زەلەنسكيگە بولا رەسەي مەن البانيا وكىلدەرى بۇۇ وتىرىسىندا سوزگە كەلىپ قالدى

1636
Adyrna.kz Telegram

رەسەيدىڭ بۇۇ-داعى تۇراقتى وكىلى ۆاسيلي نەبەنزيا 20 قىركۇيەك كۇنى بۇۇ قاۋىپسىزدىك كەڭەسىنىڭ ۋكراينا بويىنشا وتىرىسىن "سپەكتاكلدەن كەم ەمەس" دەپ ايىپتادى. تۇراقتى وكىل ۋكراينا پرەزيدەنتى ۆلاديمير زەلەنسكيدىڭ وتىرىستا ءبىرىنشى بولىپ ءسوز سويلەگەنىنە نارازى بولعان، دەپ حابارلايدى "ادىرنا" ۇلتتىق پورتالى.

ۋكراينا باسشىسىنىڭ ءبىرىنشى بولىپ ءسوز العانىنا كەيىس تانىتقان رەسەي وكىلىنە البانيانىڭ قاۋىپسىزدىك كەڭەسىنىڭ توراعاسى ەدي راما جاۋاپ بەردى. ول ءسوز سويلەۋ ءتارتىبى الدىن الا كەلىسىلگەنىن ايتىپ،  بۇدان بۇرىن ەشكىمنىڭ قارسىلىق تانىتپاعانىن حابارلادى.

"ۋكراينا پرەزيدەنتى ۆلاديمير زەلەنسكيگە كەڭەس مۇشەلەرى ءسوز سويلەگەنگە دەيىن وتىرىستى باستاۋعا قالاي، نەگە سۇيەنىپ رۇقسات بەردىڭىزدەر؟ وسىنداعىلاردىڭ كوبى -  مەملەكەت جانە ۇكىمەت باسشىلارى دەڭگەيىندە ۇسىنىلعان وكىلدەر. البانيا ءوز توراعالىعى كەزىندە بۇۇ قاۋىپسىزدىك كەڭەسىنىڭ ءىس-شارالارىنا اشىق نەمقۇرايلىلىق تانىتىپ، جالپىۇلتتىق ساياسي، يدەولوگيالىق كوزقاراستاردى قاۋىپسىزدىك كەڭەسى توراعاسىنىڭ مىندەتتەرىنەن جوعارى قوياتىنىنا وكىنەمىز", — دەدى رەسەي فەدەراتسياسىنىڭ تۇراقتى وكىلى.

رەسەي تاراپىنىڭ ۋاجىنە البانيا وكىلدەرى قاعىتپا قالجىڭ، اشىق كەكەسىنمەن جاۋاپ بەرگەنى بايقالادى:

"مەن رەسەيلىك ارىپتەستەرىمىزدى جانە بارلىق قاتىسۋشىلاردىڭ نازارىن اۋدارا وتىرىپ، البانيا توراعالىعىنىڭ ارنايى وپەراتسياسى ەمەس، كەڭەستىڭ بۇرىننان قالىپتاسقان تاجىريبەسىنىڭ جالعاسى ەكەندىگىنە سەندىرگىم كەلەدى.  سوندىقتان بۇگىنگى ءسوز سويلەۋ ءتارتىبى كەڭەستىڭ جۇمىس تارتىبىنە تولىق سايكەس كەلەدى دەپ ايتا الامىن. دەگەنمەن ءسىزدىڭ ءۋاجىڭىزدى دە ەسكەرۋدىڭ ءبىر جولى بار.  جول - ءcىز سوعىستى توقتاتىڭىز، سوندا پرەزيدەنت زەلەنسكي ءسوز سويلەمەيدى", - دەدى البانيا قاۋىپسىزدىك كەڭەسىنىڭ توراعاسى ەدي راما.

ەستەرىڭىزگە سالا كەتەيىك، ۋكراينا پرەزيدەنتى بۇۇ باس اسسامبلەياسىنىڭ الدىندا ءسوز سويلەپ، "رەسەيدى يادرولىق قارۋسىزداندىرۋ" ارەكەتىن باستاۋعا شاقىردى. سونىمەن قاتار، ۋكراينا ۇسىنعان "بەيبىتشىلىك فورمۋلاسى"بويىنشا وتەتىن ءسامميتتى ەسكە سالىپ، بارلىق مەملەكەتتەردى اتسالىسۋعا شاقىردى.

"ادىرنا" ۇلتتىق پورتالى 

پىكىرلەر