Búgin R.B. Súleımenov atyndaǵy Shyǵystaný ınstıtýtynyń uıymdastyrýymen belgili qytaıtanýshy-ǵalym, Ál-Farabı atyndaǵy Qazaq ulttyq ýnıversıteti Shyǵystaný fakýlteti Qytaıtaný kafedrasynyń professory, «Qazirgi zamanǵy Qytaıdy zertteý» ortalyǵynyń dırektory, QR UǴA Qurmetti akademıgi, tarıh ǵylymdarynyń doktory, professor Nábıjan Muqamethanulynyń 70 jasqa tolý mereıtoıyna oraı kezdesý ótti.
Kezdesýdi R.B. Súleımenov atyndaǵy Shyǵystaný ınstıtýtynyń bas dırektory, f.ǵ.d., professor D. Másimhanuly ashyp, mereıtoı ıesiniń ómir joly, ǵylymı eńbegi men jetistikterine keńinen toqtala kele, «Elimizdiń táýelsizdiginiń alǵashqy jyldary otanyna oralyp, Sh.Ýálıhanov atyndaǵy Tarıh jáne etnologııa ınstıtýtyna doktorantýraǵa qabyldanyp, ǵylymen aınalysa bastady. N. Muqamethanuly elimizdegi qytaıtaný ǵylymynyń damýyna súbeli úles qosyp júrgen sanaýly ǵalymdarymyzdyń biri. Onyń bastamasymen ál-Farabı atyndaǵy QazUÝ janynan «Qazirgi zamanǵy Qytaıdy zertteý ortalyǵy» qurylyp, ózi sol ortalyqqa jetekshilik etip keledi. Sonymen birge myńdaǵan qytaıtanýshy shákirtter tárbıelep kele jatqan ulaǵatty ustaz», -dedi. Sóziniń sońynda, N. Muqamethanulyna shyǵarmashylyq tabys tileı otyryp, «Shyǵystaný ǵylymyna qosqan zor úlesi úshin» tósbelgisimen marapattap, gúl shoqtaryn tabystady.
Odan keıin sóz alǵan qonaq Shyǵystaný ınstıtýtynyń ujymy men bas dırektory Dúken Másimhanulyna osyndaı jyly kezdesý uıymdastyrǵany úshin alǵysyn bildirip, óziniń ǵylym jolyna qalaı kelgeni týraly qyzyqty estelikterimen bólisti. Sonymen birge, otandyq qytaıtaný ǵylymynyń ózektiligi men mańyzyna, Qazaq-Qytaı qarym-qatynastarynyń búgini men bolashaǵyna qatysty oılarymen bólisti.
Odan keıin kezdesý qatysýshylary qonaqqa Qytaıdyń ishki jáne syrtqy saıasaty, Qytaıdyń Qazaqstan jáne TMD elderimen qarym-qatynasy, Qytaı elinde jas ǵalymdar tájirıbe almasý boıynsha baǵdarlamalar týraly t.b. suraqtar qoıyp tolyqqandy jaýaptaryn aldy.
