الەمنىڭ مىقتى كاراتيستەرىن جينايتىن Dageki World Full Contact Karate Championship-2024 دوداسىنا قازاقستاننان قاتىسقان سپورتشىلار كوماندالىق ەسەپتە 1-ورىن الدى. التىن مەدال العان تاجىريبەلى سپورتشى ازاماتتار ىشىندە 17 جاسار ديانا ەسجانوۆا دا بار.
ەلىمىزدىڭ نامىسىن قورعاپ كاناداعا بارعانقازاقستان قۇراماسىندا 21 سپورتشى بولسا، ونىڭ ون ءبىرى قاراعاندىدان بارعان. 17-19 مامىر ارالىعىندا وتكەن چەمپيوناتتا ۇلتتىق قۇرامانىڭ جاس ورەندەرى جالپى سانى 9 مەدال يەلەنسە، ونىڭ تورتەۋى – التىن, ەكەۋى – كۇمىس، ەكەۋى – قولا. وسىلايشا جالپىكوماندالىق ەسەپتە قازاقستان جاپونيانىڭ الدىنا ءتۇسىپ، 1-ورىنعا جايعاستى.
مونرەال قالاسىندا وتكەن سپورتتىق شاراعا 12 مەملەكەتتەن الەمنىڭ 800-گە جۋىق ەڭ مىقتى سپورتشىلارى جينالدى. اقش، جاپونيا، كانادا سىندى الپاۋىت ەلدەردىڭ ورتاسىندا قازاق سپورتشىلارى بارىن سالدى. بارلىق باسەكە تىكەلەي ەفيردە ترانسلياتسيالانىپ، الەمنىڭ تۇكپىر-تۇكپىرىندە وتىرعان جانكۇيەرلەردىڭ دەلەبەسىن قوزدىردى.
وسىنداي ايتۋلى سىندا التىننان القا تاققانءبىزدىڭ كاراتيستەر – تيمۋر رايىمبەكوۆ، ارتيوم رەدين, مۇحتار ءابءىشەۆ جانە ديانا ەسجانوۆا.
ون جەتى جاسار ديانا ەسجانوۆا – قاراعاندى ەكونوميكا، قۇقىق جانە بيزنەس كوللەدجىنىڭ 3-كۋرس ستۋدەنتى. باپكەرلەرى ديانانىڭ قايسار مىنەزىنە ءتانتى بولعانىن ايتادى. «ديانانىڭ اقجولتاي اعىباي باتىردىڭ تىكەلەي ۇرپاعى ەكەنىن جاقسى بىلەمىز. ءدال وسى حالىقارالىق سىندا ديانا جاس بولسا دا، وجەت رۋحىمەن، تاباندىلىعىمەن جانە مىقتى فيزيكالىق دايىندىعىمەن ەرەكشە كوزگە ءتۇسىپ، توپ جاردى»، – دەيدى باپكەرى ت. رايىمبەكوۆ.
«ءبىرىنشى باسەكەگە اقش سپورتشىسىمەن ءتۇستىم. ونى جەڭگەن سوڭ، كانادالىق سپورتشىمەن باق سىناستىم. اتا-انام جانە ءاجەم قاناعات تارعىنقىزى مەنى باتىرلارعا ءتان ءور رۋحتا تاربيەلەگەن. ەرىك-جىگەرىمدى قايراپ، جەڭىستى قولدان بەرمەدىم»، – دەيدى التىن قىز ديانا دۋلاتقىزى.
قازاقستان قۇراماسىنىڭ كەلەسى ماقساتى – 2024 جىلدىڭ 1-2 تامىزىندا استانادا وتەتىن ازيا چەمپيوناتىندا لايىقتى ونەر كورسەتۋ. ايتا كەتەر بولساق، كانادادا وتكەن سوڭعى «Dageki 2016» چەمپيوناتىندا قازاقستان 1 التىن، 2 قولامەن ورالعان بولاتىن.
الما سايلاۋقىزى
