ينتەرپول كروكۋس سيتي حوللداعى بەيبىت تۇرعىندارعا جاسالعان شابۋىلدى تەرگەۋدە رەسەي بيلىگىنە قولداۋ كورسەتۋگە دايىن. بۇل تۋرالى ۇيىمنىڭ باس حاتشىسى يۋرگەن شتوك مالىمدەدى، دەپ حابارلايدى “ادىرنا” ۇلتتىق پورتالى.
ول X الەۋمەتتىك جەلىسىندە كروكۋس سيتي حوللعا جاسالعان شابۋىلدى قاتاڭ ايىپتايتىنىن، ونى جازىقسىز بەيبىت تۇرعىندارعا قارسى جاسالعان جانتۇرشىگەرلىك ارەكەت دەپ اتايتىنىن جازدى.
«ءبىزدىڭ ويىمىز قۇرباندارمەن، ولاردىڭ وتباسىلارىمەن جانە دوستارىمەن. ينتەرپول رەسەي بيلىگىنىڭ تەرگەۋىنە قولداۋ كورسەتۋگە دايىن»، — دەدى ۇيىم باسشىسى.
ەسكە سالساق، 22 ناۋرىز كۇنى كەشكە ماسكەۋ تۇبىندەگى كراسنوگورسك قالاسىنداعى Crocus City Hall كونتسەرت زالىنا اۆتوماتپەن قارۋلانعان بەلگىسىز بىرەۋلەر باسىپ كىرىپ، وق جاۋدىرعان بولاتىن.
شابۋىلدان 130-دان استام ادام قازا تاپتى، دەپ حابارلادى رەسەيدىڭ تەرگەۋ كوميتەتى. زارداپ شەككەندەر سانى ارتۋى مۇمكىن، دەپ ەسكەرتتى دەپارتامەنت. رف قىلمىستىق كودەكسىنىڭ 205-بابى (تەررورلىق اكت) بويىنشا قىلمىستىق ءىس قوزعالدى.
رەسەيدىڭ توتەنشە جاعدايلار مينيسترلىگى قۇربان بولعان 99 ادامنىڭ ءتىزىمىن جاريالادى. ماسكەۋ وبلىسىنىڭ دەنساۋلىق ساقتاۋ مينيسترلىگى جاريالاعان تىزىمدە 145 زارداپ شەككەن، ونىڭ ىشىندە سەگىز بالا بار.
الدىن الا مالىمەت بويىنشا، كەم دەگەندە بەس شابۋىلشى بولعان، ولاردى رەسەي گۆاردياسى ىزدەپ جاتىر.
“كروكۋس سيتي حوللداعى ءورت ءىس جۇزىندە ءسوندىرىلدى، قۇرىلىستاردىڭ توگىلۋى مەن ۇيىندىلەردى شىعارۋ جالعاسۋدا”، دەپ حابارلادى ماسكەۋ وبلىسىنىڭ گۋبەرناتورى اندرەي ۆوروبەۆ.
ءورت اۋماعى 12,9 مىڭ م. شارشى مەتردى قۇرادى. كونتسەرت زالىنىڭ شاتىرى وپىرىلىپ ءتۇستى.
