«WORLDSKILLS AQMOLA– 2024» جۇمىسشى ماماندىقتارىنىڭ وڭىرلىك چەمپيوناتى 400-گە جۋىق قاتىسۋشىنى قارسى الدى
اقمولا وبلىسى ءبىلىم باسقارماسىنىڭ مالىمەتىنشە، 10 ساۋىردەن باستاپ 19 ساۋىرگە دەيىن «WORLDSKILLS AQMOLA– 2024» وڭىرلىك كاسىبي شەبەرلىك بايقاۋى ءوتىپ جاتىر.
اتالمىش ءىس-شارا جۇمىسشى كاسىپتەرىنىڭ بەدەلىن ارتتىرۋ، ەكونوميكانىڭ وندىرىستىك سەكتورىنا جاس كادرلاردى تارتۋ جانە حالىقارالىق تالاپتاردى ەسكەرە وتىرىپ، كاسىپتىك ءبىلىم بەرۋدىڭ بىلىكتىلىك ستاندارتتارىن جەتىلدىرۋگە ىقپالىن تيگىزەدى.
اقمولا وبلىسى ءبىلىم باسقارماسىنىڭ ۇيىمداستىرۋىمەن ءوتىپ جاتقان بايقاۋىندا 63 قۇزىرەتتىلىك بويىنشا 16 جاستان 22 جاسقا دەيىنگى 400-دەي قاتىسۋشى «قۇرىلىس جانە قۇرىلىس تەحنولوگيالارى»، «اقپاراتتىق جانە كوممۋنيكاتسيالىق تەحنولوگيالار»، «وندىرىستىك جانە ينجەنەرلىك تەحنولوگيالار»، «ونەر جانە ديزاين»، «الەۋمەتتىك جانە جەكە قىزمەتتەر»، «كولىك جانە لوگيستيكا»، «ءبىلىم بەرۋ»، «AgroSkills»، «AbilimpiksSkills» باعىتتارى بويىنشا باق سىنايدى.
بيىل العاش رەت قاتىسۋشىلار «ساندىق مودەلدەۋ»، «زووتەحنيا»، جانە «House-master» قۇزىرەتتەر بويىنشا جارىسادى. «ۆەتەريناريا»، «زووتەحنيا»، «قۇتقارۋ جۇمىستارى» جانە «حورەوگرافيا» قۇزىرەتتىلىكتەرى بويىنشا وڭىرلىك چەمپيوناتقا سولتۇستىك قازاقستان، قوستاناي، باتىس قازاقستان وبلىستارىنىڭ قاتىسۋشىلارى شاقىرىلىپ وتىر.
WorldSkills كونكۋرسىنىڭ وڭىرلىك كەزەڭىندە ءاربىر قۇزىرەتىلىك بويىنشا ءبىرىنشى ورىن العان جەڭىمپازدار «WorldSkills Kazakhstan – 2024» ۇلتتىق چەمپيوناتىنا قاتىسادى.
