اقتوبە وبلىسى سۋ استىندا قالدى. ايماقتاعى ءۇش ەلدى مەكەن تۇرعىندارى توتەنشە جاعدايعا دابىل قاعۋ كەرەكتىگىن ايتۋدا، - دەپ حابارلايدى "ادىرنا" ۇلتتىق پورتالى.
اقتوبە وبلىسىندا ەرىگەن سۋ جولدار مەن كوپىرلەردى باسىپ، ۇيلەرگە دە كىرە باستاعان. اتاپ ايتقاندا، ەمبى قالاسىنىڭ ءحالى قيىن. سۋ باسقان ۇيلەردىڭ ناقتى سانى ازىرگە بەلگىسىز. اكىمدىك اقپاراتتى كەيىنىرەك بەرۋگە ۋادە بەرىپ وتىر. قازىر بارلىق كۇش اپات سالدارىن بارىنشا ازايتۋعا جۇمىلدىرىلۋدا.
"بۇگىن كۇندىز ەمبىگە كەنەتتەن سۋ كىردى. ءبىر كوشەنى، ونىمەن بىرگە بىرنەشە ءۇيدى دە سۋ باسىپ قالدى. توتەنشە شارالار قابىلداۋعا تۋرا كەلدى. سۋ وتكىزۋ ءۇشىن التىندى-ەمبى جولىنىڭ ۋچاسكەسىن اشۋ تۋرالى شەشىم قابىلداندى. وقيعا ورنىندا كەزەكشىلىك قۇرىلىپ، بۇل اۋماقتاعى جول جابىلدى»، - دەدى مۇعالجار اۋدانىنىڭ اكىمى دارحان ەرماعانبەتوۆ.
اۋدان ورتالىعى شۇبارقۇدىقتا دا كۇردەلى جاعداي قالىپتاستى. اۋىلعا دا ەرىگەن سۋ جينالا باستادى. اكىمدىك جاعداي باقىلاۋدا، تۇرعىن ۇيلەردى سۋ باسىپ كەتۋ قاۋپى جوق دەپ سەندىرەدى.
"كەرەەۆا كوشەسىنىڭ بويىندا جەكە دۇكەننىڭ جانىنان سۋ توگەتىن كانال تارتىلدى. بىراق كوپ اعىننىڭ سالدارىنان سۋ جينالا باستادى. سۋ اعىنى قازاقاۋىل اۋدانىنداعى كارىزگە باعىتتالدى. جاعداي باقىلاۋدا", - دەپ حابارلادى تەمىر اۋدانىنىڭ اكىمدىگى.
ال بايعانين اۋدانىندا سۋ وتكىزگىش قۇبىردى ەرىگەن سۋ شايىپ كەتكەن. سالدارىنان ءۇش اۋىل بايلانىسسىز قالدى. اۋىلداردا ازىق-تۇلىك ماسەلەسى جوق دەپ سەندىرەدى اكىمدىك. بىراق توتەنشە جاعدايدا تۇرعىندار ازىق-تۇلىك الۋ ءۇشىن كورشى اتىراۋ وبلىسىنا بارا الادى، دەپ ءتۇسىندىردى شەنەۋنىكتەر.
«ويماۋىت، ميالى، ديار اۋىلدارىندا 1500-دەن استام ادام تۇرادى. ءۇش اۋىلدا دا ازىق-تۇلىك قورى 10 كۇنگە جەتەدى. ويماۋىت اۋىلىندا دارىگەرلىك امبۋلاتوريا، ميالى، دياردا فەلدشەرلىك پۋنكت بار، مۇندا جەدەل مەديتسينالىق كومەككە مۇقتاج ادامدار جوق»، - دەپ حابارلادى بايعانين اۋدانىنىڭ اكىمدىگى.
ال سينوپتيكتەر تاياۋدا وبلىستا قار ارالاس جاۋىن-شاشىن بولادى دەپ بولجاپ وتىر. بۇل سۋ تاسقىنى جاعدايىن ناشارلاتۋى مۇمكىن ەكەنىن شەنەۋنىكتەر جوققا شىعارمايدى. اۋدان تۇرعىندارىن ساقتىق تانىتىپ، قۇتقارۋشىلاردىڭ ەسكەرتۋلەرىنە قۇلاق اسۋلارىن سۇرادى ولار.
بۇعان دەيىن، قوستاناي وبلىسىنداعى امانگەلدى اۋىلىنىڭ سۋ استىندا قالعانى تۋرالى حابارلاعان بولاتىنبىز. ال اقمولا وبلىسى، قوياندى اۋىلىنىڭ تۇرعىندارى سۋ باسۋدىڭ الدىندا تۇرعان جاعدايعا دابىل قاعىپ، شەنەۋنىكتەردى وتكىزبەي، تاسجولدى جاۋىپ تاستادى.
