پولشا قۇقىق قورعاۋ ورگاندارى بەلارۋسپەن شەكاراعا جاقىن ورنالاسقان بيالا-پودلياسكا قالاسىندا رەسەيلىك سۋرەتشى ءارى اكتسيونيست سەمەن سكرەپەتسكيدىڭ قازا تاپقانىن راستادى، دەپ حابارلايدى "ادىرنا" ۇلتتىق پورتالى.
ۆۆس مالىمەتىنشە، وقيعا 15 ماۋسىم كۇنى تاڭەرتەڭ سۋرەتشى تۇرعان ءۇيدىڭ جانىنداعى كولىك تۇراعىندا بولعان. پوليتسيا مارقۇمنىڭ 44 جاستاعى رەسەي ازاماتى ەكەنىن انىقتادى. كەيىن پروكۋراتۋرا ونىڭ بۇقارالىق اقپارات قۇرالدارىندا سەمەن سكرەپەتسكي دەگەن اتپەن تانىلعان روبەرت كۋزوۆكوۆ ەكەنىن مالىمدەدى.
پروكۋراتۋرا وكىلدەرىنىڭ ايتۋىنشا، سكرەپەتسكي شىعارماشىلىعىندا رەسەي بيلىگىنىڭ قازىرگى ساياساتىن سىنعا الىپ جۇرگەن. ول ءتۇرلى رەسەيلىك ساياساتكەرلەرگە ارنالعان كاريكاتۋرالارىمەن تانىمال بولعان.
ىسكە بايلانىستى بەلارۋستىڭ ەكى ازاماتى ۇستالدى. الايدا قازىرگى ۋاقىتتا ولارعا رەسمي ايىپ تاعىلعان جوق. تەرگەۋ امالدارى جالعاسىپ جاتىر.
بۇعان دەيىن بىرقاتار بۇقارالىق اقپارات قۇرالدارى قازا تاپقان ادامنىڭ 2021 جىلى رەسەيدەن پولشاعا قونىس اۋدارعان سەمەن سكرەپەتسكي ەكەنىن حابارلاعان. مالىمەتتەرگە سايكەس، ول ساياسي سەبەپتەرمەن قۋدالاۋدان قاۋىپتەنىپ، وتباسىمەن بىرگە بيالا-پودلياسكا قالاسىنا كوشىپ كەلگەن.
