مادەنيەتتىڭ وشاعى الماتى قالاسىندا ساحا رەسپۋبليكاسىنىڭ كۇندەرى اياسىندا ۇلتتىق اسپاپتاردان كورمە ۇيىمداستىرلدى. كورمە اياسىندا ىقىلاس اتىنداعى حالىق اسپاپتار مۋزەيىنە 9 ەكسپونات قويىلدى، دەپ حابارلايدى «ادىرنا» ءتىلشىسى.
« عاسىرلار ءۇنى» دەپ اتالاتىن كورمەگە ساحا شەبەرلەرىنىڭ قولىنان شىققان ۇلتتىق اسپاپتار ەكسپونات رەتىندە قويىلدى. مادەني ءىس-شارا شەڭبەرىندە مۇراجايعا كەلۋشىلەر «قىل ساحا» ەتنو توبىنىڭ كونتسەرتىن تاماشالادى. وندا ۇلتتىق ىشەكتى اسپاپتاردا تۋىندىلار ورىندالدى.
الماتى قالاسى مۋزەيلەر بىرلەستىگىنىڭ ديرەكتورى ءلاززات ساعىندىقوۆانىڭ ايتۋىنشا، ساحا رەسپۋبليكاسىنىڭ ەكسپوناتتارىنڭ كورمەسى ەلىمىزدە العاش رەت وتكىزىلىپ وتىر ەكەن.
– الماتى قالاسىنىڭ مۋزەيلەر بىرلەستىگى مەن ساحا رەسپۋبليكاسىنىڭ ۇلتتىق اسپاپتار مۋزەيى اراسىندا ىنتىماقتاستىق جونىندە مەموراندۋمعا قول قويىلعان. سول مەموراندۋمنىڭ نەگىزىندە كورمەنى ۇيىمداستىرىپ وتىرمىز.بيىل ەلىمىزگە العاش رەت ساحا رەسپۋبليكاسىنىڭ ەكسپوناتتارىنىڭ كورمەسى قويىلدى، – دەدى الماتى قالاسى مۋزەيلەر بىرلەستىگىنىڭ ديرەكتورى ءلاززات ساعىندىقوۆا.
جالپى، اتالمىش كورمەگە ياكۋتيانىڭ XX-XXI عاسىرداعى اتاقتى شەبەرلەرى جاساعان اسپابى اكەلىنگەن. مۋزەيگە اعاش، جانۋارلاردىڭ تەرىسى، ءمۇيىزى، تۇياعى سىندى تابيعي ماتەريالداردان جاسالعان ىشەكتى، ساداق ىشەكتى، ۇرمالى مۋزىكالىق اسپاپتار جەتكىزىلگەن.
ايتا كەتەيىك، ءىس-شارا 21 ساۋىردە باستالعان. ونىڭ بارىسىندا ءتۇرلى كورمە ۇيىمداستىرىلىپ، شىعارماشىلىق كەزدەسۋ ءوتتى.
