىلدايدى.

تەمەكى قىمباتتايدى

ۇكىمەت قاۋلىسىنا سايكەس، 1 شىلدەدەن باستاپ تەمەكى تاعى 20 تەڭگەگە قىمباتتايدى. ەندى ءبىر قوراپ تەمەكىنىڭ باعاسى 400 تەڭگە بولادى.