قازاقستان دەلەگاتسياسىنىڭ اۋعانستانعا رەسمي ساپارى بارىسىندا قازاقستاندىق 35 كومپانيا كابۋلدا وتكەن قازاقستان-اۋعانستان بيزنەس-فورۋمى مەن كورمەسىندە ءوز ونىمدەرى مەن قىزمەتتەرىن ۇسىندى، دەپ حابارلايدى «ادىرنا» ءتىلشىسى ۇكىمەتتىڭ ءباسپاسوز قىزمەتىنە سىلتەمە جاساپ.
قازاقستاننىڭ بيزنەس-دەلەگاتسياسىنىڭ قۇرامىندا سەرىكتەستىكتىڭ جاڭا باعىتتارىن قۇرۋ ءۇشىن QarMet كومپانيالارىنىڭ، Doscar Group ديلەرلىك ورتالىعىنىڭ (KIA, Chevrolet برەندتەرى), كەنتاۋ ترانسفورماتور زاۋىتىنىڭ، Kaspy Group كومپانيالار توبىنىڭ (مەتالل كونسترۋكتسيالارىن دايىنداۋ، اۋىل شارۋاشىلىعى تەحنيكاسىن ءوندىرۋ) وكىلدەرى، زەرتحانالىق سىناقتاردى، مەديتسينالىق ءدارى-دارمەك، ماي ونىمدەرى، كونديتەرلىك ونىمدەر، توقىما جانە باسقا دا تاۋار ءوندىرۋشى كاسىپكەرلەر كەلدى.
بيزنەس-فورۋمنىڭ اشىلۋىندا پرەمەر-ءمينيستردىڭ ورىنباسارى سەرىك جۇمانعارين اۋعانستان دەلەگاتسياسىنىڭ قازاقستانعا ساپارى قورىتىندىسىنا سايكەس ەكىجاقتى تاۋار اينالىمىن $3 ملرد-قا دەيىن ارتتىرۋ مىندەتى قويىلعانىن ەسكە سالدى.
«ءبىز حيميا ونەركاسىبىندەگى، تاۋ-كەن مەتاللۋرگيا كەشەنىندەگى ءوندىرىستى بىرلەسىپ دامىتۋدى، اۋعانستان اۋماعىندا قاتتى پايدالى قازبالاردى گەولوگيالىق بارلاۋ، IT-تەحنولوگيالار سالاسىندا، ءوندىرۋ جانە وڭدەۋ بويىنشا بىرلەسكەن جوبالاردى ىسكە اسىرۋ جونىندەگى ءوزارا ءىس-قيمىلدى قاراستىرۋدى ۇسىنامىز. قازاقستان تاراپى اۋعانستاندا اۆتوكولىكتەرگە قىزمەت كورسەتەتىن ديلەرلىك ورتالىقتاردىڭ ورنالاسۋ ورنىن كەيىننەن انىقتاي وتىرىپ، وتاندىق ءوندىرىستىڭ اۆتوموبيلدەرىن جەتكىزۋگە مۇددەلى»، — دەدى ول.
