مەملەكەت باسشىسى قاسىم-جومارت توقاەۆتىڭ قولداۋىمەن ەلىمىزدە 2024 جىلدىڭ 6 ءساۋىرى مەن 11 مامىرى ارالىعىندا «تازا قازاقستان» رەسپۋبليكالىق ەكولوگيالىق اكتسياسى ءوتتى. اتالمىش يگى شاراعا اقمولا وبلىسىنىڭ تۇرعىندارى دا بەلسەندىلىك تانىتىپ، ۇلەس قوستى.
اقمولا وبلىسى ىشكى ساياسات باسقارماسىنىڭ مالىمەتىنشە، اۋقىمدى ەكولوگيالىق اكتسيا بەس اپتاعا سوزىلدى، ولاردىڭ ارقايسىسى بەلگىلى ءبىر تاقىرىپقا ارنالدى. ءساۋىردىڭ 13-نە دەيىن وتكىزىلگەن «تازا ولكە» اپتالىعى بارىسىندا اۋماقتار مەن تۇرعىن ءۇي اۋلالارى تازارتىلدى. اپتا قورىتىندىسى بويىنشا 70 توننا قوقىس شىعارىلدى.
ودان كەيىنگى «كيەلى مەكەن» اپتالىعى تاريحي-مادەني ەسكەرتكىشتەر اۋماعىن اباتتاندىرۋ جۇمىستارىنا ارنالدى. «جاسىل ايماق» اپتالىعى اعاش كوشەتتەرىن وتىرعىزۋمەن، ەكپەلەردى اقتاۋمەن اتاپ ءوتىلدى. وندا بارلىعى 16 مىڭ ءتۇپ اعاش وتىرعىزىلدى.
ال «ونەگەلى ۇرپاق» اپتالىعى ارداگەرلەر مەن قارتتار تۇرتان 150-گە جۋىق تۇرعىن ءۇيدىڭ اۋماعى مەن اۋلاسى تازارتىلىپ، اباتتاندىرىلدى.
سوڭعى «ءمولدىر بۇلاق» اپتالىعى بارىسىندا 27 سۋ ايدىنى اۋماعى - وزەن، كولدەردىڭ جاعاسى كۇل-قوقىستان تازارتىلدى. جالپى، اكتسيا بارىسىندا 3 مىڭعا جۋىق ءىس-شارا وتكىزىلىپ، 40 توننا كۇل-قوقىس قاتتى تۇرمىستىق قالدىقتار پوليگونىنا تاسىمالداندى.
بۇگىن اتالمىش اكتسيا جالعاسىن تاۋىپ، اتباسار اۋدانىندا 2 مىڭعا جۋىق ادام ەلدى مەكەندەردى كۇل-قوقىستان تازارتۋعا شىقتى.
اۋدان اكىمدىگىنىڭ مالىمەتىنشە، اۋدان بويىنشا بارلىعى 365 توننا كۇل-قوقىس جينالدى. اكتسيا بارىسىندا اتباسار قالاسىنىڭ جاعاجاي اۋماعى، ەسەنبەرلين، اۋەزوۆ، اعىباي باتىر ءتارىزدى بىرقاتار كوشەلەرى قوقىستان تازارتىلدى جانە اباتتاندىرىلدى. قالانىڭ ورتالىق الاڭىندا كانادالىق راۋشان گۇلى مەن ساندىك بۇتا اعاشتارى وتىرعىزىلدى.
«اۋدان تۇرعىندارىن «تازا قازاقستان» رەسپۋبليكالىق ەكولوگيالىق اكتسياسىنا قاتىسىپ، تۋعان ولكەنىڭ تازالىعىن ساقتاۋعا ۇلەس قوسىلۋعا شاقىرامىن»، - دەدى اۋدان باسشىسى امانبەك قالجانوۆ.
اكتسياعا اتباسار ەلەكتروۆوز جوندەۋ زاۋىتىنىڭ، «اتباسار سۋ» كوممۋنالدىق كاسىپورنىنىڭ، «اجدار جانە ك» ۆاگون جوندەۋ كاسىپورنىنىڭ، مەملەكەتتىك مەكەمەلەردىڭ، ءبىلىم بەرۋ جانە دەنساۋلىق ساقتاۋ مەكەمەلەرىنىڭ، كوممۋنالدىق قىزمەتتەردىڭ جۇمىسشىلارى، اتباسار اگرارلىق-يندۋستريالىق كوللەدجىنىڭ ۇجىمى مەن ستۋدەنتتەرى، جاستار رەسۋرستىق ورتالىعىنىڭ مۇشەلەرى، ەرىكتىلەر اسا بەلسەندىلىك تانىتتى.
