تاسقىن سۋدىڭ بەتى قايتقان سوڭ ونىڭ زاردابىمەن كۇرەسۋ، شىعىننىڭ قالپىن كەلتىرۋ جۇمىستارى جۇرۋدە.
پودستەپنىي اۋىلدىق وكرۋگىندە سۋعا كەتكەن تۇرعىندارىنا كەزەڭ-كەزەڭىمەن كومەك بەرۋ جۇزەگە اسۋدا.
قازىر حالىققا كەرەگى - باسپانا. ءاربىر جەردە تەنتىرەگەن تۇرعىنداردىڭ تالابى دا سول “تەزىرەك باسپانا سالىپ بەرسە ەكەن” بولىپ وتىر.
مەملەكەت باسشىسى قاسىم-جومارت كەمەلۇلى : “ تاسقىن سۋدان زارداپ شەككەن ازاماتتارعا ايتارىم، مەملەكەت بىردە-ءبىر ادامدى ەسكەرۋسىز قالدىرمايدى. بارشاڭىزعا قارجىلىق جانە باسقا دا كومەك بەرىلەدى. ماتەريالدىق شىعىندار تولىق وتەلەدى” دەپ بىرقاتار تاپسىرمالار بەرگەن بولاتىن. قازىرگى تاڭدا كوميسسيا شەشىمىمەن اپاتتى دەپ تانىلعان ۇيلەر قۇلاتىلىپ، ورنىنا جاڭا ءۇي سالۋ جۇمىستارى باستالدى. سونداي-اق ىشكى ارلەۋ جۇمىسىن قاجەت ەتەتىن ۇيلەر بار. ونىڭ ءبارىن قالپىنا كەلتىرۋ ۋاقىتتى تالاپ ەتەدى.
سول تاپسىرمالارعا سايكەس پودستەپنىي اۋىلدىق وكرۋگىندە تۇرۋعا جارامسىز دەپ تانىلعان 98 ءۇي بۇزىلاتىن بولدى. ورنىنا 80 مەتر كۆادراتتى قۇرايتىن جاڭا ءۇي سالىنادى. قازىرگى ۋاقىتتا اتالمىش اۋىلدا قۇرىلىس قارقىن الا باستادى.
تۇرعىن ءۇي سالۋ جۇمىستارىن "وتدەلستروي”، “سۆس باتىس”، “اتامەكەن ينۆەست”، “CHRYSTAL GENERATION LTD”، “گراديندقۇرىلىس”، “BETA Servicom”، “Batys Kurylys Servicom” سىندى بىرنەشە قۇرىلىس كومپانيالارى جۇرگىزەدى.
اۋدان اكىمى ءاليا مۇحانبەتجانوۆا مەردىگەرلەرمەن كەزدەسىپ، تۇرعىن-ءۇي بارىسىن قارادى.
قۇرىلىس باسىندا بولىپ پودستەپنىي اۋىلى تۇرعاندىرىمەن تىلدەسكەن بولاتىنبىز. ول جانداردىڭ ىشىندە راقمەت ايتىپ جاتقاندارى دا، كوڭىلى تولماي، جاسالىپ جاتقان جۇمىستاردى جوققا شىعارىپ جاتقاندارى دا بار. ارينە، بارىنە بىردەي ۇناۋ مۇمكىن ەمەس.
سولاردىڭ ءبىرى پودستەپنىي اۋىلىنا قونىس تەپكەنىنە جيىرما جىلعا جۋىق ۋاقىت بولعان نەعمەتوللا دجالمۇراتوۆتىڭ ءۇيى دە اپاتتى دەپ تانىلعان.
-ناۋرىز ايىنىڭ سوڭىندا تۇرعىن ءۇيىمىز سۋعا كەتتى. كوميسسيا شەشىمىمەن ءۇيدى بۇزىپ، ورنىنا جاڭا ءۇي سالىپ بەرەتىنىڭ ايتتى. قازىر جەردى تەگىستەپ جاتىر. ءبىر-ەكى كۇندە ءۇي ىرگەسى قۇيىلادى. اللا قالاسا ، كۇزدە جاڭا باسپانامىزعا كىرەمىز دەگەن ويىمىز بار.
قازىرگى ۋاقىتتا قۇرىلىس قارقىنى جاقسى. مەردىگەرلەر كۇزگە دەيىن ءۇيدى تولىق اياقتاپ، كىلتىن تابىستايمىز دەپ وتىر. ونىسى دۇرىس. تەنتىرەپ جۇرگەن حالىق ءوز باسپاناسىنا تەزىرەك ورنالاسسا ەكەن دەيمىز.
جاۋھار نۇرىم
