رەسەي پرەزيدەنتى ۆلاديمير پۋتين كۋريل ارالدارىنداعى يتۋرۋپ ارالىنا باردى، دەپ حابارلايدى "ادىرنا" ۇلتتىق پورتالى DW-عا سىلتەپ.
جاپونيا رەسەي باسشىسىنىڭ ساپارىنا بايلانىستى نارازىلىق ءبىلدىردى. پۋتين يتۋرۋپ ارالىنداعى «ياسنىي» بالىق وڭدەۋ كومبيناتىنا، كۋريل ورتالىق اۋداندىق اۋرۋحاناسىنا جانە مەكتەپكە باردى. سونىمەن قاتار ساحالين وبلىسىنىڭ گۋبەرناتورى ۆالەري ليمارەنكومەن كەزدەستى.
بۇل – ۆلاديمير ءپۋتيننىڭ كۋريل ارالدارىنا پرەزيدەنت رەتىندە جاساعان العاشقى ساپارى. بۇعان دەيىن 2010 جىلى رەسەيدىڭ سول كەزدەگى پرەزيدەنتى دميتري مەدۆەدەۆ يتۋرۋپقا بارعان. كەيىن ول پرەمەر-مينيستر قىزمەتىندە جۇرگەن كەزىندە دە كۋريل ارالدارىنا بىرنەشە رەت ساپار جاساعان. 2021 جىلى يتۋرۋپقا رەسەي پرەمەر-ءمينيسترى ميحايل ميشۋستين بارعان.
توكيو رەسەي پرەزيدەنتىنىڭ ساپارىنا بايلانىستى قاتاڭ نارازىلىق ءبىلدىردى. جاپونيا پرەمەر-ءمينيسترى ساناە تاكايتي بۇل ساپاردىڭ جاپونيا مەن رەسەي اراسىنداعى قارىم-قاتىناسقا كەرى اسەر ەتكەنىن مالىمدەدى. ونىڭ ايتۋىنشا، كۋريل ارالدارىنىڭ وڭتۇستىك بولىگى جاپونيا ءۇشىن تاريحي جانە حالىقارالىق قۇقىق تۇرعىسىنان ماڭىزدى اۋماق سانالادى.
«بۇل جاپون حالقىنىڭ سەزىمىنە نۇقسان كەلتىرەدى جانە مۇلدەم قابىلدانبايدى»، – دەدى تاكايتي.
جاپونيانىڭ سىرتقى ىستەر ءمينيسترى توسيميتسۋ موتەگي دە رەسەي تارابىنا رەسمي نارازىلىق ءبىلدىردى. ول يتۋرۋپتى قوسا العاندا، جاپونيا «سولتۇستىك اۋماقتار» دەپ اتايتىن ارالدار تاريحي جانە حالىقارالىق قۇقىق تۇرعىسىنان جاپونيانىڭ اجىراماس بولىگى ەكەنىن حابارلادى. كۋريل ارالدارىنىڭ وڭتۇستىك بولىگى – يتۋرۋپ، كۋناشير، شيكوتان جانە حابوماي ارالدارى – ەكىنشى دۇنيەجۇزىلىك سوعىستان كەيىن كەڭەس وداعىنىڭ باقىلاۋىنا ءوتتى. 1956 جىلى كەڭەس وداعى مەن جاپونيا بىرلەسكەن دەكلاراتسياعا قول قويىپ، بەيبىت كەلىسىم جاسالعاننان كەيىن شيكوتان مەن حابوماي ارالدارىن جاپونياعا بەرۋ مۇمكىندىگىن قاراستىرعان.
الايدا كەيىن ەكى ەل ارالداردىڭ مارتەبەسىنە قاتىستى ورتاق كەلىسىمگە كەلە المادى. وسىعان بايلانىستى رەسەي مەن جاپونيا اراسىندا ەكىنشى دۇنيەجۇزىلىك سوعىستى رەسمي تۇردە اياقتايتىن بەيبىت كەلىسىمگە ءالى كۇنگە دەيىن قول قويىلعان جوق.
ۋكرايناداعى سوعىس باستالعاننان كەيىن جاپونيا رەسەيگە قارسى حالىقارالىق سانكتسيالارعا قوسىلدى. بۇدان كەيىن ماسكەۋ توكيومەن بەيبىت كەلىسىم بويىنشا كەلىسسوزدەردى توقتاتتى. سونىمەن قاتار رەسەي جاپون ازاماتتارىنىڭ كۋريل ارالدارىنا ۆيزاسىز بارۋ ءتارتىبىن جويىپ، ارالدارداعى بىرلەسكەن شارۋاشىلىق قىزمەت جونىندەگى ديالوگتان شىقتى.
