اقمولا وبلىسىنىڭ اكىمى مارات احمەتجانوۆ بۇلاندى اۋدانىنىڭ جۋراۆلەۆكا جانە كاپيتونوۆكا اۋىلدارىندا بولىپ، سۋ تاسقىنىنان زارداپ شەككەن تۇرعىندارمەن كەزدەستى، دەپ حابارلايدى «ادىرنا» ۇلتتىق پورتالى.
اكىمدىكتىڭ ءباسپاسوز قىزمەتىنىڭ مالىمەتىنشە، 11 ساۋىردە بوقسىق وزەنىنىڭ تاسۋى سالدارىنان ەلدى مەكەندەردى سۋ باسقان. ەۆاكۋاتسيالىق پۋنكتتەرگە 400-گە جۋىق ادام جەتكىزىلدى، تۇرعىنداردىڭ ءبىر بولىگى تۋىستارىندا ورنالاستى. ءۇي جانۋارلارى قاۋىپسىز جەرگە شىعارىلدى.
بۇگىندى تاندا ەلدى مەكەندەردەگى جاعداي تۇراقتى.
تۇرعىندار ۇيلەرىنە ورالدى. جەرگىلىكتى اتقارۋشى ورگاندار قاجەتتى كومەكتى انىقتاۋ جانە زالالدى ەسەپتەۋ ماقساتىندا تۇرعىندارعا حابارلاسۋدا. اۋىلدارعا گۋمانيتارلىق كومەك - ازىق-تۇلىك جانە توسەك-ورىن جابدىقتارى جەتكىزىلدى.
جۋراۆلەۆكا اۋىلدىق وكرۋگىنىڭ اكىمى تاتيانا گيلگەربەرگتىڭ ايتۋىنشا، اكىمدىك ءار تۇرعىنعا الدىن الا حابارلاعان. ەرگىن قار سۋى اۋىلعا 10 مينۋتتا جەتكەن.
«بارلىق شارالار قولدانىلۋدا. جەرگىلىكتى دەڭگەيدە توتەنشە جاعداي جاريالاندى. اۋدان اكىمىنە تەحنيكالىق تەكسەرۋ جۇرگىزۋدى تاپسىردىم، توتەنشە جاعداي سالدارىن جويۋ جونىندەگى كوميسسيا قۇرىلدى. كوميسسيا اۋىلدارعا بارىپ، سول جەردە جەدەل جۇمىس ىستەۋى كەرەك. بارلىعىنا كومەك كورسەتىلىپ، شىعىن وتەلەدى. سىزدەرگە تۇسىنىستىك پەن شىدامدىلىق كورسەتكەندەرىڭىز ءۇشىن العىس ايتامىن»، - دەدى تۇرعىندارمەن كەزدەسۋىندە اقمولا وبلىسىنىڭ اكىمى مارات احمەتجانوۆ.
