قىتايدىڭ جەتەكشى مۇناي وڭدەۋ كورپوراتسيالارى رەسەي مۇنايىن ساتىپ الۋدى توقتاتا باستادى، دەپ حابارلايدى "ادىرنا" ۇلتتىق پورتالى Bloomberg اگەنتتىگىنە سىلتەپ.
مالىمەتكە سايكەس، مەملەكەتتىك Sinopec جانە PetroChina كومپانيالارى رەسەي مۇنايىنىڭ بىرنەشە پارتياسىنان باس تارتىپ، جاڭا كەلىسىمدەردى ۋاقىتشا توقتاتقان. بۇل ۇردىسكە تاۋەلسىز مۇناي وڭدەۋشىلەر دە قوسىلعان. ولار دا ەكىنشى دەڭگەيلى سانكتسيالارعا ىلىگۋدەن قاۋىپتەنىپ وتىر. بۇعان دەيىن ۇلىبريتانيا مەن ەۋرووداق سانكتسيا تىزىمىنە ەنگىزگەن Shandong Yulong Petrochemical كومپانياسىنىڭ مىسالى دا قىتاي نارىعىندا الاڭداۋشىلىق تۋدىرعان.
Rystad Energy ساراپشىلارىنىڭ باعالاۋىنشا، قىتايداعى «ساتىپ الۋشىلار بويكوتى» رەسەيدىڭ قىتايعا باعىتتالعان مۇناي ەكسپورتىنىڭ شامامەن 45 پايىزىن قامتىعان. ەڭ كوپ زارداپ شەككەن – ءداستۇرلى تۇردە «شىعىس ءسىبىر – تىنىق مۇحيتى» قۇبىرى ارقىلى جەتكىزىلەتىن ESPO ماركالى مۇناي.
سۇرانىستىڭ تومەندەۋىنە بايلانىستى رەسەيلىك جەتكىزۋشىلەر مۇنايدى جەڭىلدىكپەن ساتۋعا ءماجبۇر. ەگەر قازان ايىنىڭ باسىندا ESPO سورتى Brent باعاسىنا $1 ۇستەمەمەن ساتىلسا، قازىر ول $0,5 جەڭىلدىكپەن ۇسىنىلۋدا.
ساراپشىلاردىڭ پىكىرىنشە، سانكتسيالىق قىسىم مەن قىتاي كومپانيالارىنىڭ ساقتىعى ساقتالعان جاعدايدا رەسەيدىڭ ازياداعى مۇناي ەكسپورتى ونداعان پايىزعا قىسقارىپ، جەڭىلدىكتەر كولەمى ايتارلىقتاي ءوسۋى مۇمكىن.
