بۇگىن ر.ب. سۇلەيمەنوۆ اتىنداعى شىعىستانۋ ينستيتۋتىنىڭ ۇيىمداستىرۋىمەن بەلگىلى قىتايتانۋشى-عالىم، ءال-فارابي اتىنداعى قازاق ۇلتتىق ۋنيۆەرسيتەتى شىعىستانۋ فاكۋلتەتى قىتايتانۋ كافەدراسىنىڭ پروفەسسورى، «قازىرگى زامانعى قىتايدى زەرتتەۋ» ورتالىعىنىڭ ديرەكتورى، قر ۇعا قۇرمەتتى اكادەميگى، تاريح عىلىمدارىنىڭ دوكتورى، پروفەسسور ءنابيجان مۇقامەتحانۇلىنىڭ 70 جاسقا تولۋ مەرەيتويىنا وراي كەزدەسۋ ءوتتى.
كەزدەسۋدى ر.ب. سۇلەيمەنوۆ اتىنداعى شىعىستانۋ ينستيتۋتىنىڭ باس ديرەكتورى، ف.ع.د.، پروفەسسور د. ءماسىمحانۇلى اشىپ، مەرەيتوي يەسىنىڭ ءومىر جولى، عىلىمي ەڭبەگى مەن جەتىستىكتەرىنە كەڭىنەن توقتالا كەلە، «ەلىمىزدىڭ تاۋەلسىزدىگىنىڭ العاشقى جىلدارى وتانىنا ورالىپ، ش.ءۋاليحانوۆ اتىنداعى تاريح جانە ەتنولوگيا ينستيتۋتىنا دوكتورانتۋراعا قابىلدانىپ، عىلىمەن اينالىسا باستادى. ن. مۇقامەتحانۇلى ەلىمىزدەگى قىتايتانۋ عىلىمىنىڭ دامۋىنا سۇبەلى ۇلەس قوسىپ جۇرگەن ساناۋلى عالىمدارىمىزدىڭ ءبىرى. ونىڭ باستاماسىمەن ءال-فارابي اتىنداعى قازۇۋ جانىنان «قازىرگى زامانعى قىتايدى زەرتتەۋ ورتالىعى» قۇرىلىپ، ءوزى سول ورتالىققا جەتەكشىلىك ەتىپ كەلەدى. سونىمەن بىرگە مىڭداعان قىتايتانۋشى شاكىرتتەر تاربيەلەپ كەلە جاتقان ۇلاعاتتى ۇستاز»، -دەدى. ءسوزىنىڭ سوڭىندا، ن. مۇقامەتحانۇلىنا شىعارماشىلىق تابىس تىلەي وتىرىپ، «شىعىستانۋ عىلىمىنا قوسقان زور ۇلەسى ءۇشىن» توسبەلگىسىمەن ماراپاتتاپ، گۇل شوقتارىن تابىستادى.
ودان كەيىن ءسوز العان قوناق شىعىستانۋ ينستيتۋتىنىڭ ۇجىمى مەن باس ديرەكتورى دۇكەن ءماسىمحانۇلىنا وسىنداي جىلى كەزدەسۋ ۇيىمداستىرعانى ءۇشىن العىسىن ءبىلدىرىپ، ءوزىنىڭ عىلىم جولىنا قالاي كەلگەنى تۋرالى قىزىقتى ەستەلىكتەرىمەن ءبولىستى. سونىمەن بىرگە، وتاندىق قىتايتانۋ عىلىمىنىڭ وزەكتىلىگى مەن ماڭىزىنا، قازاق-قىتاي قارىم-قاتىناستارىنىڭ بۇگىنى مەن بولاشاعىنا قاتىستى ويلارىمەن ءبولىستى.
ودان كەيىن كەزدەسۋ قاتىسۋشىلارى قوناققا قىتايدىڭ ىشكى جانە سىرتقى ساياساتى، قىتايدىڭ قازاقستان جانە تمد ەلدەرىمەن قارىم-قاتىناسى، قىتاي ەلىندە جاس عالىمدار تاجىريبە الماسۋ بويىنشا باعدارلامالار تۋرالى ت.ب. سۇراقتار قويىپ تولىققاندى جاۋاپتارىن الدى.
