رەسەي قورعانىس مينيسترلىگى وڭتۇستىك اسكەري وكرۋگىندە ستراتەگيالىق ەمەس يادرولىق قارۋدى قولدانۋعا دايىندىق بويىنشا وقۋ-جاتتىعۋلار وتەتىنىن حابارلادى. وڭتۇستىك اسكەري وكرۋگىنە قازاقستانمەن شەكارالاس ايماقتار دا كىرەدى، دەپ حابارلايدى “ادىرنا” ۇلتتىق پورتالى Orda.kz سايتىنا سىلتەپ.
رەسەي قورعانىس مينيسترلىگىنىڭ حابارلاۋىنشا، رەسەي ارمياسىنىڭ باس شتابى وڭتۇستىك اسكەري وكرۋگى مەن اسكەري-تەڭىز كۇشتەرىنىڭ زىمىران قۇرامالارىنىڭ قاتىسۋىمەن جاتتىعۋلارعا دايىندالۋدا.
وقۋ-جاتتىعۋدىڭ ماقساتى – «ستراتەگيالىق ەمەس يادرولىق كۇشتەردىڭ جاۋىنگەرلىك تاپسىرمالاردى ورىنداۋعا دايىندىعىن ارتتىرۋ».
رەسەي فەدەراتسياسىنىڭ وڭتۇستىك اسكەري وكرۋگىنە قازاقستانمەن شەكارالاس ەكى وبلىس كىرەدى: استراحان جانە ۆولگوگراد وبلىستارى.
رەسەي قورعانىس مينيسترلىگىنىڭ حابارلاماسىندا تالقىلاناتىن تاكتيكالىق يادرولىق قارۋلار سالىستىرمالى تۇردە قىسقا قاشىقتىقتاعى جانە قۋاتتى يادرولىق وقتۇمسىقتارى بار زىمىراندار. ستراتەگيالىق يادرولىق قارۋدان ايىرماشىلىعى، تاكتيكالىق قارۋلار تىكەلەي مايدان شەبىندە، جاۋدىڭ جەكە قۇرامى مەن تەحنيكاسىنا قارسى گيپوتەتيكالىق قولدانۋعا ارنالعان.
ايتا كەتەيىك، 2024 جىلدىڭ ناۋرىزىندا رەسەي پرەزيدەنتى ۆلاديمير پۋتين رەسەي فەدەراتسياسىنىڭ «ەگەمەندىگىنە قاۋىپ تونگەن جاعدايدا» يادرولىق قارۋدى قولدانۋعا دايىن ەكەنىن راستاعان ەدى.
