داۋ-جانجالعا تۇرتكى بولعان سەبەپتەردىڭ ءبىرى – قازاقستاندىق جۇمىسشىلاردى ءتىل مەن مادەنيەتتەن حابارسىز شەتەلدىك سۋپەرۆايزەرلەر باقىلاعان
"KazService" مۇنايسەرۆيستىك كومپانيالار وداعىنىڭ پرەزيديۋم توراعاسى راشيد جاقسىلىقوۆ تەڭىز كەن ورنىنداعى تارتىپسىزدىككە تۇرتكى بولعان ءۇش سەبەپتى اتادى، دەپ حابارلايدى Sputnik قازاقستان.
جاقسىلىقوۆتىڭ ايتۋىنشا، ءبىرىنشى سەبەپ – باس مەردىگەر كومپانيا بۇكىل جۇمىستى ءوزى اتقارعىسى كەلگەن. ياعني، وتاندىق سۋبمەردىگەرلەردى تارتپاعان.
"قازاقستاندىق كومپانيالارمەن جۇمىستى بولىسكەن كاسىپورىنداردا مۇنداي جاعداي جوق. بىراق، بۇل جەردە باس مەردىگەر جۇمىسشىلاردى قايدان الدى دەگەن زاڭدى سۇراق تۋىندايدى. ول جۇمىسسىز وتىرعان وتاندىق كومپانيالاردىڭ جۇمىسشىلارىن ايلىعىن ازداپ كوتەرىپ، وزىنە شاقىرعان", - دەدى ول Sputnik قازاقستان مۋلتيمەديالىق ءباسپاسوز ورتالىعىندا وتكەن ءباسپاسوز ءماسليحاتىندا.
ەكىنشى سەبەپ، ايتۋىنشا، شەتەلدىك سۋپەرۆايزەرلەر، قاراپايىم تىلمەن ايتقاندا، ينجەنەرلەر.
"بۇل قىزمەتتى اتقاراتىنداردىڭ ءبارى – شەتەلدىك. ياعني، ون مىڭعا جۋىق قازاقستاندىق قارا جۇمىستى ىستەيدى، ال ولاردى ەكى جۇزدەن استام شەتەلدىك باسقارادى. بىرىنشىدەن، ولار ءتىل بىلمەيدى، مادەنيەتتەن حابارسىز، جۇمىسشى مەن جوعارى ساپالى مامان اراسىنداعى بايلانىس ۇزىلەدى، سالدارىنان تۇسىنىسپەۋشىلىك پايدا بولادى", - دەدى پرەزيديۋم توراعاسى.
ءۇشىنشى سەبەپ، مۇنايسەرۆيستىك كومپانيالار وداعىنىڭ پىكىرىنشە، سۋبمەردىگەر كومپانيالار اراسىندا دەمپينگ ۇيىمداستىرۋ.
"كىم ەڭ تومەنگى باعانى ۇسىنادى، جۇمىستى سوعان بەرەمىن دەگەن. وسىدان كەيىن وتاندىق كومپانيالار ەڭ تومەنگى باعانى بەرۋگە تىرىسادى. بۇل دەگەنىمىز، جالاقى، الەۋمەتتىك قامسىزداندىرۋ ناشار دەگەن ءسوز. مىنە، وسى سەبەپتەن جاعداي قيىنداپ، سوڭى داۋ-جانجالعا ۇلاستى", - دەدى جاقسىلىقوۆ.
ول قازىر اتالعان وقيعاعا قاتىستى قۇزىرلى ورگاندار تەرگەۋ جۇمىستارىن جۇرگىزىپ جاتقانىن اتاپ ءوتتى. ارنايى كوميسسيا قۇرىلعان، تەرگەۋ اياقتالعاننان كەيىن، كەن ورنىنداعى تارتىپسىزدىكتىڭ ناقتى سەبەبى بەلگىلى بولماق.
تەڭىزدەگى توبەلەس
سەنبى، 29 ماۋسىم كۇنى تەڭىزدەگى 3GI زاۋىتىنىڭ مىڭعا جۋىق جۇمىسشىسى ەرەۋىلگە شىققان بولاتىن. بۇعان الەۋمەتتىك جەلىدەگى سۋرەت سەبەپ بولعان. فوتوعا ليۆيا ازاماتى ەلي داۋد (Eli Daoud) پەن قازاق قىزى بىرگە تۇسكەن.
سۋرەتتەگى كورىنىستى نامىسقا تيەدى دەپ ەسەپتەگەن جۇمىسشىلار ەرەۋىلگە شىعىپ، اراب قىزمەتكەرلەرىن سوققىنىڭ استىنا الدى.
جەلىدە جاپپاي توبەلەستىڭ ۆيدەولارى تارالا باستاعان بولاتىن. جۇمىسشىلار جابىلىپ، اراب ازاماتىن سوققىعا جىققان.
بۇعان دەيىن ىشكى ىستەر مينيسترلىگى تەڭىزدەگى جاعداي تۇراقتى ەكەنىن حابارلادى. وقيعا ىشكى ىستەر ورگاندارىنىڭ باقىلاۋىنا الىندى. اتىراۋ وبلىسىنىڭ پوليتسيا دەپارتامەنتى بۇزاقىلىق فاكتىسى بويىنشا سوتقا دەيىنگى تەرگەۋدى باستادى.
Consolidated Contracting Engineering & Procurement S.A.L. Offshore (Cسەر) كومپانياسىنىڭ لوگيستيكا جونىندەگى باس اكىمشىسى ەلي داۋد داۋ تۋعىزىپ، ەرەۋىلگە سەبەپ بولعان فوتو ءۇشىن قازاقستاندىقتاردان كەشىرىم سۇرادى.
