وڭىرگە كەلەتىن تۋريستەردىڭ زارە-قۇتىن العان ازعىندى قورىقشىلار كۇنى-ءتۇنى ىزدەگەنىمەن، ازىرگە ناتيجە بولماپتى.

ال مانياكتىڭ قۇربانىنا اينالا جازداعان ماريا سەدوۆا مەن مارينا ناحيموۆا فۋرمانوۆ شىڭىن باعىندىرۋعا رەسەيدەن ارنايى كەلگەن. كىم اسار شاتقالىندا جەتكەن بويدا قىزدار ناعىز شىتىرمان وقيعاعا تاپ بولادى.

"مارياعا جۇگىرىپ كەلىپ "پىشاق تىعىپ  الامىن" دەدى. ءتىپتى "اتىپ تاستايمىن" دەپ سەس كورسەتتى", - دەيدى مارينا ناحيموۆا.

ولاردىڭ ايتۋىنشا، بەيتانىس جىگىت اۋەلى اڭگىمەگە تارتىپ، قىزداردىڭ جالعىز جۇرگەنىنە كوز جەتكىزگەن سوڭ، وعاش قىلىق تانىتا باستاعان. ماريا مەن مارينانىڭ ىزىنەن قالماي، قۋالاپ، پىشاقپەن قورقىتىپتى. ابىروي بولعاندا، جولدا باسقا تۋريستەر كەزىگىپ، الگى ازعىن قاراسىن باتىرادى.

بۇدان بولەك، كۇدىكتى سول كۇنى تاۋدا سەرۋەندەپ جۇرگەن تاعى ەكى ايەلگە ءتيىسىپ، انايى ۇسىنىس جاساعان كورىنەدى.

"ول ادامدى سۋرەتتەن كوردىك. ارىقتاۋ كەلگەن. باسىندا قالپاعى بار. ساقال-مۇرتتى ەكەن. سول سۋرەت ارقىلى ىزدەپ جاتىرمىز", - دەيدى قورىقشىلاردىڭ ءبىرى.

ىلە الاتاۋى مەملەكەتتىك ۇلتتىق ساياباعىنىڭ مەدەۋ فيليالى ديرەكتورىنىڭ ورىنباسارى سەرىكجان سۇرانشين تۋريستەردى قورىقپاي دەمالۋعا شاقىرىپ، ازعىننىڭ مىندەتتى تۇردە تابىلاتىنىنا سەنىم ءبىلدىردى.

ال قازىر ورماندى قورىقشىلار، تاۋ ەتەگىن پوليتسيا ءجىتى باقىلاۋعا الدى.